ახალი ამბები

ბათუმის შოთა რუსთაველის სახელმწიფო უნივერსიტეტში გაცვლითი პროგრამების წარდგენა გაიმართა. ბსუ-ს სტრატეგიული განვითარებისა და საგარეო ურთიერთობათა დეპარტამენტის უფროსმა მარინე გიორგაძემ და დეპარტამენტის უფროსის მოადგილემ, „ერაზმუს+“-ის კოორდინატორმა ნანა ყურშუბაძემ სხვადასხვა ფაკულტეტის საბაკალავრო, სამაგისტრო და სადოქტორო პროგრამების სტუდენტებს 2023-2024 სასწავლო წლისთვის გამოცხადებული გაცვლითი პროგრამები გააცნეს. გაცვლითი პროგრამები ითვალისწინებს 1 სემესტრის (შემოდგომის/გაზაფხულის) განმავლობაში ევროპის უნივერსიტეტებში სწავლას. წარდგენის დასრულების შემდეგ, დეპარტამენტის წარმომადგენლებმა სტუდენტების შეკითხვებს უპასუხეს.

27-29 მარტს, „ერაზმუს+”-ის პროექტის - „საქართველოს უნივერსიტეტებში მესამე მისიის ხარისხის და რელევანტურობის გაძლიერება“ (SQUARE) ფარგლებში, ბსუ-ს რექტორის მოადგილე თამარ სირაძე და საზოგადოებასთან ურთიერთობის სამსახურის უფროსი ნინო დოლიძე სამუშაო ვიზიტით ქალაქ ბრიუსელში იმყოფებოდნენ. ვიზიტს მასპინძლობდა პროექტის პარტნიორი ორგანიზაცია EFMD – „მენეჯმენტის განვითარების ევროპული სააგენტო“. ვიზიტის მიზანი იყო მონაწილე მხარეს შექმნოდა მკაფიო წარმოდგენა ევროკავშირის პოლიტიკის შესახებ მესამე მისიის ფარგლებში და ფართო მასშტაბით გაეაზრებინა არსებული შესაძლებლობები. ასევე, საუკეთესო პრაქტიკის გაცვლა ევროპელ კოლეგებთან და პოტენციალის განხილვა შემდგომი თანამშრომლობისათვის.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ქართული ფილოლოგიის კლასტერმა, რომელშიც გაერთიანებულია 1 საბაკალავრო, 2 სამაგისტრო და 1 სადოქტორო საგანმანათლებლო პროგრამა, შვიდი წლით მოიპოვა აკრედიტაცია.

ბათუმის შოთა რუსთაველის სახელმწიფო უნივერსიტეტში ხორციელდება ბულგარეთის რესპუბლიკის საგარეო საქმეთა სამინისტროს მიერ დაფინანსებული საგრანტო პროექტი „ბულგარული გამოცდილების გაზიარება ბათუმის სახელმწიფო უნივერსიტეტში“, რომელიც ითვალისწინებს თანამშრომლობას სოფიას კლიმენტ ოჰრიცკის სახელობის სახელმწიფო უნივერსიტეტის ჟურნალისტიკისა და მასობრივი კომუნიკაციების ფაკულტეტთან. პროექტის ფარგლებში სამაგისტრო პროგრამის „ციფრული მედია და ინოვაციები“ ოთხი სტუდენტი ანა ბაჟუნაიშვილი, ელიზა ეფაძე, მარიამ ხალვაში, დიანა ცეცხლაძე და სოციალურ მეცნიერებათა დოქტორი ლაშა ზარგინავა სასწავლო ვიზიტით იმყოფებოდა სოფიას უნივერსიტეტში.

ბათუმის შოთა რუსთაველის სახელმწიფო უნივერსიტეტი შეურთდა პროექტს „ჩვენი და ქვეყნის პროგრესისთვის - შეაგროვე ცოდნა". ინიციატივა ითვალისწინებს სხვადასხვა პენიტენციურ დაწესებულებაში მყოფი მსჯავრდებულისთვის 16 000-მდე წიგნის შეგროვებას. ბსუ-ს პროფესორ-მასწავლებლებმა და ადმინისტრაციის წარმომადგენლებმა მსჯავრდებულთა პროფესიული მომზადებისა და გადამზადების ცენტრს მსჯავრდებულებისთვის საჩუქრად მხატვრული ლიტერატურა გადასცეს.