ბათუმის შოთა რუსთაველის სახელმწიფო უნივერსიტეტი მერვედ მასპინძლობს ბათუმის საზაფხულო უნივერსიტეტს საერთაშორისო უსაფრთხოების და გლობალური ბირთვული გაუვრცელებლობის საკითხებზე. ინტენსიური სამდღიანი სასწავლო კურსის თემებს გლობალური უსაფრთხოების, საგარეო პოლიტიკის და ბირთვული გაუვრცელებლობის შესახებ ქართველი, შვედი, ჰოლანდიელი, ტაივანელი, უკრაინელი და ინგლისელი სწავლულები და ექსპერტები წარუძღვებიან. საზაფხულო უნივერსიტეტი მიზნად ისახავს უნივერსიტეტების შესაბამისი ფაკულტეტების პროფესორებსა და ექსპერტებს შორის კომპეტენციის ამაღლებას ბირთვული უსაფრთხოებისა და გაუვრცელებლობის საკითხში. სასწავლო კურსი ტარდება საერთაშორისო პროექტის „საქართველოში საერთაშორისო უსაფრთხოებისა და ბირთვული გაუვრცელებლობის სფეროში სასწავლო და კვლევითი შესაძლებლობების გაძლიერება“ ფარგლებში.

სტოკჰოლმის უნივერსიტეტის პროფესორ ტომას იონტერს ბათუმის შოთა რუსთაველის სახელმწიფო უნივერსიტეტის აკადემიურმა საბჭომ საპატიო დოქტორის წოდება მიანიჭა. პროფესორმა ტომას იონტერმა მნიშვნელოვანი წვლილი შეიტანა ბსუ-ს განვითარებასა და ინტერნაციონალიზაციაში. განსაკუთრებულია მისი დამსახურება ბსუ-ს საერთაშორისო ურთიერთობების საბაკალავრო საგანმანათლებლო პროგრამის რეაკრედიტაციისა და საერთაშორისო და საჯარო პოლიტიკის სამაგისტრო პროგრამების შემუშავებაში. იგი არის პროექტის „ბათუმის საზაფხულო უნივერისტეტი“ ერთ-ერთი ავტორი, რომელსაც ბსუ მერვედ მასპინძლობს და ეხება გლობალური უსაფრთოების აქტუალურ საკითხებს.

საზაფხულო სკოლა ბათუმში „კონსტიტუციური მართლმსაჯულება"
7-13 აგვისტო, 2023

ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტისა და სამცხე-ჯავახეთის სახელმწიფო უნივერსიტეტის იურიდიული ფაკულტეტის ორგანიზებით ქალაქ ბათუმში გაიმართება საზაფხულო სკოლა კონსტიტუციური მართლმსაჯულების აქტუალურ საკითხებთან დაკავშირებით. მონაწილეობის მიღების უფლება აქვს ნებისმიერი ავტორიზებული უნივერსიტეტის სამართლის საბაკალავრო და სამაგისტრო საგანმანათლებლო პროგრამის სტუდენტს.

ნიუ ვიჟენ უნივერსიტეტის იურიდიული ეთიკის მიმართულებამ USAID სამართლის უზენაესობის პროგრამის მხარდაჭერით, რეგიონული უნივერსიტეტების სტუდენტებისათვის იურიდიული ეთიკის საზაფხულო სკოლა გამართა. საზაფხულო სკოლა 25 ივლისიდან 2 აგვისტოს ჩათვლით მიმდინარეობდა და მასში საქართველოს სხვადასხვა რეგიონის (აჭარა, იმერეთი, შიდა ქართლი, სამცხე-ჯავახეთი, კახეთი) უნივერსიტეტების, სამართლის საბაკალავრო და სამაგისტრო პროგრამების, ოცმა სტუდენტმა მიიღო მონაწილეობა. მონაწილეთა შორის იყვნენ ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის სტუდენტები: ანრი თედორაძე, ზურა გუჯაბიძე, ნინო გუგესაშვილი, ია გორგაძე, ნინი გოგიტიძე, ნინო კონცელიძე.

ბათუმის შოთა რუსთაველის სახელმწიფო უნივერსიტეტში ვორქშოფი ჩატარდა თემაზე; „პლურალიზმი და მედიის თავისუფლება“. ტრენინგში მონაწილეობდნენ მედიის წარმომადგენლები, ბსუ-ს პროფესორ-მასწავლებლები, მოწვეული ლექტორები და სტუდენტები. სამუშაო შეხვედრა მოიცავდა ისეთ თემატიკას, როგორიცაა: პლურალიზმის კონტექსტის ანალიზი და რუკის შექმნა, პლურალიზმის და სტერეოტიპების დაძლევა, პრივილეგიების და დისკრიმინაციის დიაგნოსტირება. ვორკშოფს უძღვებოდნენ ექსპერტები: ნანა ბერეკაშვილი, რუსუდან გოცირიძე და შორენა ლორთქიფანიძე. გაიმართა დისკუსია პლურალისტური გარემოს განვითარებაში მედიის როლის მნიშვნელობასა და გამოწვევებზე. შეხვედრის დასასრულს მონაწილეებს სერტიფიკატები გადაეცათ.