სტრატეგიული კომუნიკაციების სალექციო კურსის აქტუალურ საკითხებზე ბათუმის შოთა რუსთაველის სახელმწიფო უნივერსიტეტში ვორქშოფი გაიმართა. ბსუ-ს იურიდიული და სოციალურ მეცნიერებათა ფაკულტეტის პროფესორ-მასწავლებლებმა და საქართველოს სტრატეგიის და განვითარების ცენტრის (GCSD-ის) წარმომადგენლებმა სამუშაო შეხვედრაზე კურსის სტრუქტურა, ამოცანები, მიზნები, სახელმძღვანელო ლიტერატურა და სწავლების ინოვაციური მეთოდების დანერგვის შესაძლებლობები განიხილეს. ინოვაციური სასწავლო კურსი GCSD-ისა და ბათუმის შოთა რუსთაველის სახელმწიფო უნივერსიტეტის თანამშრომლობით და აშშ-ის საელჩოს ფინანსური მხარდაჭერით ინერგება. პროგრამის ფარგლებში ასევე დაგეგმილია სტუდენტებისთვის სტიპენდიების გაცემა და სამეცნიერო კონფერენციის ორგანიზება.

დასრულდა ბათუმის შოთა რუსთაველის სახელმწიფო უნივერსიტეტისა და მიკოლას რომერის უნივერსიტეტის ერთობლივი საერთაშორისო საზაფხულო სკოლა „კონსტიტუციური დემოკრატია: თანამედროვე გამოწვევები“. იურიდიული და სოციალურ მეცნიერებათა ფაკულტეტის დეკანმა ლევან ჯაყელმა, ბსუ-ს ასოცირებულმა პროფესორმა, საზაფხულო სკოლის პროექტის ხელმძღვანელმა მალხაზ ნაკაშიძემ, ჰემლაინის უნივერსიტეტის პროფესორმა დევიდ შულცმა და მიკოლას რომერის უნივერსიტეტის პროფესორმა თომა ბირმონტიენემ სკოლის მონაწილეებს საქართველოს კონსტიტუციის დღე მიულოცეს და სერტიფიკატები გადასცეს. საერთაშორისო საზაფხულო სკოლაში 20 ქართველი და უცხოელი სტუდენტი მონაწილეობდა. ახალგაზრდებს კონსტიტუციური სამართალის, კონსტიტუციური დემოკრატიის მნიშვნელოვანი ინსტიტუტების აქტუალური საკითხები ამერიკისა და ევროპის წამყვანი უნივერსიტეტების პროფესორებმა გააცნეს.

საქართველოს საკონსტიტუციო სასამართლოში ტეხასის უნივერსიტეტის პროფესორის რიჩარდ ალბერტის წიგნის - „საკონსტიტუციო ცვლილებები: როგორ იქმნება, ირღვევა და იცვლება კონსტიტუციები“ პრეზენტაცია გაიმართა. წარდგენაზე წიგნის ავტორმა ნაშრომის მნიშვნელობასა და აქტუალობაზე ისაუბრა. წიგნში განხილულია საკონსტიტუციო ცვლილებების განხორციელების პროცედურა, სხვადასხვა ქვეყნის პრაქტიკა და საკონსტიტუციო სასამართლოს მიერ საკონსტიტუციო ცვლილებების კონსტიტუციურობის განხილვის უფლებამოსილების საკითხები. ღონისძიებას ესწრებოდნენ საქართველოს საკონსტიტუციო სასამართლოს მოსამართლეები, საერთაშორისო საზაფხულო სკოლის „კონსტიტუციური დემოკრატია: თანამედროვე გამოწვევები“ ორგანიზატორები და მონაწილეები.

ბათუმის შოთა რუსთაველის სახელმწიფო უნივერსიტეტისა და მიკოლას რომერის უნივერსიტეტის ერთობლივი საერთაშორისო საზაფხულო სკოლის „კონსტიტუციური დემოკრატია: თანამედროვე გამოწვევები“ ფარგლებში ბათუმის ამერიკულ კუთხეში ჰემლაინის უნივერსიტეტის პროფესორმა დევიდ შულცმა საჯარო ლექცია წაიკითხა თემაზე: „როგორი იქნება აშშ-ის 2020 წლის არჩევნები?" მომხსენებელმა სხვადასხვა ქვეყნის საარჩევნო სისტემასა და ამერიკის 2020 წლის არჩევნების აქტუალურ საკითხებზე ისაუბრა. ჰემლაინის უნივერსიტეტის პოლიტოლოგიის პროფესორი დევიდ შულცი ასწავლის სხვადასხვა მიმართულებებს: ამერიკული პოლიტიკის - საჯარო პოლიტიკა და ადმინისტრირება, კამპანიები და არჩევნები, სამთავრობო ეთიკა.

ბათუმის შოთა რუსთაველის სახელმწიფო უნივერსიტეტისა და მიკოლას რომერის უნივერსიტეტის პარტნიორობით საერთაშორისო საზაფხულო სკოლა „კონსტიტუციური დემოკრატია: თანამედროვე გამოწვევები“ დაიწყო. საზაფხულო სკოლა ბსუ-ს რექტორმა მერაბ ხალვაშმა, იურიდიული და სოციალურ მეცნიერებათა ფაკულტეტის დეკანმა ლევან ჯაყელმა, ასოცირებულმა პროფესორმა, საზაფხულო სკოლის პროექტის ხელმძღვანელმა მალხაზ ნაკაშიძემ, მიკოლას რომერის უნივერსიტეტის პროფესორმა ტომა ბირმონტიენემ და აჭარის ა.რ. განათლების, კულტურისა და სპორტის სამინისტროს დეპარტამენტის უფროსმა ნაზიბროლა ბერიძე-გაბაიძემ გახსნეს. ერთი კვირის განმავლობაში ქართველი, ინგლისელი, ესტონელი, ბელგიელი, უკრაინელი, აზერბაიჯანელი და სომეხი სტუდენტები კონსტიტუციური სამართალის, კონსტიტუციური დემოკრატიის მნიშვნელოვანი ინსტიტუტების აქტუალურ საკითხებს გაეცნობიან.