ფიტოპათოლოგიისა და ბიომრავალფეროვნების ინსტიტუტში ჩატარდა სემინარი თემაზე: „აზიური ფაროსანა საქართველოში“. ინსტიტუტის დირექტორმა, მთავარმა მეცნიერ თანამშრომელმა გურამ მემარნემ ისაუბრა საქართველოში მასიურად გავრცელებულ, განსაკუთრებული საფრთხის მომცველი მავნებლის - აზიური ფაროსანას შესახებ. ყურადღება გაამახვილა მისი გავრცელების არეალების, ბიოლოგიის შესახებ, მისგან მიყენებულ ზარალზე და ბრძოლის ბიოლოგიურ და ქიმიურ საშუალებებზე.

ფიტოპათოლოგიისა და ბიომრავალფეროვნების ინსტიტუტის მეცნიერმა თანამშრომელმა ნინო ქედელიძემ სემინარი ჩაატარა თემაზე: „ზოგიერთი სუბტროპიკული კულტურის სამედიცინო პერსპექტივები“. მომხსენებელმა სუბტროპიკული კულტურების მნიშვნელობაზე ისაუბრა. სუბტროპიკული კულტურები საქართველოში (უფრო მეტად ქვეყნის დასავლეთ რაიონებში) ფართოდ არის გავრცელებული. მათ ჩვენი რეგიონის ტენიან სუბტ-როპიკებში სრულყოფილად გაიარეს ადაპტაციის პროცესი, რაც იმას ნიშნავს, რომ ისინი, როგორც ფენოტიპური (მცენარის ვარჯი, აგებულება, ჰაბიტუსი), ისე ბიოქიმიური (ნაყოფი, ფოთოლი, ყვავილი) მაჩვენებლებით თითქმის არაფრით ჩამოუვარდება თავიანთ სამშობლოში არსებულ იგივე სახეობის მცენარეებს.

ფიტოპათოლოგიისა და ბიომრავალფეროვნების ინსტიტუტის მთავარმა მეცნიერმა თანამშრომელმა იზოლდა მაჭუტაძემ სემინარი ჩაატარა თემაზე: „კოლხეთის ტორფნარები: გლობალური ღირებულების მქონე საგანძური, სფაგნუმიანი ტორფნარების მნიშვნელობა ეროვნულ და საერთაშორისო დონეზე“. კოლხეთის ტორფნარებისა და წყლის ეკოსისტემების კონსერვაციის განყოფილების ხელმძღვანელმა ისაუბრა კოლხეთის სფაგნუმიანი ტორფნარების უნიკალურობაზე. 1997 წლიდან კოლხეთის სფაგნუმიან ტორფნარებს იცავს რამსარის კონვენცია.

ფიტოპათოლოგიისა და ბიომრავალფეროვნების ინსტიტუტის გამძლეობის გენეტიკის განყოფილების ხელმძღვანელმა ზოია სიხარულიძემ სემინარი ჩაატარა თემაზე: „მარცვლოვანი კულტურების კვლევის თანამედროვე მდგომარეობა“. მომხსენებელმა კვლევის შედეგებზე ისაუბრა და ხაზი გაუსვა ქვეყნის სოციალურ-ეკონომიკური სტაბილურობის მნიშვნელოვან პირობას - სასურსათო უზრუნველყოფას. მარცვლოვანი კულტურების წარმოება ქვეყნის ეკონომიკური დამოუკიდებლობის უმნიშვნელოვანესი პირობაა. მარცვლეულ კულტურებს შორის ხორბალი მილიონობით ადამიანებისთვის უპირველეს სასიცოცხლო საკვებ კულტურას და გლობალური სასურსათო უსაფრთხოების საფუძველს წარმოადგენს. მცენარეთა დაავადებების კვლევა პირდაპირ კავშირშია სასურსათო უსაფრთხოებასთან, რადგან მათგან გამოწვეული მოსავლის დანაკარგები რაოდენობრივი და ხარისხობრივი თვალსაზრისით დღემდე საკმაოდ სერიოზულია.

გამძლეობის გენეტიკის განყოფილების უფროსმა მეცნიერმა თანამშრომელმა ცისანა ცეცხლაძემ ფიტოპათოლოგიისა და ბიომრავალფეროვნების ინსტიტუტში სემინარი ჩაატარა თემაზე: „მნიშვნელოვანი ბოსტნეული კულტურების ეკონომიკურად მნიშვნელოვანი მავნებელ-დაავადებები.“ მომხსენებელმა ხაზი გაუსვა მებოსტნეობის, როგორც სასოფლო-სამეურნეო მეცნიერების ერთ-ერთ დარგის უდიდეს მნიშვნელობაზე ჩვენი ქვეყნის სოფლის მეურნეობის განვითარებისთვის. მსოფლიო სორტიმენტში ცნობილი 150-მდე სახეობის ბოსტნეული კულტურიდან თანამედროვე მონაცემებით, საქართველოში ამჟამად, 70-ზე მეტი სახეობის ბოსტნეული მოჰყავთ, ერთ სულ მოსახლეზე მათი მოხმარების საშუალო წლიური ნორმა 120-180კგ-ს შეადგენს.