ახალი ამბები

ბაათუმის შოთა რუსთაველის სახელმწიფო უნივერსიტეტში „USAID-ის საბაზისო განათლების პროგრამის“ ფარგლებში, აჭარისა და გურიის საჯარო სკოლებში ჩამოყალიბებული იდეატორთა, მკითხველთა და წიგნის მეგობრების კლუბების შემაჯამებელი შეხვედრა გაიმართა. ღონისძიება გახსნა და მონაწილეებს მიესალმა ბსუ-ს რექტორის მოადგილე თამარ სირაძე. პროგრამის დასკვნით ღონისძიებაზე მოსწავლეებმა წარმოადგინეს სხვადასხვა თემატიკაზე განხორციელებული პროექტები. კლუბები აჭარისა და გურიის რეგიონების 7 მუნიციპალიტეტიდან შერჩეულ 25 საჯარო სკოლაში IV-VI კლასის მოსწავლეების მონაწილეობით ჩამოყალიბდა.

ბათუმის შოთა რუსთაველის სახელმწიფო უნივერსიტეტში სტუდენტთა საუნივერსიტეტო სამეცნიერო კონფერენცია - 2024 გაიმართა. სხვადასხვა ფაკულტეტის 300-მდე სტუდენტმა სამეცნიერო მოხსენება წარადგინა 28 სექციის მიმართულებით. სამეცნიერო კონფერენცია მიზნად ისახავდა ახალგაზრდების სამეცნიერო საქმიანობაში ჩართვას, კვლევითი უნარ-ჩვევების განვითარებასა და გამოცდილების გაზიარებას.

ბათუმის შოთა რუსთაველის სახელმწიფო უნივერსიტეტს ლიეტუვის მიკოლას რომერის უნივერსიტეტის დელეგაცია ეწვია მიკოლას რომერის უნივერსიტეტის სამართლის სკოლის დეკანის, პროფესორ ლირა იაკულევიჩიენეს ხელმძღვანელობით. ბსუ-ს რექტორთან, პროფესორ მერაბ ხალვაშთან გამართულ შეხვედრაზე მიკოლას რომერის უნივერსიტეტის წარმომადგენლებმა უნივერსიტეტებს შორის სამართლის მიმართულებით თანამშრომლობის გაღრმავებასა და სამომავლო გეგმებზე იმსჯელეს. დაიგეგმა ერთობლივი სამართლის სამაგისტრო პროგრამის შემუშავება, სტუდენტებისა და პროფესორ-მასწავლებლებისათვის კვლევითი მიმართულებით თანამშრომლობის გაღრმავება, სამეცნიერო კონფერენციის ჩატარება, ერთობლივი პროექტების განხორციელება.

ბათუმის შოთა რუსთაველის სახელმწიფო უნივერსიტეტში საერთაშორისო განათლების დღე გაიმართა. ღონისძიებაზე სხვადასხვა ფაკულტეტის სტუდენტებს „ერაზმუს+“-ის გაცვლით პროგრამებში მონაწილეობის გამოცდილება გაუზიარეს საერთაშორისო მობილობის ფარგლებში ჩამოსულმა უცხოელმა სტუდენტებმა და „ერაზმუს+“-ის გაცვლით პროგრამებში მონაწილე ბსუ-ს სტუდენტებმა. საერთაშორისო განათლების დღის ფარგლებში უცხოეთში განათლების მიღების მსურველები გაეცნენ წამყვანი უნივერსიტეტების გაცვლით პროგრამებსა და სწავლების პირობებს. ღონიძიებაზე უცხოელ სტუდენტებს საუნივერსიტეტო ცხოვრებაში აქტიური მონაწილეობისთვის სერტიფიკატები გადაეცათ.

ბათუმის შოთა რუსთაველის სახელმწიფო უნივერსიტეტში გერმანული ენის დღე „გერმანული ენა დიდებისა და პატარებისათვის“ გაიმართა. ღონისძიება გახსნეს და მონაწილეებს მიესალმნენ გერმანიის ელჩის მოადგილე საქართველოში ტანია ჰუტი, ავსტრიის ელჩი საქართველოში თომას მიულმანი და ბსუ-ს რექტორის მოადგილე თამარ სირაძე. ღონისძიების ფარგლებში, ჩატარდა გაცვლითი პროგრამების წარდგენა და შეხვედრა გერმანული ენის მასწავლებლებთან, სტუდენტებთან, აბიტურიენტებთან, მოსწავლეებთან და მშობლებთან. გერმანიაში სწავლის მსურველებს DAAD-ის თბილისის რეგიონული ოფისის ხელმძღვანელმა გებჰარდ როილმა სასტიპენდიო პროგრამები გააცნო. ასევე მოეწყო ავსტრიელი მწერლის, ინგებორ ბახმანის ცხოვრებისა და მოღვაწეობისადმი მიძღვნილი გამოფენა.