6-15 სექტემბერს, ნიკო ბერძენიშვილის ინსტიტუტის დირექტორი, მთავრი მეცნიერი თანამშრომელი როინ მალაყმაძე, ეთნოლოგიისა და სოციოლოგიური კვლევის განყოფილების უფროსი მეცნიერი თანამშრომლები: თამილა ლომთათიძე, ნაილა ჩელებაძე, ფოლკლორის დიალექტოლოგიისა და ემიგრანტული ლიტერატურის კვლევის განყოფილების მთავრი მეცნიერი თანამშრომელი ელზა ფუტკარაძე, ისტორიისა და არქეოლოგიის განყოფილების უფროსი მეცნიერი თანამშრომელი მაია ჭიჭილეიშვილი მიზნობრივ სამეცნიერო კვლევითი პროექტის ფარგლებში სამეცნიერო ექსპედიციაში იმყოფებოდნენ თურქეთის რესპუბლიკაში. მკვლევართა ჯგუფი მუშაობს თემაზე „დევსქელის ხეობის ეთნოკულტურული შესწავლა“ (სამეცნიერო ხელმძღვანელი როინ მალაყმაძე).

ცნობილი მეცნიერის, საქართველოს მეცნიერებათა ეროვნული აკადემიის წევრ-კორესპოდენტის, პროფესორ გურამ ლორთქიფანიძის 80 წლის იუბილესადმი მიძღვნილი სხდომა გაიმართა ბათუმის შოთა რუსთაველის სახელმწიფო უნივერსიტეტში. მკვლევარს იუბილე მიულოცეს, წარმატებები უსურვეს და მის ღვაწლზე ისაუბრეს უნივერსიტეტის რექტორმა მერაბ ხალვაშმა, საქართველოს მეცნიერებათა ეროვნული აკადემიის ვიცე-პრეზიდენტმა, აკადემიკოსმა როინ მეტრეველმა, ბსუ-ს ემერიტუს პროფესორმა ამირან კახიძემ, ნიკო ბერძენიშვილის ინსტიტუტის დირექტორმა როინ მალაყმაძემ, საქართველოს მეცნიერებათა ეროვნული აკადემიის წევრ-კორესპოდენტმა, აჭარის არ რეგიონული სამეცნიერო ცენტრის ხელმძღვანელმა ვანო პაპუნიძემ, საქართველოს სხვადასხვა უმაღლესი საგანმანათლებლო დაწესებულებების პროფესორებმა, მკვლევარებმა და საზოგადოების წარმომადგენლებმა. საიუბილეო სხდომა ბსუ ნიკო ბერძენიშვილის ინსტიტუტისა და ქალაქ ბათუმის მერიის ორგანიზებით გაიმართა.

ბათუმის შოთა რუსთაველის სახელმწიფო უნივერსიტეტის 2018 წლის მიზნობრივი სამეცნიერო-კვლევითი პროექტის ფარგლებში ნიკო ბერძენიშვილის ინსტიტუტის სამეცნიერო ჯგუფი როინ მალაყმაძის, ჯემალ მიქელაძისა და სულხან მამულაძის შემადგენლობით კვლევითი ვიზიტით 24-30 აგვისტოს იმყოფებოდა ორად გაყოფილი (საქართველოსა და თურქეთის რესპუბლიკაში მოქცეული) მაჭახლის ხეობის სოფლებში. ექსპედიციის პერიოდში გამოვლინდა სამეცნიერო წრეებისათვის დღემდე უცნობი ეთნოლოგიური, ტოპონიმიკური და ფოლკლორული მასალები, ასევე აღმოჩენილ იქნა ახალი არქეოლოგიური ძეგლები, მათ შორის საფორტიფიკაციო, საგზაო და საეკლესიო ნაგებობანი, შუა საუკუნეების ნაქალაქარები და მეგალითური კულტურის ნაშთები.

სახალხო დღესასწაულის „ბათუმობის“ ეგიდით, ბათუმის შოთა რუსთაველის სახელმწიფო უნივერსიტეტში IX საერთაშორისო სამეცნიერო კონფერენცია „ბათუმი - წარსული და თანამედროვეობა“ გაიხსნა. ორი დღის განმავლობაში 50-მდე ქართველი და უცხოელი მეცნიერი სამეცნიერო მოხსენებებს წარმოადგენს ქალაქის ისტორიის, თანამედროვეობის, არქეოლოგიის, განათლების, ლიტერატურის, ეთნოგრაფიის, ტურიზმისა და ურბანული განვითარების საკითხებზე. ღონისძიების ფარგლებში საქართველოს მეცნიერებათა ეროვნული აკადემიის წევრ-კორესპოდენტის, პროფესორ გურამ ლორთქიფანძის 80 წლისადმი მიძღვნილი საიუბილეო სხდომა გაიმართება. საერთაშორისო სამეცნიერო კონფერენცია ბსუ-ს ნიკო ბერძენიშვილის ინსტიტუტისა და ქალაქ ბათუმის მერიის ორგანიზებით ტარდება.

29-30 ივლისს, ადამიანის უფლებების სწავლებისა და მონიტორინგის ცენტრმა (EMC) ლოპოტაში გაიმართა ტრენინგი მედიის წარმომადგენლებისათვის. ტრენინგის მონაწილეებმა განიხილეს არადომინანტი რელიგიური და ეთნიკური ჯგუფების უფლებრივ მდგომარეობა საქართველოში და ამ მხრივ არსებული სახელმწიფო პოლიტიკის ძირითადი გამოწვევები. არადომინანტი რელიგიური და ეთნიკური ჯგუფების შესახებ არსებული სასწავლო და სამეცნიერო პრაქტიკების შესახებ მოხსენება წაიკითხა ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის უფროსმა მეცნიერ-თანამშრომელმა რუსლან ბარამიძემ.