ბათუმის შოთა რუსთაველის სახელმწიფო უნივერსიტეტის ემერიტუს-პროფესორის, სამხრეთ-დასავლეთ საქართველოს სამეცნიერო-კვლევითი ცენტრის უფროსი მეცნიერ-თანამშრომლისა და ღვაწლმოსილი პროფესორის მერი ცინცაძის 85 წლისადმი მიძღვნილი საიუბილეო სხდომა გაიმართა შოთა რუსთაველის დარბაზში. მკვლევარს იუბილე მიულოცეს, წარმატებები უსურვეს და მის ღვაწლზე ისაუბრეს უნივერსიტეტის რექტორის მოვალეობის შემსრულებელმა მერაბ ხალვაშმა, პროფესორ-მასწავლებლებმა და სტუდენტებმა. პროფესორ მერი ცინცაძეს მნიშვნელოვანი წვლილი მიუძღვნის ენათმეცნიერების განვითრებაში, გამოქვეყნებული აქვს ათეულობით სამეცნიერო ნაშრომი და მონოგრაფიები, ეწევა სარედაქციო საქმიანობას. ცნობილ მეცნიერს წილად ხვდა ქართველ მკვლევართა შორის პირველად ესაუბრა კლარჯული კილოს შესახებ, სამეცნიერო მიმოქცევაში შემოეტანა ქართული ენათმეცნიერებისათვის უცხო დიალექტის მასალები.

მერი ცინცაძე 1930 წლის 22 ივლისს დაიბადა ბათუმში. მკვლევრამა განათლება ბათუმის შოთა რუსთაველის სახელობის სახელმწიფო პედინსტიტუტში მიიღო (1959 -1965 წწ.), დაამთავრა ქართული ენისა და ლიტერატურის სპეციალობა. 1956-1959 წლებში მან გაიარა თბილისის სახელმწიფო უნივერსიტეტის  ასპირანტურა (სპეციალობა - ძველი ქართული ენა) პროფესორ ილია აბულაძის ხელმძღვანელობით; 1966 წელს დაიცვა საკანდიდატო  დისერტაცია თემაზე: ,,იოანე სინელის ,,კლემაქსის“ ეფთვიმესეული თარგმანი და მისი ენა“ (ტექსტი და გამოკვლევა). ასპირანტურაში სწავლისას აკაკი შანიძეს მხედველობიდან არ გამორჩენია პერიფერიელი გოგონას კეთილსინდისიერება, გულმოდგინება, ნიჭიერება, სწავლა-ცოდნის დიდი წყურვილი, კვლევის უნარი. სთავაზობდა კიდეც მას დედაქალაქში დარჩენას, მაგრამ ეკონომიკური მდგომარეობა ხელს უშლიდა. ქალბატონმა მერიმ მშობლიურ ბათუმში ირჩია დაბრუნება, ბათუმის შოთა რუსთაველის სახელობის სახელმწიფო პედინსტიტუტში უფროს ლაბორანტად დაიწყო მუშაობა და ღირსეულად გაიარა გზა მასწავლებლობიდან პროფესორობამდე. 1956-1959 წლებში გახლდათ ქართული ენისა და ლიტერატურის კათედრის უფროსი მასწავლებელი; 1965-1972 წლებში კი - ბათუმის შოთა რუსთაველის სახელმწიფო უნივერსიტეტის დაწყებითი განათლების პედაგოგიკისა და მეთოდიკათა კათედრის უფროსი მასწავლებელი, 1972 წლიდან ამავე კათედრის დოცენტი,  1965-1972 წლებში კი -  გამგე.

ქალბატონი მერი 1999-2004 წლებში იყო ფილოლოგიის ფაკულტეტის დეკანი; 2006-2009 წლებში აირჩიეს შოთა რუსთაველის უნივერსიტეტის ჰუმანიტარულ მეცნიერებათა ფაკულტეტის ქართული ფილოლოგიის დეპარტამენტის ასოცირებულ პროფესორად, 2011 წლიდან კი -  პროფესორად.

2000 წლიდან დღემდე - ბათუმის შოთა რუსთაველის სახელმწიფო უნივერსიტეტის სამხრეთ-დასავლეთ საქართველოს სამეცნიერო-კვლევითი ცენტრის უფროსი მეცნიერ-მუშაკია, სისტემატიურად მონაწილეობს ექსპედიციებში, ისტორიულ ტაოში, შავშეთსა და კლარჯეთში, არის რამდენიმე სამეცნიერო გრანტის (,,შავშეთი,“ ,,კლარჯეთი“) მეცნიერ-მუშაკი, ძირითადი შემსრულებელი.

ქალბატონ მერის გამოქვეყნებული აქვს მონოგრაფიები: „ქართულად ხსნილად უბნობდი!“ (თბილისი, 2013); „შავშეთი“ (ავტორთა ჯგუფი, თბილისი, 2011); „სამხრული დიალექტები და ქართული სამწერლობო ენა (V-XVIII სს)“ მ.ფაღავას თანაავტორობით (ბათუმი, 1998).

დაბეჭდილია მისი ათეულობით სტატია. ეწევა სარედაქციო საქმიანობას, არის რედაქტორი წიგნებისა - ,,ნაწილაკი ახალ ქართულში“ (მამია ფაღავა, თბილისი, 2009); ,,ქართული ენის პრაქტიკული კურსი და სტილიტიკის საკითხები“ (ნაზი მიქელაძე, მამია ფაღავა, ბათუმი, 2005).  არის რეცენზენტი წიგნისა - „მიმღეობა ძველ ქართულში“ (ავტორი ნანა ცეცხლაძე, ბათუმი, 2006).

გახლავთ სხვადასხვა სამეცნიერო გამოცემის რედკოლეგიის წევრი, კერძოდ: ბსუ ჰუმანიტარულ მეცნიერებათა ფაკულტეტის სამხრეთ-დასავლეთ საქართველოს სამეცნიერო-კვლევითი ცენტრის „კრებულისა“ და  ბსუ-ს ჰუმანიტარულ მეცნიერებათა ფაკულტეტის შრომებისა. სხვადასხვა დროს დაჯილდოებულია საიუბილეო მედლით (1970 წ.); „საპატიო ნიშნის“ ორდენით (1971წ.); მედლით „შრომის ვეტერანი“ (1986 წ.); ღირსების ორდენით (2000 წ.).

ქალბატონ მერის დედაბუნებამ დაანათლა ადამიანური სითბო და სიყვარული, კეთილშობილება და დიდსულოვნება. ეს ის თვისებებია, რომლებიც დღემდე ამკობს მხცოვან ქალბატონს. ადამიანური ღირსების შერწყმა პროფესიონალიზმთან, სათნოებასა  და კვალიფიციურობასთან ქალბატონ მერის გამოარჩევს სხვათაგან. მისი პიროვნების უნიკალურობის შესახებ ყველა ასაკის ადამიანი  აღნიშნავს.

ქალბატონი მერი წლების განმავლობაში კითხულობდა ლექციებს ძველსა და ახალ ქართულ ენაში, ქართული სალიტერატურო ენის ისტორიაში, უძღვებოდა არაერთ სპეცკურსს, დიდი ინტერესით მუშაობდა სტუდენტებთან.

კვლევის სპექტრით, საკვლევი თემატიკის აქტუალურობით, საკითხის შესწავლის სიღრმით და ამომწურაობით  ქალბატონი მერი ნამდვილი მკვლევრის ეტალონია. ამჟამად მოწაფეებთან ერთად მუშაობს ვრცელ მონოგრაფიაზე ,,კლარჯეთი“.