ახალი ამბები

ბათუმის შოთა რუსთაველის სახელმწიფო უნივერსიტეტისა და დიგიტალური ჰუმანიტარიის აკადემიის ერთობლივი საერთაშორისო სეზონური სკოლა გაიხსნა ლინგვოპოლიტოლოგიაში თემაზე: „პოლიტიკური მეტყველების კულტურა საჯარო გამოსვლებსა და დებატებში“. სეზონური სკოლა გახსნეს ბსუ-ს რექტორმა, პროფესორმა მერაბ ხალვაშმა, პროექტის ხელმძღვანელმა, ბსუ-ს ასოცირებულმა პროფესორმა მზია ხახუტაიშვილმა და პროექტის თანახელმძღვანელმა, ფრანკფურტის გოეთეს უნივერსიტეტის ემპირიული ენათმეცნიერების ინსტიტუტის პროფესორმა მანანა თანდაშვილმა. ღონისძიება მიზნად ისახავს, წარმოაჩნოს როგორ აისახება პოლიტიკურ დისკურსში კულტურა, „სიძულვილის ენა“ და პოლიტიკური პოლარიზმის უარყოფითი ზეგავლენა მასობრივ ცნობიერებაზე.

ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა და საქართველოს ადვოკატთა ასოციაციის თავმჯდომარემ დავით ასათიანმა თანამშრომლობის მემორანდუმს მოაწერეს ხელი. ხელშეკრულება ითვალისწინებს ბსუ-ს სამართალმცოდნეობის პროგრამის სტუდენტთა პრაქტიკული საქმიანობის ხელშეწყობასა და იურიდიული და სოციალურ მეცნიერებათა ფაკულტეტის იურიდიული კლინიკის ბაზაზე ადვოკატთა პროფესიული ეთიკის კლინიკის დაფუძნებას. კლინიკის ფარგლებში სტუდენტებს შესაძლებლობა ექნებათ, აქტიურად ჩაერთონ ადვოკატთა პროფესიული ეთიკის სტანდარტებისა და დისციპლინური წარმოების პროცესის შესწავლის პროცესში.

დასრულდა „ქართული ლიტერატურისა და ლიტერატურული პროცესის შემსწავლელი სეზონური სკოლა“. ბსუ-ს ჰუმანიტარულ მეცნიერებათა ფაჯულტეტის დეკანმა მარინა გიორგაძემ სეზონური სკოლის მონაწილეებს სერტიფიკატები გადასცა. საქართველოს სხვადასხვა უმაღლესი საგანმანათლებლო დაწესებულების 30 სტუდენტს ხუთი დღის განმავლობაში ლექციები და სემინარები ჩაუტარეს ნანა ტრაპაიძემ (ბათუმი, ბსუ), ლექსო დორეულმა (თბილისი, თავისუფალი უნივერსიტეტი), დათო გაბუნიამ (თბილისი, ილიაუნი), ლევან ბერძენიშვილმა (თბილისი, ილიაუნი), დიანა ანფიმიადმა (თბილისი, ჯიპა) და ინგა ჟღენტმა (თბილისი, კავკასიის უნივერსიტეტი).

25-27 ივლისს, ბათუმის შოთა რუსთაველის სახელმწიფო უნივერსიტეტში (#328 აუდიტორია) „ერასმუს+“-ის პროექტის HEIN 4 (609939-EPP-1-2019-1-BEEPPKA2-CBHE- JP) ფარგლებში, ბსუ-ს აკადემიური პერსონალისთვის, პარტნიორი ორგანიზაციების, დამსაქმებლებისა და სტუდენტებისთვის საქართველოს ინოვაციებისა და ტექნოლოგიების სააგენტოს დონორებთან ურთიერთობის და საერთაშორისო ურთიერთობების დეპარტამენტის უფროსი ანა ვაშაყმაძე და სააგენტოს თავმჯდომარის თანაშემწე მაია ლაბაძე ვორქშოპს ჩაატარებენ თემაზე: „ეკოსისტემები და ტექნოლოგიური მეწარმეობა მე-4 ინდუსტრიული რევოლუციის პირობებში“. ასევე გაიხსნება პროექტის ფარგლებში დაარსებული ინოვაციების ლაბორატორია (#207 აუდიტორია).

ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტზე ინოვაციების ლაბორატორია გაიხსნა. ლაბორატორია გახსნა და მის მნიშვნელობაზე ისაუბრა ბსუ-ს რექტორმა, პროფესორმა მერაბ ხალვაშმა. ინოვაციების ლაბორატორია ბსუ-ს სტუდენტებს დაეხმარება, მოამზადონ და განახორციელონ ინოვაციური პროექტები მრეწველობის და ბიზნესის სექტორისთვის, ასევე შესთავაზებს სხვადასხვა სამიზნე აუდიტორიას ორმხრივად სასარგებლო სერვისებს, მრეწველობის სექტორს - მოკლევადიან სასწავლო კურსებს, პერსონალის შესაძლებლობის გაძლიერებისთვის; სტუდენტებს - სხვადასხვა პროგრამულ პაკეტებს და სივრცეს პროექტების შემუშავებისა და მათი რეალიზაციისთვის.