ახალი ამბები

ვარშავის უნივერსიტეტის აღმოსავლეთ ევროპის კვლევების განყოფილების საბჭოს გადაწყვეტილებით, ბათუმის რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტის პროფესორ დავით დევაძეს ტიტუს ფილიპოვიჩის სახელობის ჯილდო გადაეცა. პირველი სამეცნიერო-კვლევითი სტაჟირების პროგრამის გამარჯვებული პროფესორი დავით დევაძე სტაჟირებას ორი თვის განმავლობაში, პოლონეთში, ლუბლინის მარია კიური-სკლოდოვსკას უნივერსიტეტში გაივლის. გამარჯვებულს ჯილდო პოლონეთის ელჩმა საქართველოში მარიუშ მაშკიევიჩმა გადასცა. ცერემონიას საქართველოს პრეზიდენტი სალომე ზურაბიშვილი, საგარეო საქმეთა სამინისტროს, ვარშავისა და თბილისის სახელმწიფო უნივერსიტეტების წარმომადგენლები და სხვა ოფიციალური პირები ესწრებოდნენ.

ბათუმის შოთა რუსთაველის სახელმწიფო უნივერსიტეტში უანგარო დონორთა აქცია „ჯანმრთელი სისხლი ყველას” გაიმართა. უმაღლესი საგანმანათლებლო დაწესებულების სტუდენტებმა, პროფესორ-მასწავლებლებმა და თანამშრომლებმა უანგაროდ გაიღეს სისხლი და თანადგომა გამოხატეს იმ ადამიანების მიმართ, რომელთაც დახმარება სჭირდებათ. სისხლის ბანკის შესავსებად ბსუ-ში რამდენიმე წელია ეტაპობრივად იმართება უანგარო დონორთა აქცია.

სახელმწიფო აუდიტის სამსახურსა და სახელმწიფო აუდიტის სამსახურის საჯარო აუდიტის ინსტიტუტთან ბათუმის შოთა რუსთაველის სახელმწიფო უნივერსიტეტმა თანამშრომლობის მემორანდუმი გააფორმა. ხელშეკრულება ითვალისწინებს თეორიული და პრაქტიკული სასწავლო კურსის განხორციელებას. სასწავლო კურსი მიზნად ისახავს სტუდენტებისა და თანამშრომლებისთვის საჯარო აუდიტის დარგის სიახლეების გაცნობას, პრაქტიკული უნარ-ჩვევების განვითარების, გამოცდილების მიღებისა და შრომის ბაზარზე კონკურენტუნარიანობის გაზრდის ხელშეწყობას. ვიზიტის ფარგლებში სახელმწიფო აუდიტის სამსახურის საჯარო აუდიტის ინსტიტუტის დირექტორი გელა წიკლაური, სახელმწიფო აუდიტის სამსახურის აჭარის დეპარტამენტის წარმომადგენლები რექტორთან მერაბ ხალვაშთან ერთად, ეკონომიკისა და ბიზნესის ფაკულტეტის პროფესორ-მასწავლებლებს, სტუდენტებს შეხვდნენ და სამომავლო თანამშრომლობის გეგმები გააცნეს.

ბათუმის შოთა რუსთაველის სახელმწიფო უნივერსიტეტში პროფესიულ საგანმანათლებლო პროგრამებზე ჩარიცხულ სტუდენტებთან შეხვედრა გაიმართა. პროფესიული პროგრამების მართვისა და უწყვეტი განათლების ცენტრის ცენტრის ხარისხის მართვის მენეჯერმა მამუკა გოგელიამ, ცენტრის სასწავლო პროცესის მართვის მენეჯერმა გულადი ფარტენაძემ და პროფესიული პროგრამების ხელმძღვანელებმა სტუდენტებს მიულოცეს პროგრამებზე ჩარიცხვა, გააცნეს უნივერსიტეტის ისტორია, საგანმანათლებლო პროგრამების სტრუქტურა და სასწავლო პროცესთან დაკავშირებული ინფორმაცია. 2019 წლის შემოდგომაზე ბსუ-ს არქიტექტორ-ტექნიკოსის, ბიბლიოთეკარის, ვებინტერფეისის დიზაინერის, ვებინტერფეისის დეველოპერისა და მეფუტკრის პროფესიულ საგანმანათლებლო პროგრამებზე 80-მდე სტუდენტი ჩაირიცხა, მათ შორის 5 სპეციალური საგანმანათლებლო საჭიროების მქონეა.

ბათუმის შოთა რუსთაველის სახელმწიფო უნივერსიტეტის სტუდენტებისთვის საქართველოს ბანკის ორგანიზებით გაიმართა ანდრო დგებუაძის ვორქშოფი ტექნოლოგიურ სამყაროსა და ადამიანის თვითობის მნიშვნელობაზე. ასევე, შეხვედრაზე სტარტაპ „ლანჩობის“ დამაარსებელმა ნიკო რეხვიაშვილმა სტუდენტებს მისცა რჩევები, როგორ გადააქციონ პრობლემები სტარტაპებად. Social Impact Award-ის გამარჯვებულმა სტარტაპერებმა ახალგაზრდებს მიაწოდეს ინფორმაცია თანამედროვე ტექნოლოგიების გამოყენებით ყოველდღიური ცხოვრების შეცვლის შესახებ და საკუთარი მაგალითები გააცნეს. შეხვედრის ბოლოს სტუდენტებს სამახსოვრო საჩუქრები გადაეცათ.