ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის უფროსმა მეცნიერმა თანამშრომელმა ნაილა ჩელებაძემ 4-5 მაისს ქედის მუნციპალიტეტის მცხოვრებთათვის საჯარო ლექცია ჩაატარა თემაზე: „ქედის მუნციპალიტეტის ეკო-ტურისტული მარშრუტები“. ღონისძიება პროექტის „მდგრადი შემოსავლის მიღების უზრუნველყოფა აჭარის ეროვნული პარკების მხარდამჭერი ზონების თემებისთვის ეკო-ტურიზმის განვითარების გზით” ფარგლებში ჩატარდა. პროგრამა მიზნად ისახავდა აჭარის ეროვნული პარკებთან ახლოს მაცხოვრებელ თემების სოციალურ-ეკონომიკური განვითარების შესაძლებლობების მხარდაჭერას და დაგეგმვისა და გადაწყვეტილებების მიღების პროცესში ადგილობრივი მოსახლეობის მონაწილეობის სტიმულირებას.

ბათუმის შოთა რუსთაველის სახელმწიფო უნივერსიტეტში სახალხო დღესასწაულის „ბათუმობის“ ფარგლებში X საიუბილეო საერთაშორისო სამეცნიერო კონფერენცია „ბათუმი - წარსული და თანამედროვეობა“ გაიხსნა. ორი დღის განმავლობაში სამი სექციის მიმართულებით 65-მდე ქართველი, ებრაელი, უკრაინელი და სომეხი მკვლევარი სამეცნიერო მოხსენებებს წარმოადგენს ქალაქის ისტორიის, თანამედროვეობის, არქეოლოგიის, განათლების, ლიტერატურის, ეთნოგრაფიის, ტურიზმისა და ურბანული განვითარების საკითხებზე.

ძეგლებისა და ისტორიული ადგილების საერთაშორისო დღისადმი მიძღვნილ II საერთაშორისო სემინარში „შავიზღვისპირეთის კულტურული მემკვიდრეობის ძეგლების რეალური მდგომარეობა, პრობლემები და პერსპექტივები“ მონაწილეობა მიიღეს და მოხსენებები წარადგინეს ბსუ-ს ნიკო ბერძენიშვილის მეცნიერ-თანამშრომლებმა მაია ჭიჭილეიშვილმა, რუსლან ბარამიძემ და ჯემალ მიქელაძემ. კულტურული მემკვიდრეობის დაცვაში შეტანილი წვლილისათვის ქალბატონ მაია ჭიჭილეიშვილს გადაეცა მადლობის სიგელი. ღონისძიება აჭარის კულტურული მემკვიდრეობის დაცვის სააგენტოს ორგანიზებით გაიმართა.

2-8 თებერვალს Erasmus+ის ინსტიტუციური განვითარების პროექტის „მედიაცია: ტრენინგი და საზოგადოების ტრანსფორმაცია (MEDIATS)“ ფარგლებში ნიდერლანდებში, ქალაქ ბრედაში გამართულ შეხვედრაში მონაწილეობა მიიღო ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის უფროსმა მეცნიერ-თანამშრომელმა რუსლან ბარამიძემ. გაცნობითი ხასიათის შეხვედრებში პროექტის მონაწილეებმა ნიდერლანდებიდან, ლატვიიდან, ესპანეთიდან, უკრაინიდან, აზერბაიჯანიდან და საქართველოდან მედიაციის სამაგისტრო პროგრამის განხორციელებისა და მედიაციის ფედერაციის შექმნის დეტალები განიხილეს. ღონისძიება ნიდერლანდების ბიზნეს აკადემიის ორგანიზებით მოეწყო.

ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის უფროსმა მეცნიერ-თანამშრომელმა რუსლან ბარამიძემ მონაწილეობა მიიღო 10-18 დეკემბერს, თბილისში გამართულ ზამთრის სკოლაში. რუსლან ბარამიძემ ქართველ, სომეხ, აზერბაიჯანელ და რუს მკვლევარებს ნაშრომი გააცნო თემაზე: “შეიძლება თუ არა მუსლიმი იყოს ქართველი”. ზამთრის სკოლა ორგანიზებული იყო CISR e.V. Berlin პროექტის "«Memory Guides: კონფლიქტების მშვიდობიანი ტრანსფორმაციის საინფორმაციო რესურსები” ფარგლებში. პროექტი ხორციელდება გერმანიის საგარეოს საქმეთა სამინსიტროს ფინანსური მხარდაჭერით.