ახალი ამბები

ეკონომიკისა და მდგრადი განვითარების სამინისტროს ინოვაციების და ტექნოლოგიების სააგენტოში პრე-აქსელერატორის პროგრამის პრეზენტაცია გაიმართა. ღონისძიებას ეკონომიკისა და მდგრადი განვითარების სამინისტროს ინოვაციების და ტექნოლოგიების სააგენტოს თავმჯდომარე ავთანდილ კასრაძე და სხვადასხვა უმაღლესი საგანმანათლებლო დაწესებულებების რექტორები დაესწრნენ. პრეზენტაციის შემდეგ საქართველოს ინოვაციების და ტექნოლოგიების სააგენტოს, თბილისის სახელმწიფო უნივერსიტეტს,ბათუმის შოთა რუსთაველის სახელმწიფო უნივერსიტეტს, ილიას სახელმწიფო უნივერსიტეტს, საქართველოს ტექნიკურ უნივერსიტეტს, ბიზნესისა და ტექნოლოგიების უნივერსიტეტს, საქართველოს უნივერსიტეტს, სან დიეგოს უნივერსიტეტს, კავკასიის უნივერსიტეტსა და ქუთაისის სახელმწიფო უნივერსიტეტს შორის თანამშრომლობის მემორანდუმი გაფორმდა.

„საქართველოს პოლიტიკის ინსტიტუტის“ დირექტორმა, ივანე ჯავახიშვილის სახელობის თბილისის სახელმწიფო უნივერსიტეტის პროფესორმა პოლიტიკის მეცნიერების მიმართულებით კორნელი კაკაჩიამ სტუდენტებისთვის სემინარი ჩაატარა თემაზე: „საქართველოს საგარეო პოლიტიკა, იდენტობა და ევროკავშირი“. სემინარი მიზნად ისახავდა ევრო-ატლანტიკური ინტეგრაციის პროცესებზე ცნობიერების ამაღლებას და საქართველოს სტრატეგიული პოლიტიკის მიმართულებით ახალგაზრდებში დისკუსიის წახალისებას. ასევე, შექმნილ გამოწვევებს, კერძოდ ანტიდასავლური დეზინფორმაციის გავრცელებასა და პროპაგანდისტულ კამპანიას.

ბსუ-ში დასრულდა სტუდენტთა თავისუფალი და სამეცნიერო პროექტების კონკურსი. კონკურსის ფარგლებში წარმოდგენილი 10 ზოგადი და 5 სამეცნიერო პროექტიდან გამოვლინდა 5 გამარჯვებული.

ბათუმის შოთა რუსთაველის სახელმწიფო უნივერსიტეტში საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის საჯარო შეხვედრა გაიმართა. კომიტეტის თავმჯდომარემ სოფიო კილაძემ და ბათუმის 69-ე ოლქის მაჟორიტარმა დეპუტატმა საქართველოს პარლამენტში ლევან ბეჟანიძემ მოქალაქეებს სოციალური მუშაობის შესახებ საქართველოს კანონის და ოჯახში ძალადობის პრევენციისკენ მიმართული საკანონმდებლო ცვლილებები გააცნეს.

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა და საქართველოს რაგბის მხარდამჭერთა კლუბის თავმჯდომარემ ილია როდონაიამ თანამშრომლობის მემორანდუმს მოაწერეს ხელი. ხელშეკრულება მიზნად ისახავს ახალგაზრდებში რაგბის პოპულარიზაციას, ერთობლივი სპორტული ღონისძიებების, ტრენინგების, სემინარების ჩატარებასა და პროექტების განხორციელებას. მემორანდუმის გაფორმების შემდეგ სხვადასხვა ფაკულტეტის სტუდენტებთან გამართულ შეხვედრაზე ილია როდონაიამ სამომავლო თანამშრომლობის მიმართულებებზე ისაუბრა.