ახალი ამბები

წარმატებით გაიარა პროგრამული აკრედიტაცია ბსუ-ს საბუნებისმეტყველო მეცნიერებათა და ჯანდაცვის ფაკულტეტის 14-მა საგანმანათლებლო პროგრამამ. სამმა ერთსაფეხურიანმა, მათ შორის ერთმა ინგლისურენოვანმა, ხუთმა საბაკალავრომ, ოთხმა სამაგისტრომ და ორმა სადოქტორო პროგრამამ აკრედიტაციის სტანდარტები დააკმაყოფილა და უმაღლესი საგანმანათლებლო პროგრამების აკრედიტაციის საბჭოს გადაწყვეტილებით სრული აკრედიტაცია მოიპოვა. ვულოცავთ ფაკულტეტის სტუდენტებსა და პროფესორ-მასწავლებლებს მნიშვნელოვან გამარჯვებას და წარმატებებს ვუსურვებთ.

დღეს, 2008 წლის რუსეთ-საქართველოს ომში დაღუპული გმირის, ბათუმის შოთა რუსთაველის სახელმწიფო უნივერსიტეტის სტუდენტის, ვახტანგ გორგასლის I ხარისხის ორდენოსან ამირან მამალაძის საფლავი ბსუ-ს სტუდენტებმა და ადმინისტრაციის წარმომადგენლებმა გვირგვინით შეამკეს. უნივერსიტეტელებმა კიდევ ერთხელ პატივი მიაგეს საქართველოს ტერიტორიული მთლიანობისათვის დაღუპული მებრძოლის ხსოვნას და მის ღვაწლზე ისაუბრეს. ომში დაღუპული გმირის უკვდავსაყოფად ბათუმის შოთა რუსთაველის სახელმწიფო უნივერსიტეტში დაწესებულია სტუდენტ ამირან მამალაძის სახელობის სტიპენდია და ასევე მცირე სპორტულ დარბაზს მინიჭებული აქვს მისივე სახელი.

ბათუმის შოთა რუსთაველის სახელმწიფო უნივერსიტეტს კალიფორნიის უნივერსიტეტის ბერკლის მეწარმეობისა და ტექნოლოგიის გლობალური ელჩი კრის ბარი, ავსტრიის გამოყენებითი მეცნიერებათა უნივერსიტეტის პრეზიდენტი გერალდ რაიზინგერი და კავკასიის უნივერსიტეტის პრეზიდენტი კახა შენგელია ეწვივნენ. ბსუ-ს რექტორთან მერაბ ხალვაშთან, ადმინისტრაციის ხელმძღვანელთან ნიკა ჩხარტიშვილთან და რექტორის მოადგილესთან თამარ სირაძესთან გამართულ შეხვედრაზე სტუმრებმა ერთობლივი საგანმანათლებლო პროგრამების განხორციელების მიმდინარეობა და სამომავლო თანამშრომლობის პრიორიტეტები განიხილეს.

ბულგარეთის რესპუბლიკის საგანგებო და სრულუფლებიანი ელჩი საქართველოში დესისლავა ივანოვა 5-წლიანი მისიის პერიოდში ბათუმის შოთა რუსთაველის სახელმწიფო უნივერსიტეტთან ნაყოფიერი თანამშრომლობის შეჯამების მიზნით ბსუ-ს რექტორს, მერაბ ხალვაშს შეხვდა. შეხვედრაზე მხარეებმა ერთმანეთს მადლობა გადაუხადეს ერთობლივი გაცვლითი პროგრამების, პროექტებისა და სხვადასხვა სახის საინტერესო ღონისძიებების განხორციელებისთვის. რექტორმა ელჩს შემდგომ საქმიანობაში წარმატებები უსურვა და სამახსოვრო საჩუქარი გადასცა.

პირველად საქართველოს ისტორიაში, 4 დაცული ტერიტორია UNESCO-ს ბუნებრივი მემკვიდრეობის ნუსხაში შევიდა. გადაწყვეტილება ჩინეთის ქალაქ ფუჟოუში გამართულ UNESCO-ს მსოფლიო მემკვიდრეობის კომიტეტის 44-ე სესიაზე მიიღეს. ეს ნომინაცია მოიცავს ქობულეთის დაცული ტერიტორიებისა და კოლხეთის ეროვნული პარკის ტორფნარებს, კინტრიშის დაცული ტერიტორიებისა და მტირალას ეროვნული პარკის ტყეებს, რომლებიც „კოლხური ტყეებისა და ჭარბტენიანი ტერიტორიების“ სახელით, დაემატა მსოფლიოს 213 ბუნებრივი მემკვიდრეობის ნუსხას და ღირსეული ადგილი მოიპოვა ამაზონის ტყის, გრანდ კანიონის ეროვნული პარკის, იელოუსტოუნის ეროვნული პარკის, მთა ეტნას, შვეიცარიის ალპების გვერდით.