ახალი ამბები

ერაზმუს+-ის მხარდაჭერით განხორციელებული პროექტის „ინოვაციები კურიკულუმში სოციალური ჩართულობის მხარდასაჭერად“ (Curriculum Innovation for Social Inclusion - CISI) ფარგლებში ბათუმის შოთა რუსთაველის სახელმწიფო უნივერსიტეტში პროექტის ჩართული ქართველი პარტნიორების სამუშაო შეხვედრები ტარდება. ხუთი დღის განმავლობაში შეხვედრების მონაწილეები სამუშაო ჯგუფების მიერ მომზადებულ ახალ სასწავლო კურსებს და დაგეგმავენ დისტანციური მუშაობის შემდგომ ნაბიჯებს. ასევე გაანალიზებული იქნება პროექტის განხორციელებაზე COVID19 ის გავლენა და დროული რეაგირების მექანიზმები.

ბსუ-ში სამი დღის განმავლობაში მიმდინარეობდა CODFREURCOR-ის (ცენტრალური და აღმოსავლეთ ევროპის უნივერსიტეტების ჰუმანიტარულ მეცნიერებათა ფრანკოფონიური სადოქტორო კოლეჯი) მე-8 საერთაშორისო კონფერენცია „ეროვნული ლიტერატურა თარგმანში“. კონფერენციის ორგანიზატორები იყვნენ ბსუ-ს ჰუმანიტარულ მეცნიერებათა ფაკულტეტი და ილიას სახელმწიფო უნივერსიტეტის კვლევითი ცენტრი: რომანული ურთიერთგაგება, ინტერტექსტუალური დიალოგი. კონფერენცია ჩატარდა აჭარის განათლების, კულტურისა და სპორტის სამინისტროს ფინანსური მხარდაჭერით.

ბათუმის შოთა რუსთაველის სახელმწიფო უნივერსიტეტის ფუტსალის გუნდი გიორგი შაქარაშვილის სახელობის ოთხთა ტურნირის „შაქარას თასი - 2020“ მინი ფეხბურთში გამარჯვებულია. ტრაგიკულად დაღუპული ფეხბურთელის სახელობის პირველობა ბათუმის ბულვარის სპორტულ მოედანზე, 30-31 აგვისტოს ჩატარდა და მასში მონაწილეობდნენ: ბსუ-ს ფუტსალის გუნდი, ბათუმის „ბათუმი“, ბათუმის საზღვაო აკადემია და თბილისური გუნდი „შაქარას მეგობრები“. პირველ დღეს ბსუ-ს გუნდმა წარმატებით დაიწყო ასპარეზობა და ანგარიშით 2-0 დაამარცხა ბათუმის საზღვაო აკადემიის გუნდი, ხოლო „შაქარას მეგობრებმა" 2-0 სძლია ბათუმის „ბათუმს“.ფინალურ მატჩში ბსუ-ს გუნდი „შაქარას მეგობრებს“ დაუპირისპირდა და ძირითადი დრო ანგარიშით 3-3 დასრულდა. დამატებით პენალტების სერიაში ბსუ-ს გუნდმა ანგარიშით 3:2 გაიმარჯვა და „შაქარას თასი“ მოიპოვა.

ბათუმის დიგიტალური ჰუმანიტარიის IX საერთაშორისო საზაფხულო სკოლა „ციფრული რუსთველოლოგია“ გაიხსნა ბათუმის შოთა რუსთაველის სახელმწიფო უნივერსიტეტში. ციფრული რუსთველოლოგიის საზაფხულო სკოლა საქართველოში პირველად ტარდება და მასში მონაწილეობს საქართველოს სხვადასხვა უმაღლესი საგანმანათლებლო დაწესებულების სამივე საფეხურის 20-მდე სტუდენტი. ღონისძიება მიზნად ისახავს მსმენელებისთვის თეორიული ცოდნის გაღრმავებასთან ერთად, პრაქტიკული უნარ-ჩვევების გამომუშავებას, რაც მათ საშუალებას მისცემს, ჩაერთონ „ვეფხისტყაოსნის“ მულტილინგვური პარალელური კორპუსის“ შექმნაში.

ბათუმის შოთა რუსთაველის სახელმწიფო უნივერსიტეტის რექტორს მერაბ ხალვაშს თსუ-ს რექტორმა გიორგი შარვაშიძემ ივანე ჯავახიშვილის სახელობის თბილისის სახელმწიფო უნივერსიტეტთან წარმატებული და ნაყოფიერი თანამშრომლობისათვის საიუბილეო მედალი გადასცა. თსუ მედალს ანიჭებს საქართველოს ან უცხო ქვეყნის მოქალაქეს, რომელსაც განსაკუთრებული დამსახურება მიუძღვის ივანე ჯავახიშვილის სახელობის თბილისის სახელმწიფო უნივერსიტეტის სამეცნიერო და სასწავლო პროცესის განვითარებასა და უნივერსიტეტებს შორის სამეცნიერო–კვლევითი საქმიანობის ხელშეწყობაში.