ახალი ამბები

ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა და ჯანმრთელობის სახლი-რეაბილიტაციის ცენტრის დირექტორმა დავით კუკულაძემ თანამშრომლობის მემორანდუმს მოაწერეს ხელი. დოკუმენტი მიზნად ისახავს ერთობლივი საგანმანათლებლო პროგრამების განხორციელებას. მემორანდუმი ფარგლებში ჯანმრთელობის სახლი-რეაბილიტაციის ცენტრი პრაქტიკული და ანალიტიკური უნარ-ჩვევების ჩამოყალიბებისა და პრაქტიკული საქმიანობის განმტკიცების მიზნით, უზრუნველყოფს ფიზიკური მედიცინის და სამედიცინო რეაბილიტაციის საბაკალავრო პროგრამის სტუდენტთა პრაქტიკის გავლას და კვლევითი ექსპერიმენტის ჩატარებას.

ბათუმის შოთა რუსთაველის სახელმწიფო უნივერსიტეტის ტექნოლოგიური და საბუნებისმეტყველო მეცნიერებათა და ჯანდაცვის ფაკულტეტის ოცმა სტუდენტმა და კურსდამთავრებულმა აჭარის ა.რ. სოფლის მეურნეობის სამინისტროს 2022 წლის ქვეპროგრამის „საგანმანათლებლო და სამეცნიერო პრაქტიკის დანერგვის“ ფარგლებში, სამინისტროსა და მის საქვეუწყებო დაწესებულებებში ანაზღაურებადი, ცხრათვიანი სტაჟირება გაიარა. სტაჟიორებმა უნივერსიტეტში შემაჯამებელი პრეზენტაცია წარმოადგინეს და სასწავლო პრაქტიკის შესახებ ისაუბრეს. პროგრამაში მონაწილე სტუდენტებს სერტიფიკატები გადასცეს და წარმატებები უსურვეს აჭარის ა.რ. სოფლის მეურნეობის მინისტრმა ზაზა შავაძემ, ბსუ-ს რექტორმა, პროფესორმა მერაბ ხალვაშმა, ადმინისტრაციის ხელმძღვანელმა მერაბ დიასამიძემ, აჭარის ა.რ. სოფლის მეურნეობის მინისტრის მოადგილემ ირმა აფხაზავამ.

ბათუმის შოთა რუსთველის სახელმწიფო უნივერსიტეტში ეკონომიკისა და ბიზნესის ფაკულტეტის 25 წლის იუბილე საზეიმოდ აღინიშნა. ბსუ-ს რექტორმა, პროფესორმა მერაბ ხალვაშმა ფაკულტეტს იუბილე მიულოცა, მის ისტორიაზე, მიღწევებზე ისაუბრა და უნივერსიტეტის განვითარებაში შეტანილი განსაკუთრებული წვლილისათვის უნივერსიტეტის უმაღლესი ჯილდო - შოთა რუსთველის მედალი - გადასცა. ფაკულტეტს საიუბილეო თარიღი მიულოცეს და წარმატებები უსურვეს აჭარის ა.რ. უმაღლესი საბჭოს თავმჯდომარემ დავით გაბაიძემ, აჭარის ა.რ. ფინანსთა და ეკონომიკის მინისტრმა ჯაბა ფუტკარაძემ, აჭარის ა.რ სოფლის მეურნეობის მინისტრმა ზაზა შავაძემ, ბსუ-ს ადმინისტრაციის უფროსმა მერაბ დიასამიძემ, ბსუ-ს ხარისხის უზრუნველყოფის სამსახურის უფროსმა ვლადიმერ ღლონტმა, კურსდამთავრებულებმა, სხვადასხვა უმაღლესი საგანმანათლებლო დაწესებულებების, ბიზნეს სექტორისა და საზოგადოების წარმომადგენლებმა.

ბათუმის შოთა რუსთაველის სახელმწიფო უნივერსიტეტის სტუდენტებმა საქართველოს საუნივერსიტეტო ჩემპიონატში „ინტელექტმარათონი“ გაიმარჯვეს. ბსუ-ს ინტელექტუალებმა ტურნირის სამივე საპრიზო ადგილი დაიკავეს, პირველობა გუნდ „ქსენოფობია გოიმობას“ ერგო, მეორე ადგილი - გუნდ „უქემერიონს“ და მესამე ადგილი - გუნდ „რეაქტუნზს“. ჩემპიონატში სხვადასხვა უნივერსიტეტის 30-მდე გუნდი მონაწილეობდა, ბსუ-დან შიდა საუნივერსიტეტო ტურნირის 6 საუკეთესო გუნდი ასპარეზობდა. საქართველოს საუნივერსიტეტო ჩემპიონატის გამარჯვებულებს სიგელები და სამახსოვრო საჩუქრები გადაეცათ. ინტელექტუალური მარათონი ბათუმის საზღვაო აკადემიის ორგანიზებით სასტუმრო „ჰილტონში“ ჩატარდა.

„ღია მეცნიერების“ კვირეულის ფარგლებში, საქართველოს განათლებისა და მეცნიერების სამინისტროსა და აჭარის ა.რ. განათლების, კულტურისა და სპორტის სამინისტროს ეგიდითა და ბათუმის შოთა რუსთაველის სახელმწიფო უნივერსიტეტის ორგანიზებით, ბსუ-ს სამეცნიერო-კვლევითი ინსტიტუტების მეცნიერ-თანამშრომლები და მკვლევრები მეცნიერებაში შეტანილი მნიშვნელოვანი წვლილისა და ხანგრძლივი ნაყოფიერი საქმიანობისთვის სიგელებით დაჯილდოვდნენ.