ფიტოპათოლოგიისა და ბიომრავალფეროვნების ინსტიტუტში უფროსმა მეცნიერ თანამშრომელმა სოსო მეფარიშვილმა სემინარი ჩაატარა თემაზე: „Fusarium-ის გვარის სოკოები“. მკვლევარმა აუდიტორიას გააცნო აღნიშნული გვარის სოკოებით გამოწვეული განსაკუთრებული საფრთხეები. ფუზარიუმები (Fusarium) - მიეკუთვნება ანამორფულ (უსრულო) გვარის ობიან სოკოებს. ამ გვარის პათოგენი სოკოების წარმომადგენლებს არსებითი მნიშვნელობა გააჩნიათ, დიდ ზიანს აყენებენ სახალხო მეურნეობას, მათ შეიძლება გამოიწვიონ დაავადებები და ტოქსიკოზი როგორც მცენარეებსა და ცხოველებში, ასევე ადამიანებშიც. დაავადება მცენარეებში იწვევეს ფესვების სიდამპლეს, ჭკნობას (ტრაქეომიკოზური ჭკნობა), თესლისა და ნაყოფების დაზიანებას.

ფიტოპათოლოგიისა და ბიომრავალფეროვნების ინსტიტუტში ჩატარდა სემინარი თემაზე: „ჯანმრთელი მცენარეები - ჯანმრთელი ხალხი. ყურადღება, მცენარეთა პათოგენები!!!“ სემინარს უძღვებოდა მთავარი მეცნიერი თანამშრომელი გალინა მეფარიშვილი. მკვლევარმა ისაუბრა სოკოებისა და მცენარეების კავშირზე, რომელიც უხსოვარი დროიდან კარგად არის ცნობილი, მაგრამ რაც შეეხება ფიტოპათოგენური სოკოებისა და ადამიანის ურთიერთდამოკიდებულებას, ნაკლებად არის ცნობილი, თუმცა, პირველი ფიტოპათოგენური სოკო, რომელმაც გამოიწვია ადამიანის დაავადება, იყო მარცვლოვანი კულტურების დაავადების - ჭვავის რქის გამომწვევი პათოგენი. მე-20 საუკუნის 30-40-იან წლებში ფიტოპათოგენურ სოკოებს, როგორც მიკოტოქსიკოზების წარმოშობის წყაროს, განსაკუთრებით მიაქციეს ყურადღება. დღეისათვის უკვე ცნობილია, რომ სოკოვან პათოგენებს გვარებიდან Fusarium, Alternaria, Aspergillus, Cladosporium და სხვა, შეუძლიათ გამოიწვიონ არა მარტო მცენარეების დაავადებები, არამედ დარეგისტრირებული არიან როგორც ადამიანის დაავადებების გამომწვევი სოკოვანი პათოგენებიც. მკვლევარმა აუდიტორიას გააცნო ის დაავადებები, რაც ადამიანში აღნიშნული და სხვა ფიტოპათოგენებით შეიძლება იყოს გამოწვეული.

ფიტოპათოლოგიისა და ბიომრავალფეროვნების ინსტიტუტში ჩატარდა სემინარი თემაზე: „მიკროკლიმატი და მისი მნიშვნელობა სოფლის მეურნეობაში”. სემინარს უძღვებოდა მეცნიერი თანამშრომელი ნანა აფციაური. მკვლევარმა ისაუბრა ეკოლოგიური პირობების მიმართ მცენარეთა, განსაკუთრებით სასოფლო-სამეურნეო კულტურების მგრძნობიარობაზე; ტემპერატურისა და სხვა კლიმატური პირობების აღრიცხვის თანამედროვე მეთოდებზე; ფენოლოგიური დაკვირვების მნიშვნელობაზე; ფიტოპათოგენური დაავადებებისა და მავნებლების განვითარების ინტენსივობის დამოკიდებულებაზე გარემო პირობებთან. მკვლევარმა აღნიშნა, რომ წაყინვების, სეტყვის, თქეშის, ზამთარში ძლიერი ყინვების, ლიპყინულის და ზოგიერთი სხვა მოვლენის კონკრეტულ ადგილზე დაფიქსირება და მონაცემების გათვალისწინება განსაკუთრებით მნიშვნელოვანია სოფლის მეურნეობის მიმართულებით სამეცნიერო კვლევებისთვის.

ბათუმის შოთა რუსთაველის სახელმწიფო უნივერსიტეტში USAID/REAP-ის პროექტის ფარგლებში განხორციელებული პრაქტიკოსი აგრონომის გრძელვადიანი სასწავლო პროგრამის დახურვის ოფიციალური ცერემონია გაიმართა. USAID/REAP-ის პროექტმა, რეგიონულ უნივერსიტეტებთან თანამშრომლობით, 2017 წელს, წარმატებით განახორციელა გრძელვადიანი სასწავლო პროგრამა პრაქტიკოსი აგრონომებისთვის, რომელშიც ქვეყნის 11 რეგიონი იყო ჩართული. აღნიშნულ პროექტში, აჭარისა და გურიის მასშტაბით, კონკურსში გამარჯვების შედეგად, ტრენინგები განახორციელა ბათუმის შოთა რუსთაველის სახელობის სახელმწიფო უნივერსიტეტის ფიტოპათოლოგიის და ბიომრავალფეროვნების ინსტიტუტმა. ტრენერ-კონსულტანტებად შერჩეული იყვნენ ფიტოპათოლოგიისა და ბიომრავალფეროვნების ინსტიტუტის სამეცნიერო, ადმინისტრაციული და ტექნიკური პერსონალის წარმომადგენლები, ასევე, მოწვეული სპეციალისტები შესაბამისი ცოდნითა და საერთაშორისო პროგრამებში მონაწილეობის გამოცდილებით. სწავლებას ინსტიტუტიდან კოორდინაციას უწევდნენ გურამ მემარნე და ცისანა ცეცხლაძე.

ფიტოპათოლოგიისა და ბიომრავალფეროვნების ინსტიტუტში ჩატარდა სემინარი თემაზე; „ფიტოპათოგენური ბაქტერიების ფაგები და მათი პრაქტიკული მნიშვნელობა“. სემინარს უძღვებოდა ინსტიტუტის მეცნიერ-თანამშრომელი მაკა მურადაშვილი. მკვლევარმა სამეცნიერო პერსონალს საზოგადოებას გააცნო ფიტოპათოგენური ბაქტერიების არსი და ბიოლოგია. მომხსენებელმა ასევე ისაუბრა მათი გამოყენების საინტერესო შესაძლებლობებზე მედიცინაში, სოფლის მეურნეობაში, კვებით მრეწველობაში, გენურ ინჯინერიასა და ვეტერინარიაში.