ახალი ამბები

ბსუ-ს ტექნოლოგიური ფაკულტეტის აგრარული მიმართულების სტუდენტებმა, ქალთა საფეხბურთო კლუბ „ლანჩხუთის“ წევრებმა ნინი გუჯაბიძემ, მარიამ გოგეშვილმა და ნინო ჩხრტიშვილმა წარმატებულად იასპარეზეს უეფას ქალთა ჩემპიონატის ლიგის საკვალიფიკაციო ეტაპზე. ქართველმა სპორტსმენებმა შიმკენტში გამართულ ჩემპიონთა ლიგის 2020-21 წლების პირველ საკვალიფიკაციო ეტაპზე ყაზახურ ოკჟეტპესს დამატებით დროში 2:1 სძლიეს. კლუბი „ლანჩხუთი“ ქართული ფეხბურთის ისტორიაში პირველი გუნდი გახდა, რომელმაც უეფას ქალთა ჩემპიონთა ლიგის მეორე საკვალიფიკაციო ეტაპის საგზური მოიპოვა. „ლანჩხუთი“ უეფას ჩემპიონთა ლიგის მეორე საკვალიფიკაციო ეტაპის შეხვედრას 18/19 ნოემბერს ჩაატარებს და ქსკ „ოლიმპია კლუჟს“ რუმინეთში დაუპირისპირდება.

ბსუ-ში საქართველოს განათლების, მეცნიერების, კულტურისა და სპორტის სამინისტროს რეკომენდაციითა და საბუნებისმეტყველო მეცნიერებათა და ჯანდაცვის ფაკულტეტის ორგანიზებით 5-7 ნოემბერს ონლაინ ტრენინგ-კურსი „ახალი კორონავირისული დაავადება COVID-19 - ადაპტირებული სწავლების კურსი სტუდენტებისთვის’’ ჩატარდა. კურსის პროგრამა ბსუ-ს პროფესორმა სოფიო ბერიძემ მოამზადა. ტრენინგი მედიცინის დამამთავრებელი კურსის სტუდენტების გადამზადებას, სამედიცინო პერსონალის რეზერვის შექმნას და საჭიროების შემთხვევაში სამედიცინო პერსონალის COVID-19-ით გამოწვეული დაავადების მართვაში დახმარებას ითვალისწინებდა.

2007 წლის 8 ნოემბერს ბათუმის შოთა რუსთაველის სახელმწიფო უნივერსიტეტის სტუდენტთა ნაწილმა საპროტესტო აქციით სოლიდარობა გამოუცხადა 7 ნოემბერს თბილისში განვითარებულ მოვლენებს, რომლის შემდეგაც ძალოვანმა სტრუქტურებმა ბსუ-ში ოპერაცია განახორციელეს. სპეცრაზმელები უნივერსიტეტში შემოიჭრნენ, სტუდენტები და პროფესორ-მასწავლებლები დაარბიეს, ხელკეტებით ფიზიკურად გაუსწორდნენ და სასწავლო პროცესის მიმდინარეობისას აუდიტორიებში ცრემლსადენი გაზი გაუშვეს.

ბათუმის შოთა რუსთაველის სახელმწიფო უნივერსიტეტის ახალ სასწავლო კორპუსში ტექნოპარკი გაიხსნა. ტექნოპარკი საქართველოს ეკონომიკისა და მდგრადი განვითარების მინისტრმა ნათია თურნავამ და აჭარის ა.რ მთავრობის თავმჯომარემ თორნიკე რიჟვაძემ, აჭარის ა.რ. განათლების მინისტრთან მაია ხაჯიშვილთან, ბსუ-ს რექტორთან მერაბ ხალვაშთან და საქართველოს ინოვაციების და ტექნოლოგიების სააგენტოს თავმჯდომარესთან ავთანდილ კასრაძესთან ერთად გახსნეს.

საქართველოს განათლების, მეცნიერების, კულტურისა და სპორტის სამინისტრო მაგისტრანტებისთვის სოციალური პროგრამის ფარგლებში ახორციელებს სახელმწიფო სასწავლო სამაგისტრო საგრანტო პროგრამას. განაცხადები მიიღება მხოლოდ ონლაინ რეჟიმში 2020 წლის 30 სექტემბრიდან 14 ოქტომბრის 18:00 საათამდე ელექტრონულ პორტალზე: http://socreg.mes.gov.ge .