ახალი ამბები

ბათუმის შოთა რუსთაველის სახელმწიფო უნივერსიტეტის აკადემიურმა საბჭომ პროფესორებს პაატა კერვალიშვილსა და ათანასიოს მამალისს საპატიო დოქტორის წოდება მიანიჭა. პროფესორებმა პაატა კერვალიშვილმა და ათანასიოს მამალისმა მნიშვნელოვანი წვლილი შეიტანეს უნივერსიტეტის განვითარებასა და მომავალი თაობების აღზრდაში. ქართველი მკვლევარი 500-მდე სამეცნიერო სტატიის, წიგნის, გამოგონების, მოხსენების ავტორია, ხოლო ბერძენ მეცნიერს გამოქვეყნებული აქვს 32 წიგნი და მონოგრაფია, 12 სახელმძღვანელო, 580 სტატია და 2 პატენტი.

მსოფლიო ჩემპიონს მკლავჭიდში, ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის სტუდენტ მარიამ ნოდიას უნივერსიტეტის რექტორი მერაბ ხალვაში და ადმინისტრაციის წარმომადგენლები შეხვდნენ. რექტორმა სპორტსმენს გამარჯვება მიულოცა, უნივერსიტეტისა და ჯანსაღი ცხოვრების წესის პოპულარიზაციაში შეტანილი განსაკუთრებული წვლილისათვის სერტიფიკატი გადასცა, სწავლის გადასახადისაგან გაათავისუფლა და წარმატებები უსურვა.

ბათუმის შოთა რუსთაველის სახელმწიფო უნივერსიტეტისა და კრაკოვის ეკონომიკური უნივერსიტეტის ერთობლივი სამეცნიერო სემინარი „ევროპული ინტეგრაციის მიღწევები და გამოწვევები (პოლონეთი, საქართველო)“ გაიმართა ბსუ-ში. ღონისძიება რექტორმა მერაბ ხალვაშმა, პროფესორმა ვოიჩეკ გიზამ და რექტორის მოადგილემ ნათია წიკლაშვილმა გახსნეს. სემინარის ფარგლებში ქართველმა და პოლონელმა მკვლევარებმა მოხსენებები წარმოადგინეს ინტეგრაციისა და ეკონომიკის აქტუალურ საკითხებზე. ერთობლივი ღონისძიების დასასრულს დისკუსია გაიმართა.

DAAD-ის საინფორმაციო შეხვედრა ჩატარდა ბათუმის შოთა რუსთაველის სახელმწიფო უნივერსიტეტში. გერმანული აკადემიური გაცვლის სამსახურის წარმომადგენელმა მაქსი ბორნმანმა სტუდენტებსა და პროფესორ-მასწავლებლებს სასწავლო-სამეცნიერო კვლევითი სტიპენდიები, კონკურსში მონაწილეობის წესები, კონკურსანტთა შერჩევის კრიტერიუმები და გერმანიაში სწავლების პირობები გააცნო. DAAD-ის სტიპენდიები განკუთვნილია ყველა საგანმანათლებლო პროგრამის სტუდენტების, პროფესორ-მასწავლებლებისა და მკვლევარებისათვის.

პოეტ ვახტანგ ჯავახაძეს ბათუმის შოთა რუსთაველის სახელმწიფო უნივერსიტეტის ლიტერატურის მოყვარულთა კლუბის წევრები ეწვივნენ. პოეტმა შეხვედრაზე სხვადასხვა ფაკულტეტის სტუდენტებს საკუთარი ლექსები წაუკითხა, თარგმანები გააცნო, თავის შემოქმედებასა და ცნობილ პიროვნებათა ბიოგრაფიულ დეტალებზე ესაუბრა. შეხვედრის დასასრულს სტუდენტებმა პოეტს ბსუ-ს FAB LAB BSU-ში დამზადებული სამახსოვრო საჩუქარი გადასცეს, რომელზეც ავტორის გრაფიკული ლექსი „ავტოპორტრეტი“ არის ამოტვიფრული. ვახტანგ ჯავახაძე შოთა რუსთაველის სახელობის, საბასა და გალას ლიტერატურული პრემიების ლაურეატია.