საქართველოს საკონსტიტუციო სასამართლოს წევრმა თეიმურაზ ტუღუშმა USAID-ის სამართლის უზენაესობის პროგრამის ფარგლებში სამართალმცოდნეობის საგანმანათლებლო პროგრამის სტუდენტებისათვის საჯარო ლექცია წაიკითხა თემაზე: „კონსტიტუციური კონტროლის სისტემა საქართველოში და საკონსტიტუციო სამართალწარმოების მნიშვნელოვანი ასპექტები“. თეიმურაზ ტუღუშმა საუბრისას ყურადღება გაამახვილა საკონსტიტუციო სასამართლოს ინსტიტუციურ მახასიათებლებზე და სასამართლოს როლზე მოქალაქეების ძირითადი უფლებების და თავისუფლებების დაცვის პროცესში.

ბსუ-სა და იაპონიის საელჩოს თანამშრომლობის ფარგლებში, იურიდიული და სოციალურ მეცნიერებათა ფაკულტეტის სამართალმცოდნეობის პროგრამის მეოთხე სასწავლო წლის სტუდენტმა მაგდა ხალვაშმა იაპონიის მთავრობის პროგრამაში „MIRAI” (Mutual understanding, Intellectual Relations and Academic exchange Initiative) მიიღო მონაწილეობა. მაგდა ხალვაში ეწვია იაპონიის საგარეო საქმეთა სამინისტროს, იაპონიის უზენაესს სასამართლოს, იუსტიციის სამინისტროს, კიოტოს უნივერსიტეტს, იურიდიულ კომპანიას “Nishimura&Asahi” და სხვადასხვა კულტურული მემკვიდრეობის ძეგლს. გაცვლითი პროგრამა მიზნად ისახავს კულტურათა გაცვლას, ინტელექტუალური დისკუსიებისა და მონაწილეთა დახმარებით იაპონიისა და პროგრამაში მონაწილე ქვეყნების დაკავშირებას.

ბათუმის შოთა რუსთაველის სახელმწიფო უნივერსიტეტი USAID-ის სამართლის უზენაესობის პროგრამის მხარდაჭერით ახორციელებს პროექტს: „აჭარის რეგიონში პრაქტიკული სამართლის სწავლების ხელშეწყობა“. პროექტის ფარგლებში იურიდიული და სოციალურ მეცნიერებათა ფაკულტეტის სამართალმცოდნეობის პროგრამის IV კურსის სტუდენტებმა პრაქტიკული სამართლის (Street Law) კლინიკის კოორდინატორის, ცირა კომახიძის ხელმძღვანელობით ხელვაჩაურის მუნიციპალიტეტის დაბა მახინჯაურის, სოფელ ერგეს, სოფელ სარფისა და სოფელ თხილნარის მინდია აბაშიძის სახელობის პირველ საჯარო სკოლაში სამართლებრივი გაკვეთილები ჩაატარეს თემაზე: „კონსტიტუცია და დემოკრატია“.

აღსრულების ეროვნული ბიუროს აჭარისა და გურიის სააღსრულებო ბიუროს აღმასრულებლებმა ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის III-IV კურსის სტუდენტებთან შეხვედრა გამართეს. ბიუროს წარმომადგენლებმა მომავალ სამართალდამცველებს წარუდგინეს ინფორმაცია აღსრულების ეროვნული ბიუროს საქმიანობის, საქართველოს სააღსრულებო სისტემისა და აღსრულების დაწყების სამართლებრივ საფუძვლების შესახებ. სტუდენტები ასევე გაეცნენ გამოსახლების კატეგორიის საქმეების აღსრულების წესსა და აღსრულების პროცესში მედიაციის ჩართულობას.

24-25 მარტს ჟან მონეს კათედრის ხელმძღვანელმა, პროფესორმა მალხაზ ნაკაშიძემ, აშშ-ის ვიზიტის ფარგლებში, მონაწილეობა მიიღო ჰარვარდის უნივერსიტეტის სამართლის სკოლასა და კენედის მმართველობის სკოლაში გამართულ კონფერენციაში „Frontline Europe a Continent’s Struggle for Relevance, Unity and Value". მაღალი რანგის კონფერენცია ყოველწლიურად იმართება და აერთიანებს პოლიტიკურ ლიდერებს, მსოფლიო დონის ექსპერტებს და პრაქტიკოსებს მთელი ევროპიდან, რათა განიხილონ ევროპის წინაშე მდგარი გამოწვევები, უკრაინის ომის შედეგად წარმოქმნილი გეოპოლიტიკური გამოწვევები, ევროკავშირის ევოლუცია, ტრანსატლანტიკურ ურთიერთობები და სხვა.