ახალი ამბები

საქართველოს უნივერსიტეტების ბავშვთა უფლებათა ცენტრების ქსელის 2024 წლის შეხვედრის მონაწილეებმა და ბავშვის უფლებების ადვოკატებმა ხელი მოაწერეს ბავშვის უფლებების აკადემიური ქსელის ჩამოყალიბების დეკლარაციას. აკადემიური ქსელი ითვალისწინებს, შექმნას ხელსაყრელი გარემო აკადემიური ძიების, კვლევისა და ადვოკატირებისათვის, რომელიც მიზნად ისახავს ბავშვის უფლებების რეალიზაციის გაძლიერებას. წევრები ქსელს გამოიყენებენ როგორც პლატფორმას ბავშვის უფლებების ხელშეწყობისა და დაცვის კუთხით იდეების, პრაქტიკის, მოსაზრებების, გამოცდილებისა და რესურსების გასაცვლელად. გაერთიანება ასევე ხელს შეუწყობს სხვა ქვეყნების აკადამიურ ქსელებთან პარტნორობას ბავშვის უფლებების ცოდნის, სამეცნიერო-კვლევითი მუშაობის, ადვოკატირების პრინციპებისა და პრაქტიკის გასაზიარებლად.

ბათუმის შოთა რუსთაველის სახელმწიფო უნივერსიტეტმა საქართველოს უნივერსიტეტების ბავშვის უფლებების ცენტრების წარმომადგენლებს უმასპინძლა. ორდღიანი შეხვედრა ბსუ-ს ბავშვთა უფლებების ცენტრში გაიმართა და ითვალისწინებდა ცენტრების მდგრადი ზრდის ხედვის, პრიორიტეტული სფეროების და სტრატეგიის განსაზღვრას, ძლიერი და სუსტი მხარეების, შესაძლებლობებისა და საფრთხეების იდენტიფიცირებასა და თითოეული ცენტრისთვის მორგებული სამუშაო გეგმების შემუშავებას. შეხვედრის მონაწილეებს მიესალმნენ და ნაყოფიერი სამუშაო შეხვედრა უსურვეს UNICEF წარმომადგენელმა საქართველოში იესპერ მოლერმა, ბსუ-ს რექტორის მოადგილემ, პროფესორმა ანზორ ბერიძემ, ზუსტ მეცნიერებათა და განათლების ფაკულტეტის დეკანმა, პროფესორმა ლელა თურმანიძემ.

ბათუმის დღესასწაულზე ბათუმის შოთა რუსთაველის სახელმწიფო უნივერსიტეტის დამსახურებულ მეცნიერს, ცნობილ ეთნოლოგს ნოდარ კახიძეს და ღვაწლმოსილ მათემატიკოსს, პროფესორ ვლადიმერ ბალაძეს სამეცნიერო და საგანმანათლებლო საქმიანობაში შეტანილი განსაკუთრებული წვლილისთვის საპატიო ბათუმელის წოდება მიენიჭათ. ბათუმის შოთა რუსთაველის სახელმწიფო უნივერსიტეტი ულოცავს მეცნიერებს საპატიო ბათუმელის წოდების მინიჭებას და წარმატებებს უსურვებს.

ბათუმის შოთა რუსთაველის სახელმწიფო უნივერსიტეტს ქუთაისის N26-ე, ავთანდილ დეკანოიძის სახელობის N32-ე, ტყიბულის სოფელ გელათის, სოფელ კურსების, აფხაზეთის N5-ე საჯარო სკოლების დამამთავრებული კლასის მოსწავლეები ეწვივნენ. ბსუ-ს რექტორის მოადგილემ თამარ სირაძემ ახალგაზრდებს საუნივერსიტეტო ცხოვრება, საგანმანთლებლო პროგრამები და სტუდენტური სერვისები გააცნო. მოსწავლეებმა უმაღლესი საგანმანათლებლო დაწესებულების მატერიალურ-ტექნიკური ბაზა, ბიბლიოთეკა, ლაბორატორიები, სასამართლო საიმიტაციო დარბაზი, კრიმინალისტიკის ლაბორატორია დაათვალიერეს და სახალისო ცდებში მიიღეს მონაწილეობა. შეხვედრისას სკოლის მოსწავლეებს სამახსოვრო საჩუქრები გადაეცათ.

ბათუმის შოთა რუსთაველის სახელმწიფო უნივერსიტეტის რექტორი მერაბ ხალვაში, რექტორის მოადგილე ანზორ ბერიძე, ტურიზმის ფაკულტეტის დეკანი ირაკლი კორძაია, საბუნებისმეტყველო მეცნიერებათა და ჯანდაცვის ფაკულტეტის დეკანი რუსუდან ხუხუნაიშვილი და ასოცირებული პროფესორი ლია ჭყონია საპასუხო ვიზიტით ორდუს უნივერსიტეტს ეწვივნენ. ვიზიტის ფარგლებში ორდუს უნივერსიტეტის რექტორთან, პროფესორ ორჰან ბაშთან გამართულ შეხვედრაზე დელეგაციის წარმომადგენლებმა ისაუბრეს უნივერსიტეტებს შორის თანამშრომლობის განვითარებაზე, ერთობლივი საგანმანათლებლო-სამეცნიერო პროექტების განხორციელებასა და გაცვლითი პროგრამების შემუშავებაზე. მხარეთა შეთანხმებით, 28 მაისიდან 1 ივნისამდე ბათუმში ჩატარდება ერთობლივი საერთაშორისო კონგრესი.