ახალი ამბები

ბათუმის შოთა რუსთაველის სახელმწიფო უნივერსიტეტმა სტუდენტურ ფესტივალში მიიღო მონაწილეობა. ბსუ-მ ღონისძიებაზე წარადგინა სამრეწველო ინოვაციების ლაბორატორიაში სტუდენტების მიერ დამზადებული პროექტები, ცნობილი შენობების მაკეტები, კონსტრუქციები და ხელნაკეთი ნივთები. დამთვალიერებლებს ასევე საშუალება ჰქონდათ გაცნობოდნენ უმაღლესი საგანმანათლებლო დაწესებულების სასწავლო პროგრამებს, სტუდენტურ ცხოვრებასა და გაცვლით პროგრამებს. ფესტივალი აჭარის ახალგაზრდობის რეგიონული ცენტრის ორგანიზებით გაიმართა.

2007 წლის 7 ნოემბერს ოპოზიციური პარტიების მიერ ორგანიზებული მასშტაბური საპროტესტო აქცია ხელისუფლებამ ძალისმიერი მეთოდების გამოყენებით დაარბია. თბილისში განვითარებული მოვლენები 8 ნოემბერს ბათუმის შოთა რუსთაველის სახელმწიფო უნივერსიტეტის სტუდენტებმა და პროფესორ-მასწავლებლებმა გააპროტესტეს, რასაც ბსუ-ში სპეცრაზმელების ოპერაცია მოჰყვა. ძალოვანები უმაღლეს საგანმანათლებლო დაწესებულებაში შეიჭრნენ, სტუდენტები და პროფესორ-მასწავლებლები დაარბიეს, ხელკეტებით ფიზიკურად გაუსწორდნენ და სასწავლო პროცესის მიმდინარეობისას აუდიტორიებში ცრემლსადენი გაზი გაუშვეს. უნივერსიტეტი კიდევ ერთხელ მიმართავს შესაბამის სამსახურებს გამოძიების მოკლე ვადაში დასრულებისა და დამნაშავეების დასჯის თხოვნით.

ბათუმის შოთა რუსთაველის სახელმწიფო უნივერსიტეტს საფრანგეთის ელჩი საქართველოში დიეგო კოლასი ეწვია. უნივერსიტეტის რექტორთან მერაბ ხალვაშთან გამართულ გაცნობითი ხასიათის შეხვედრაზე დიპლომატიური კორპუსის წარმომადგენელმა ორი ქვეყნის კულტურულ-საგანმანათლებლო ურთიერთობებზე, სამომავლო თანამშრომლობის მიმართულებებსა და გაცვლით პროგრამებზე ისაუბრა. დაიგეგმა ტურიზმის მიმართულებით ერთობლივი საგანმანათლებლო პროგრამის განხორციელება. საფრანგეთის ელჩი საქართველოში დიეგო კოლასი ვიზიტის ფარგლებში ასევე ჰუმანიტარულ მეცნიერებათა ფაკულტეტის სტუდენტებს, პროფესორ-მასწავლებლებს შეხვდა და საელჩოს მისია, მიზნები, ამოცანები გააცნო. შეხვედრის დასასრულს საფრანგეთის ელჩმა შეკითხვებს უპასუხა.

წმიდა დიაკონი სევერიანეს - აჭარელი აღმსარებლისადმი მიძღვნილი საერთაშორისო სამეცნიერო კონფერენცია „ჩვენი სულიერების ბალავარი“ გაიხსნა ბათუმის შოთა რუსთაველის სახელმწიფო უნივერსიტეტში. რიგით XI სამეცნიერო სესიაზე ქართველი და უცხოელი მკვლევარები ბოლო ერთი წლის განმავლობაში წარმოებული სამეცნიერო კვლევა-ძიების შედეგებს შეაჯამებენ. ორდღიან სამეცნიერო ფორუმზე წარმოდგენილი იქნება 40-მდე მოხსენება. კონფერენციის მონაწილეები იმსჯელებენ ისტორიის, ეროვნული ცნობიერების, პოლიტიკის, ფილოსოფიის, ფსიქოლოგიის, ფილოლოგიის, ფოლკლორის, ტოპონიმიკის, ეკლესიის ისტორიის და სხვა სამეცნიერო დარგის აქტუალურ საკითხებსა და პრობლემებზე რელიგიური ასპექტების გათვალისწინებით.

სამოქალაქო განათლების ლექტორთა ასოციაციის CELA-სა და ფრიდრიხ ებერტის ფონდის გრანტის ფარგლებში ბათუმის შოთა რუსთველის სახელმწიფო უნივერსიტეტის სტუდენტთა ჯგუფმა პროექტი „ახალგაზრდების ჩართულობა სამოქალაქო პროცესებში“ განახორციელა. საგრანტო პროექტის ეგიდით ბსუ-ს თავისუფალ სივრცეში გაიმართა ღონისძიება „ისტორიული მეხსიერება" საბჭოთა წარსულის შესახებ. შედგა ფილმის „სხვისი ცხოვრების“ და სტუდენტების მიერ მომზადებული ფილმის „ისტორიული მეხსიერების“ ჩვენება. დასკვნით ღონისძიებაზე „ბათუმი, ქალაქის პერსპექტივები“ ახალგაზრდებმა წარმოადგინეს სტუდენტური პროექტების პრეზენტაციები და გაეცნენ ქალაქის განვითარების შემდეგ აქტუალურ საკითხებს: „ფილოსოფიური ურბანისტიკა და ქალაქის შესახებ ინტერდისციპლინური დისკუსიების პერსპექტივა“, „საბჭოური მენტალობის ძირითადი მახასიათებლები“, „გამქრალი ბათუმი“.