ბათუმის შოთა რუსთაველის სახელმწიფო უნივერსიტეტისა და მიკოლას რომერის უნივერსიტეტის ერთობლივი საერთაშორისო საზაფხულო სკოლის „კონსტიტუციური დემოკრატია: თანამედროვე გამოწვევები“ ფარგლებში ბათუმის ამერიკულ კუთხეში ჰემლაინის უნივერსიტეტის პროფესორმა დევიდ შულცმა საჯარო ლექცია წაიკითხა თემაზე: „როგორი იქნება აშშ-ის 2020 წლის არჩევნები?" მომხსენებელმა სხვადასხვა ქვეყნის საარჩევნო სისტემასა და ამერიკის 2020 წლის არჩევნების აქტუალურ საკითხებზე ისაუბრა. ჰემლაინის უნივერსიტეტის პოლიტოლოგიის პროფესორი დევიდ შულცი ასწავლის სხვადასხვა მიმართულებებს: ამერიკული პოლიტიკის - საჯარო პოლიტიკა და ადმინისტრირება, კამპანიები და არჩევნები, სამთავრობო ეთიკა.

ბათუმის შოთა რუსთაველის სახელმწიფო უნივერსიტეტისა და მიკოლას რომერის უნივერსიტეტის პარტნიორობით საერთაშორისო საზაფხულო სკოლა „კონსტიტუციური დემოკრატია: თანამედროვე გამოწვევები“ დაიწყო. საზაფხულო სკოლა ბსუ-ს რექტორმა მერაბ ხალვაშმა, იურიდიული და სოციალურ მეცნიერებათა ფაკულტეტის დეკანმა ლევან ჯაყელმა, ასოცირებულმა პროფესორმა, საზაფხულო სკოლის პროექტის ხელმძღვანელმა მალხაზ ნაკაშიძემ, მიკოლას რომერის უნივერსიტეტის პროფესორმა ტომა ბირმონტიენემ და აჭარის ა.რ. განათლების, კულტურისა და სპორტის სამინისტროს დეპარტამენტის უფროსმა ნაზიბროლა ბერიძე-გაბაიძემ გახსნეს. ერთი კვირის განმავლობაში ქართველი, ინგლისელი, ესტონელი, ბელგიელი, უკრაინელი, აზერბაიჯანელი და სომეხი სტუდენტები კონსტიტუციური სამართალის, კონსტიტუციური დემოკრატიის მნიშვნელოვანი ინსტიტუტების აქტუალურ საკითხებს გაეცნობიან.

ბსუ-ის იურიდიული და სოციალურ მეცნიერებათა ფაკულტეტის ასოცირებულმა პროფესორმა მალხაზ ნაკაშიძემ აჭარის განათლების, კულტურისა და სპორტის სამინისტროს „უმაღლესი განათლების ხელშეწყობის“ 2019 წლის სეზონური სკოლის ქვეპროგრამის ფარგლებში საგრანტო დაფინანსება მოიპოვა. მიღებული დაფინანსებით 19-24 აგვისტოს ბათუმის შოთა რუსთაველის სახელმწიფო უნივერსიტეტში გაიმართება საერთაშორისო საზაფხულო სკოლა "კონსტიტუციური დემოკრატია: თანამედროვე გამოწვევები“. საზაფხულო სკოლაში მონაწილეობას მიიღებენ როგორც ქართველი, ისე უცხოელი სტუდენტები. საზაფხულო სკოლის პროგრამა მოიცავს კონსტიტუციური სამართლის აქტუალურ თემატიკას: კონსტიტუცია, ხელისუფლების შეზღუდვა და დემოკრატია, კონსტიტუციური იდენტობა, არაკონსტიტუციურ საკონსტიტუციო ცვლილებები, კონსტიტუციის დაცვის მექანიზმები და სხვა.

24–26 ივლისს, ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის სოციალურ მეცნიერებათა დეპარტამენტში სტუმრად იმყოფებოდნენ უკრაინის ქ. ლუცკის ლესია უკრაინკას სახელობის დასავლეთ ევროპის უნივერსიტეტის პედაგოგი ტანია კაჩინსკა და კავკასიის უნივერსიტეტის პროფესორი ირმა ხაჩიძე, რომლებმაც ჩაატარეს სემინარები თემაზე: „Neurocomputing advances on Brain research.“ სემინარის მუშაობაში მონაწილეობდნენ სოციალურ მეცნიერებათა და საზოგადოებრივ და პოლიტიკურ მეცნიერებათა დეპარტამენტების წევრები პროფესორი გურამ ჩაგანავა, ასოცირებული პროფესორები: ქეთევან ბერიძე, რუსუდან ბერიძე, რუსუდან კეჭაყმაძე, ირაკლი მანველიძე, ნატალია ლაზბა, ინეზა ზოიძე, ასისტენტები: შორენა მესხიძე, ეთერ ვარშანიძე, აკადემიური დოქტორი გურანდა შამილიშვილი, მოწვეული მასწავლებელი ციალა ტუღუში, ფსიქოლოგიის სპეციალობის სტუდენტები: მარიამ ჯინჭარაძე, თამარ ჭაღალიძე და ქეთევან ხიმშიაშვილი.

იურიდიული და სოციალურ მეცნიერებათა ფაკულტეტის საზოგადოებრივ და პოლიტიკურ მეცნიერებათა დეპარტამენტის პროფესორ-მასწავლებლებმა ირაკლი მანველიძემ, ლაშა ბაჟუნაიშვილმა, გელა ირემაძემ და გიგა ფარტენაძემ მონაწილეობა მიიღეს საქართველოს რეგიონული განვითარებისა და ინფრასტრუქტურის სამინისტროს ხელშეწყობით გამართულ კონფერენციაში „დეცენტრალიზაციის რეფორმა საქართველოში-სტრატეგია და გამოწვევები“. ღონისძიების მიზანი იყო საქართველოში დეცენტრალიზაციის კუთხით არსებული მდგომარეობის შეფასება, დეცენტრალიზაციის სტრატეგიის მიმართულებების, განხორციელების პრინციპების, დეცენტრალიზაციის სტრატეგიული მიზნების და ამოცანების, სტრატეგიის განხორციელების და მართვის მექანიზმების, მონიტორინგის და შეფასების შესახებ დიალოგის უზრუნველყოფა.