შემოთავაზებული ნაშრომი წარმოადგენს შეკუმშული ღეროების მდგრადობის პრობლემის გადაჭრის ახლებურ მიდგომებს მასალის მუშაობის დრეკად-პლასტიკურ არეში.
ჩატარებული ანალიზი გვიჩვენებს, რომ შენობა-ნაგებობების-კოლონები, სამანქანათმშენებლო მოწყობილობების საყრდენები, ნავთობისა და გაზის საბადოების საბურღი ღეროები, და სხვ., შეიძლება დაექვემდებარონ მდგრადობის დაკარგვის- გამობურცვის მნიშვნელოვან რისკს.
ნაშრომის მიზანი იყო ისეთი მიდგომების შემუშავება, რომელთა საშუალებითაც მოხდებოდა შეკუმშული ელემენტების მდგრადობის განსაზღვრა-დაზუსტება მასალის მუშაობის დრეკად-პლასტიკურ არეში.

მედიცინის ნებისმიერ დარგში განსაკუთრებით მნიშვნელოვანია სწორი დიაგნოსტიკა და ადექვატური მკურნალობა, რაც აუცილებლად უნდა მოიცავდეს ავადმყოფისათვის და მისი ოჯახის წევრებისათვის დაავადების ბუნების და მისი შედეგების ახსნას.თუ კი არსებობს ეჭვი დაავადების მემკვიდრულ ხასიათზე დამატებით ჩნდება სხვა პრობლემაც: საჭიროა თუ არა ოჯახის წევრების ინფორმირება მათი დაავადების რისკის და მდგომარეობის კორექციის საშუალებებზე. თუ გენეტიკური დაავადების უნიკალური თვისება არის მისი განმეორების ტენდენცია ოჯახში, გენეტიკური კონსულტაციის ასევე უნიკალური ასპექტია ყურადღების კონცენტრირება არა მარტო ავადმყოფზე, არამედ მისი ოჯახის არსებულ და მომავალ წევრებზე. აღნიშნული მიმართულებით საკმაოდ ეფექტურად გამოიყენება პრენატალური ანუ დაბადებამდელი დიაგნოსტიკა. სემინარზე გაშუქდება შემდეგი საკითხები: გენეტიკური კონსულტაციები და მისი ტიპები; პრენატალური დიაგნოსტიკა; პრენატალური დიაგნოსტიკის ინვაზიური და არაინვაზიური ტესტირება; ციტოგენეტიკური კვლევის თავისებურებანი. სემინარზე საუბარი იქნება აღნიშნული მიმართულებით არსებულ მიღწევებზე, პერსპექტივებსა და გამოწვევებზე.

დამწერლობის გაჩენამ ზეპირი კულტურის ველი მკვეთრად შეავიწროვა, ხოლო თვით კულტურა ორ, მწიგნობრულ და ზეპირ, ნაწილად გაყო. ამის შემდეგ კულტურის ზეპირი ფორმები „ცხოვრობენ“ როგორც ცალკე, მწიგნობრობის გვერდით, ისე, გარკვეულწილად სახენაცვალი, მის შიგნით.
ადრექრისტიანულ ტრადიციას თავდაპირველად „ფოლკლორული“ ხასიათი ჰქონდა: მაცხოვრის შესახებ თხრობები „აითქვიფა“ იმ ჟანრებში, რომლებიც ადრეულ იუდაიზმსა და ელინურ ზეპირპოეტურ ტრადიციას გააჩნდა. უძველესი მემატიანეები ასვე იყენებდნენ ფოლკლორულ ტექსტებს-ზეპირ გენეალოგიას, მითოლოგიურ და ისტორიული ხასიათის თხრობებს. მოხსენებაში აღნიშნულ კონტექსტში განხილულია ქართული ქრისტიანული ლიტერატურის, საისტორიო მწერლობისა და „ვეფხისტყაოსნის“ საკითხი.

თანამედროვე პირობებში ნიადაგური რესურსის რაციონალური გამოყენება-დაცვა მთელ მსოფლიოში ძალზე მწვავე საკითხად იქცა. არსებულ ფონზე გეოგრაფიის დეპარტამენტის ფიზიკური გეოგრაფიის მაგისტრებთან ერთად, ნიადაგების მორფოლოგიურ - გენეზისურ ნიშან-თვისებების შეფასების მეთოდებით ვაწარმოეთ აჭარის სხვადასხვა მუნიციპალიტეტთა ტერიტორიებზე საველე კვლევები, რომლის ძირითად მიზანს წარმოადგენდა აჭარის რეგიონის შიგა მთიან ზონაში, მიმდინარე პერიოდში, ნიადაგების გეოგრაფიისა და გენეზისური თავისებურებების შესწავლა.

ტაოში ადრეული პერიოდის ქრისტიანული ეკლესიის ცხოვრებაზე მოგვითხრობს საკითხავ-საგალობელთა ციკლი, რომელიც ორ ძმას – დავითს და ტირიჭანს ეძღვნება.
„ათონის მრავალთავში“ Ath. 8 (ცაგ. № 57, X ს.) შეტანილი ჰაგიოგრაფიული ტექსტის „წმიდათა ყრმათა ორთა ძმათა დავითისი და ტირიჭანისი, საკითხავის“ (302v-307r) გარდა, დავითსა და ტირიჭანს ეძღვნება ჰიმნოგრაფიული ციკლი, რომელიც სხვადასხვა შედგენილობითაა წარმოდგენილი Jer. Geo. 42, H-1710, Ven. 2 და Sin. Geo. O. 92 ხელნაწერებში.