ახალი ამბები

ბათუმის შოთა რუსთაველის სახელმწიფო უნივერსიტეტში პროფესიულ საგანმანათლებლო პროგრამებზე სასწავლო პროცესი დაიწყო. სტუდენტებს სწავლის დაწყება ბსუ-ს რექტორმა, პროფესორმა მერაბ ხალვაშმა, ადმინისტრაციის ხელმძღვანელმა მერაბ დიასამიძემ, პროფესიული პროგრამების ცენტრის დირექტორმა მადონა მიქელაძემ მიულოცეს და ის სიახლეები და შესაძლებლობები გააცნეს, რომელთაც უნივერსიტეტი მათ სთავაზობს. საზეიმო გახსნაზე ასევე სიტყვით გამოვიდნენ ბიბლიოთეკის დირექტორი ტარიელ ებრალიძე, დამსაქმებლები და კურსდამთავრებულები.

2007 წლის 7 ნოემბერს თბილისში გამართული საპროტესტო აქციის დარბევა ბათუმის შოთა რუსთაველის სახელმწიფო უნივერსიტეტის სტუდენტებმა დაგმეს და 8 ნოემბერს აქციის მონაწილეებს სოლიდარობა გამოუცხადეს. ბსუ-ს ეზოში შეკრებილი ახალგაზრდები სპეცდანიშნულების რაზმმა ძალის გამოყენებით დაშალა. სპეცრაზმი უნივერსიტეტის შენობაში შეიჭრა, ლექციაზე მყოფი სტუდენტები და პროფესორ-მასწავლებლები დაარბია, ხელკეტებით ფიზიკურად გაუსწორდა და სასწავლო პროცესის მიმდინარეობისას აუდიტორიებში ცრემლსადენი გაზი გაუშვა. მიუხედავად იმისა, რომ ბათუმის შოთა რუსთაველის სახელმწიფო უნივერსიტეტმა რამდენჯერმე მიმართა შესაბამის სამსახურებს, საკითხი ჯერ კიდევ არ არის გამოძიებული და დამნაშავეები დასჯილი.

ბათუმის შოთა რუსთაველის სახელმწიფო უნივერსიტეტში ადმინისტრაციის ხელმძღვანელის არჩევნები ჩატარდა. კენჭისყრაში მონაწილეობის მისაღებად საარჩევნო კომისიას რეგისტრაციისათვის ერთმა კანდიდატმა - მერაბ დიასამიძემ მიმართა. მერაბ დიასამიძე ბსუ-ს სასწავლო პროცესის დეპარტამენტის ხელმძღვანელი და ტურიზმის ფაკულტეტის ასოცირებული პროფესორია. ადმინისტრაციის ხელმძღვანელობის კანდიდატმა ბსუ-ს აკადემიურ და წარმომადგენლობით საბჭოებს სამოქმედო გეგმა წარუდგინა და დასმულ შეკითხვებს უპასუხა.

ბსუ-ში ბათუმის შოთა რუსთაველის სახელმწიფო უნივერსიტეტის ემერიტუს-პროფესორის, ცნობილი ენათმეცნიერის, ნიკო ბერძენიშვილის ინსტიტუტის მთავარი მეცნიერ თანამშრომლის შუშანა ფუტკარაძის დაბადებიდან 80 და სამეცნიერო-პედაგოგიური მოღვაწეობიდან 55 წლის იუბილე აღინიშნა. ბსუ-ს რექტორმა, პროფესორმა მერაბ ხალვაშმა ცნობილ მეცნიერს იუბილე მიულოცა, მის ღვაწლზე ისაუბრა და სამეცნიერო და საგანმანთლებლო საქმიანობაში შეტანილი განსაკუთრებული წვლილისთვის უნივერსიტეტის საპატიო ჯილდო - შოთა რუსთაველის მედალი გადასცა.

ავსტრიის ელჩი საქართველოში თომას მიულმანი ბსუ-ს რექტორს მერაბ ხალვაშს შეხვდა. შეხვედრაზე რექტორმა დიპლომატიური კორპუსის წარმომადგენელს საგანმანათლებლო პროგრამები წარუდგინა და ბათუმის შოთა რუსთაველის სახელმწიფო უნივერსიტეტსა და ავსტრიის უნივერსიტეტებს შორის უკვე არსებულ თანამშრომლობასა და მიმდინარე ერთობლივ გაცვლით პროგრამებზე ისაუბრა. დაიგეგმა სამომავლო თანამშრომლობის გაფართოება და ერთობლივი პროექტების განხორციელება.
ვიზიტის ფარგლებში ავსტრიის ელჩი საქართველოში თომას მიულმანი სტუდენტებს, პროფესორ-მასწავლებლებს და სკოლის მოსწავლეებს შეხვდა. დიპლომატმა ისაუბრა პაკო სვიმონიშვილის შესახებ, რომელმაც თარგმნა ავსტრიელი პოეტის, როზე აუსლენდერის ლექსები. შედგა ფილმის ჩვენება როზე აუსლენდერის შემოქმედებასა და მისი ქართული თარგმანების შესახებ.