ახალი ამბები

ვირჯინიის უნივერსიტეტის სამეცნიერო საქმიანობის კომერციალიზაციის ცენტრის დირექტორმა, უნივერსიტეტის ვიცე პრეზიდენტმა რიჩარდ ნადარმა ბსუ-ში ოთხდღიანი ტრენინგი ჩაატარა. ტრენინგი მოიცავდა ისეთ აქტუალურ საკითხებს, როგორიცაა: კვლევის სტრატეგიული დაგეგმვის ჩარჩო დოკუმენტი, ტრანსდისციპლინური, ინტერდისციპლინური, მულტიდისციპლინური კვლევა, კვლევის ზეგავლენა, კვლევის პორტფოლიოს შექმნა (ინდივიდუალური და ინსტიტუციური პერსპექტივები). პროფესორმა რიჩარდ ნადარმა მსმენელებს გაუზიარა ამერიკული საერთაშორისო სამეცნიერო ცენტრებისა და დაფინანსების წყაროების გამოცდილება, ესაუბრა პარტნიორობის შემადგენელ ელემენტებზე, კვლევის პრიორიტეტულ მიმართულებებსა და კომერციალიზაციაზე.

შავი ზღვის დაცვის საერთაშორისო დღესთან დაკავშირებით, ბათუმის შოთა რუსთაველის სახელმწიფო უნივერსიტეტში საბუნებისმეტყველო მეცნიერებათა და ჯანდაცვის ფაკულტეტისა და გარემოს ეროვნული სააგენტოს მეთევზეობის, აკვაკულტურისა და წყლის ბიომრავალფეროვნების დეპარტამენტის ორგანიზებით რამდენიმე ღინისძიება გაიმართა. ღონისძიებაში უნივერსიტეტის სტუდენტებთან ერთად, შპს ელიტური სკოლა „გორდას“, სკოლა „ევრო–2000“-ის, ფოთის მე-4 და ბობოყვათის საჯარო სკოლების 23 მოსწავლე მონაწილეობდა.

საერთაშორისო წამყვანი სამეცნიერო გამომცემლობის - ELSEVIER-ის სარედაქციო კოლეგიამ ღია წვდომის კვირეულის 2022 წლის (Open Access Week 2022) ფარგლებში ბსუ-ს ფიტოპათოლოგიისა და ბიომრავალფეროვნების ინსტიტუტის უვადო მეცნიერ იზოლდა მაჭუტაძეს ღია მეცნიერებაში შეტანილი წვლილისათვის სერტიფიკატი გადასცა. განსაკუთრებულია მეცნიერის წარმატება 2019-2021 წლებში ღია წვდომის ელსევიერის ჟურნალებში გამოცემების თვალსაზრისით, დიდი რეზონანსი მოჰყვა სამეცნიერო პუბლიკაციას: „Mapping Asia plants: Current status on floristic information in Southwest Asia“. სამეცნიერო სტატია მსოფლიოს უდიდეს გამოწვევას, გაეროს მდგრადი განვითრების მიზნებს ეხმაურება. მეცნიერ იზოლდა მაჭუტაძის სამეცნიერო ნაშრომით მსოფლიოს სხვადასხვა ქვეყნის 3000-მდე მკვლევარი არის დაინტერესებული. ბათუმის შოთა რუსთაველის სახელმწიფო უნივერსიტეტი მეცნიერ იზოლდა მაჭუტაძეს ულოცავს უმნიშვნელოვანეს გამარჯვებას და უსურვებს წარმატებებს.

ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის სტუდენტი, დიეგო ჩხიკვაძე ბერძნულ-რომაულ ჭიდაობაში მსოფლიო ჩემპიონატის ბრინჯაოს პრიზიორია. დიეგო ჩხიკვაძემ ბერძნულ-რომაულ სტილში 23-წლამდელთა მსოფლიო ჩემპიონატზე 67 კილოგრამ წონით კატეგორიაში იასპარეზა, კოლუმბიელი ხულიან ასევადო 3-1 ანგარიშით დამარცხა და მედალს დაეუფლა. საქართველოს ბერძნულ-რომაული სტილით მოჭიდავეთა 23 წლამდელთა ნაკრებმა მსოფლიოს ჩემპიონატი 101 ქულით გუნდური მე-2 ადგილი დაიკავა.

ბათუმის შოთა რუსთაველის სახელმწიფო უნივერსიტეტის ეზოს სარეაბილიტაციო სამუშაოები დაიწყო. ინფრასტრუქტურული პროექტის ფარგლებში გათვალისწინებულია მიწისქვეშა სისტემების სრული რეაბილიტაცია, დეკორატიული სანათების და სარეკრიაციო სივრცეების მოწყობა. სარემონტო სამუშაოები 2023 წელს დასრულდება. პროექტი აჭარის ა.რ. მთავრობის პროგრამული დაფინანსების ფარგლებში ხორციელდება, რომლის ბიუჯეტი შეადგენს 518 000 ლარს. ინფრასტრუქტურული პროექტის სამუშაოებს აწარმოებს შპს „ლეგიონი".