საჯარო სამართლის საერთაშორისო საზოგადოება – ICON•S საქართველო, ბათუმის შოთა რუსთაველის სახელმწიფო უნივერსიტეტთან პარტნიორობით, დაინტერესებულ პირებს იწვევს პირველ ყოველწლიურ კონფერენციაში მონაწილეობის მისაღებად. ყველა განაცხადის წარდგენა უნდა განხორციელდეს 2023 წლის 31 მარტამდე ამ გვერდის ბოლოში მოცემული სარეგისტრაციო ფორმის მეშვეობით. გთხოვთ, ჩამოტვირთოთ და გაეცნოთ კონფერენციაში მონაწილეობის პირობებს (PDF).2023 წლის კონფერენციასთან დაკავშირებით ნებისმიერი შეკითხვისთვის გთხოვთ დაგვიკავშირდეთ ელექტრონული ფოსტით: info@icon-society.ge მალხაზ ნაკაშიძე, მაია კოპალეიშვილი - ICON•S საქართველოს თანათავმჯდომარეები.

ბათუმის შოთა რუსთაველის სახელმწიფო უნივერსიტეტში სამართლის საერთაშორისო საზოგადოების, ICON•S საქართველოს პირველი ყოველწლიური სამეცნიერო კონფერენცია „თანამედროვე საჯარო სამართლის გამოწვევები" დასრულდა. ორდღიან კონფერენციაში 100-ზე მეტმა მომხსენებელმა ქართული და უცხოური უნივერსიტეტიდან მოხსენებები წარმოადგინეს და მონაწილეობა მიიღეს 4 პლენარულ სესიასა და 24 თემატურ პანელურ სესიაში. კონფერენციის ფარგლებში მოეწყო წიგნის პრეზენტაცია და წიგნების გამოფენა. სესიის დასრულების შემდეგ ICON•S საქართველოს თანათავმჯდომარემ, ევროკავშირის საკონსტიტუციო სამართლის ჟან მონეს კათედრის ხელმძღვანელმა, ბსუ-ს პროფესორმა მალხაზ ნაკაშიძემ კონფერენციის მუშაობა შეაჯამა, სამართლის საერთაშორისო საზოგადოების, ICON•S საქართველოს მიღწევებზე ისაუბრა და მონაწილეებს სერტიფიკატები გადასცა.

იურიდიული ფაკულტეტის 30 წლის იუბილისადმი მიძღვნილი საჯარო სამართლის საერთაშორისო საზოგადოების (ICON•S საქართველოს) პირველი ყოველწლიური სამეცნიერო კონფერენცია „თანამედროვე საჯარო სამართლის გამოწვევები" იმართება ბათუმის შოთა რუსთველის სახელმწიფო უნივერსიტეტში. კონფერენცია გახსნეს და მონაწილეებს მიესალმნენ ბსუ-ს იურიდიული და სოციალურ მეცნიერებათა ფაკულტეტის დეკანი, პროფესორი ლევან ჯაყელი, ICON•S საქართველოს თანათავმჯდომარე, ევროკავშირის საკონსტიტუციო სამართლის ჟან მონეს კათედრის ხელმძღვანელი, ბსუ-ს პროფესორი მალხაზ ნაკაშიძე, USAID სამართლის უზენაესობის პროგრამის ხელმძღვანელი გიორგი ჩხეიძე, თსუ-ს პროფესორი გიორგი კვერენჩხილაძე და ბსუ-ს სამართლის და საჯარო მმართველობის დეპარტამენტის ხელმძღვანელი ასოცირებული პროფესორი ომარ ფარტენაძე.

ბათუმის შოთა რუსთველის სახელმწიფო უნივერსიტეტში იურიდიული ფაკულტეტის 30 წლის იუბილე საზეიმოდ აღინიშნა. იურიდიული და სოციალურ მეცნიერებათა ფაკულტეტის დეკანმა ლევან ჯაყელმა ღონისძიებაზე ფაკულტეტის მიღწევებსა და ისტორიაზე ისაუბრა. ბსუ-ს რექტორმა, პროფესორმა მერაბ ხალვაშმა ფაკულტეტს იუბილე მიულოცა და იურიდიული მიმართულების განვითარებაში შეტანილი განსაკუთრებული წვლილისათვის უნივერსიტეტის საპატიო ჯილდო - შოთა რუსთველის სახელობის მედალი გადასცა. ფაკულტეტს საიუბილეო თარიღი მიულოცეს, წარმატებები უსურვეს და სამახსოვრო საჩუქრები გადასცეს აჭარის ა.რ. უმაღლესი საბჭოს თავმჯდომარემ დავით გაბაიძემ, აჭარის ა.რ. განათლების, კულტურისა და სპორტის მინისტრმა მაია ხაჯიშვილმა, კურსდამთავრებულებმა, სხვადასხვა უმაღლესი საგანმანათლებლო დაწესებულებების, ბიზნეს სექტორისა და საზოგადოების წარმომადგენლებმა, პროფესორ-მასწავლებლებმა და სტუდენტებმა.

ნოტარიუსმა მარინე სიხარულიძემ ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის სტუდენტებისათვის საჯარო ლექცია წაიკითხა თემაზე: „პროფესია ნოტარიუსი“. მომხსენებელმა ლექციაზე ახალგაზრდებს გააცნო ისეთი მნიშვნელოვანი საკითხები, როგორიცაა: როგორ გავხდეთ ნოტარიუსი, სტაჟირება, როგორც ერთ-ერთი აუცილებელი ეტაპი პროფესიის დასაუფლებლად; ნოტარიუსის თანამდებობაზე დანიშვნის წესი. ღონისძიება საქართველოს ნოტარიუსთა პალატის ორგანიზებით გაიმართა.