იურიდიული ფაკულტეტის III კურსის სტუდენტები მოწვეულ სპეციალისტ დავით კეკენაძის ინიციატივით, აჭარის ავტონომიური რესპუბლიკის მთავრობის აპარატის იურიდიულ განყოფილებას ეწვივნენ. ახალგაზრდები ადმინისტრაციულ საჩივართან დაკავშირებით გამართულ ადმინისტრაციული წარმოების სხდომას დაესწრნენ. სტუდენტები ღონისძიების ფარგლებში ადმინისტრაციული წარმოების წესებსა და სპეციფიკას გაეცნენ. ინიციატივა მიზნად ისახავდა მომავალი სამართალდამცავების თეორიული ცოდნის გაღრმავებასა და პროფესიული უნარ-ჩვევების გამომუშავებას.

ბათუმის შოთა რუსთაველის სახელმწიფო უნივერსიტეტის იურიდიულ კლინიკას PILnet-ის კლინიკის ექსპერტი, დიდი ბრიტანეთის იორკის სამართლის სკოლის კლინიკის ხელმძღვანელი, პროფესორი რიჩარდ გრაიმსი ეწვია. ინგლისელმა ექსპერტმა ქართველ კოლეგებს გამოცდილება გაუზიარა და კლინიკის მუშაობასათან ერთად, მის სამომავლო პერსპექტივებს გაეცნო. სტუმარმა შეხვედრაზე ისაუბრა იურიდიული კლინიკის დადებითი როლზე სტუდენტების განვითარებასა და მათი პრაქტიკული ცოდნის გაღრმავებაში. ინტერაქტიული ხასიათის ღონისძიებაში იურიდიული კლინიკის სტუდენტებიც მონაწილეობდნენ. შეხვედრა კითხვა-პასუხის რეჟიმში წარიმართა და პროფესორმა რიჩარდ გრაიმსმა ახალგაზრდების შეკითხვებს უპასუხა.

ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის სტუდენტთა სამეცნიერო კლუბის წევრებს შეხვედრა გაიმართა. კლუბის თავმჯდომარემ, სამართალმცოდნეობის სპეციალობის მესამე კურსის სტუდენტმა ნიკა დუმბაძემ შეკრებილთ კლუბის მუშაობის შედეგები გააცნო. სამეცნიერო კლუბის მეცნიერ-ხელმძღვანელი, პროფესორი მურმან გორგოშაძე სტუდენტებს უნივერსიტეტის ბიბლიოთეკაში არსებულ ქართულენოვან, იურიდიული ხასიათის პერიოდულ გამოცემებზე ესაუბრა.

საქართველოს მთავარი პროკურატურის ოჯახში ძალადობის აღმოფხვრის საერთაშორისო დღისადმი მიძღვნილი კვირეულის ფარგლებში ბათუმის შოთა რუსთაველის სახელმწიფო უნივერსიტეტში სემინარი ჩატარდა. აჭარის ა.რ. უფროსმა პროკურორმა ვლადიმერ თურმანიძემ იურიდიული ფაკულტეტის სტუდენტებს ოჯახურ ძალადობაზე, არსებულ პრობლემებსა და მასთან დაკავშირებულ სამართლებრივ მხარეებზე ესაუბრა. კვირეული მთელ ქვეყნის მასშტაბით მიმდინარეობს და საზოგადოების ინფორმირებასთან ერთად, დანაშაულის პრევენციას ისახავს მიზნად.

სასამართლო საიმიტაციო დარბაზში გამართულ შეხვედრაზე იურიდიული ფაკულტეტის პროფესორ-მასწავლებლები და სტუდენტები სამართლის საბაკალავრო საგანმანათლებლო პროგრამას გაეცნენ. პროგრამის ხელმძღვანელმა ასოცირებულმა პროფესორმა ლევან ჯაყელმა პროგრამის ახალ მოთხოვნებზე, მის დარგობრივ მახასიათებლებზე, ეროვნულ საკვალიფიკაციო ჩარჩოზე, სტრუქტურასა და სასწავლო კურსების დინამიკაზე ისაუბრა.