19 ივნისიდან 4 ივლისის ჩათვლით ნიკო ბერძენიშვილის ინსტიტუტის დირექტორი, მთავარი მეცნიერი თანამშრომელი როინ მალაყმაძე, ფოლკლორის, დიალექტოლოგიისა და ემიგრანტული ლიტერატურის კვლევის განყოფილების უფროსი, მთავარი მეცნიერი თანამშრომელი შუშანა ფუტკარაძე და სპეციალისტი შორენა ფუტკარაძე სამეცნიერო მივლინებით იმყოფებოდა თურქეთში, სტამბოლის ქართულ სავანეში სამუშაოდ. მუშაობის პერიოდში დამუშავდა სავანის არქივის მასალები და ბიბლიოთეკის გარკვეული ნაწილი. მკვლევარებმა დაამუშავეს 358 არქივის საქმე და 156 ქართულ ენოვანი წიგნი და დასრულდა მნიშვნელოვანი საარქივო მასალების ფოტოგადაღება, რომლის ელექტრონული ვერსიები შესწავლის შემდეგ განთავსდება ინსტიტუტის არქივში.

ბათუმის შოთა რუსთველის სახელმწიფო უნივერსიტეტში საქართველოს დამოუკიდებლობის აღდგენის 100 წლისადმი მიძღვნილი X საერთაშორისო სამეცნიერო კონფერენცია გაიხსნა თემაზე: „ჩვენი სულიერების ბალავარი“. ორდღიან საერთაშორისო სესიაში 80 ქართველი, რუმინელი, პოლონელი, რუსი, თურქი, ჩინელი მეცნიერი მოხსენებებს წარმოადგენს ქართული მართლმადიდებლური ეკლესიის ისტორიაზე, ქრისტიანული სარწმუნოების წიაღში განვითარებულ ლიტერატურაზე, კულტურასა და ხელოვნებაზე, ეთნიკურ და რელიგიურ ტოლერანტობაზე, კულტურათა დიალოგზე, სწავლებასა და აღზრდაზე.

ნიკო ბერძენიშვილის ინსტიტუტის ფოლკლორის, დიალექტოლოგიისა და ემიგრანტული ლიტერატურის კვლევის განყოფილების უფროსმა მეცნიერ თანამშრომელმა ნარგიზ ახვლედიანმა სამეცნიერო სემინარი ჩაატარა თემაზე: „ტოპონიმთა ექსტრალინგვისტური კვლევისათვის ხელვაჩაურის მუნიციპალიტეტში“. მკვლევარმა განიხილა ტოპონიმიასთან დაკავშირებული სიახლეები და აქტუალური საკითხები.ტოპონიმიას „დედამიწის ენას“ უწოდებენ, რომელიც მასშია დაუნჯებული. ყოველი ტოპონიმი ერთდროულად გარდასულ დღეთა ნაყოფიცაა და მემატიანეც.

ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის დირექტორი როინ მალაყმაძე, ფოლკლორის, დიალექტოლოგიისა და ემიგრანტული ლიტერატურის კვლევის განყოფილების უფროსი შუშანა ფუტკარაძე და სპეციალისტი შორენა ფუტკარაძე 15-19 აპრილს დაესწრნენ თურქეთში კავკასიის (ყარსის) უნივერსიტეტის დაარსების 25 წლისადმი მიძღვნილ ღონისძიებებს. მკვლევარებმა მონაწილეობა მიიღეს „კავკასიის უნივერსიტეტების სამეცნიერო-კულტურული ფესტივალში“. ვიზიტის ფარგლებში შეხვედრა გაიმართა უნივერსიტეტის რექტორთან, ისტორიისა და ქართული ფილოლოგიის მიმართულების აკადემიურ პერსონალთან და სტუდენტებთან. მხარეები სამომავლო გეგმებზე შეთანხმდნენ და ხელი მოეწერა კავკასიის უნივერსიტეტთან „მევლანას“ გაცვლითი პროგრამის თანამშრომლობის მემორანდუმს.

სასტუმრო „რედისონში“ ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის სამეცნიერო-პოპულარული და საზოგადოებრივი ჟურნალის - „მაჭახელი“ საიუბილეო ნომრის პრეზენტაცია, ჟურნალისტ გოდერძი შარაშიას დოკუმენტური ფილმის - „მაჭახელას ქართველები“ ჩვენება და ზემო მაჭახელში (თურქეთი) გადაღებული ფოტოების გამოფენა გაიმართა. ჟურნალის მეათე ნომერი ეძღვნება მაჭახელას ეროვნული პარკის საქმიანობას, ხეობის ისტორიისა და ეთნოგრაფიის აქტუალური საკითხებს, არსებულ სიახლეებსა და საზოგადოებისათვის სხვა მნიშვნელოვან პრობლემებს. ღონისძიება გაეროს განვითარების პროგრამის (UNDP) და გლობალური გარემოსდაცვითი ფონდის (GEF) მხარდაჭერით პროექტის - „აჭარის დაცული ტერიტორიების გაფართოება და მართვის დახვეწა“ ფარგლებში ჩატარდა.