ახალი ამბები

განათლების საერთაშორისო დღე აღინიშნა ბათუმის შოთა რუსთაველის სახელმწიფო უნივერსიტეტში. ბათუმის N1 და N2 საჯარო სკოლის მოსწავლეებმა ფლეშმობი მოაწყვეს, უმაღლესი საგანმანათლებლო დაწესებულების ეზო მოხატეს, განათლების თემაზე ნახატები შექმნეს და სიმბოლურად ბუშტები გაუშვეს. ღონისძიება უნივერსიტეტისა და აჭარის ა.რ. განათლების, კულტურისა და სპორტის სამინისტროს ორგანიზებით გაიმართა. 24 იანვარი განათლების საერთაშორისო დღედ გაეროს გენერალური ასამბლეის გადაწყვეტილებით გამოცხადდა.

„წითელი ჯვრის“ ბათუმის ფილიალის მოხალისეებმა და ტრენერებმა ბათუმის შოთა რუსთაველის სახელმწიფო უნივერსიტეტის სტუდენტებს ტრენინგი ჩაუტარეს პირველადი სამედიცინო დახმარების თემაზე. სწავლება მიზნად ისახავდა პირველადი დახმარებისათვის აუცილებელი უნარ-ჩვევების ჩამოყალიბებასა და გადაუდებელი სიტუაციების შემთხვევაში პირველადი სამედიცინო დახმარების გაწევისათვის საჭირო ცოდნის მიღებას. პროექტის ფარგლებში ბათუმის შოთა რუსთაველის სახელმწიფო უნივერსიტეტის იურიდიულ და სოციალურ მეცნიერებათა ფაკულტეტის ბაკალავრიატის პირველი საფეხურის სტუდენტთა ინიციატივით, უნივერსიტეტის ყველა კორპუსსა და სართულზე თებერვალში მოეწყობა პირველადი სამედიცინო დახმარების კუთხეები.

ბათუმის შოთა რუსთაველის სახელმწიფო უნივერსიტეტი 2015-2018 წლებში დაფინანსებული ერაზმუს+-ის გაცვლითი პროგრამებისა და პროექტების განაწილების მიხედვით, საქართველოს უმაღლეს საგანმანათლებლო დაწესებულებებს შორის მესამე ადგილზეა. ერაზამუს+-ის საქართველოს ეროვნული ოფისის სტატისტიკის მიხედვით, ამ დროის განმავლობაში ბსუ-მ განახორციელა გაცვლითი პროგრამები სტუდენტების, პროფესორ-მასწავლებლებისა და ადმინისტრაციული პერსონალის მონაწილეობით 45 პარტნიორული ხელშეკრულების ფარგლებში. უნივერსიტეტი ასევე ჩაერთო უმაღლესი საგანმანათლებლო დაწესებულებების ინსტიტუციური განვითარების 9 პროექტში და ყოველწლიურად ატარებს ჟან მონეს საზაფხულო სკოლას.

წარმატებით გაიარა პროგრამული აკრედიტაცია ბსუ-ს ბიზნესის ადმინისტრირების სადოქტორო საგანმანათლებლო პროგრამამ („ფინანსები, ფულის მიმოქცევა და კრედიტი“; „ბიზნესის ადმინისტრირება“). ვულოცავთ ფაკულტეტის სტუდენტებსა და პროფესორ-მასწავლებლებს ამ მნიშვნელოვან გამარჯვებას.

მაკედონიის დედაქალაქ სკოპიეში ევროკავშირის პროგრამა „ჰორიზონტი 2020“-ის KEAC-BSR - „ცოდნის გაცვლა და აკადემიური კულტურები ჰუმანიტარულ სფეროში: ევროპა და შავი ზღვის აუზი, XVIII-XXI სს“ ფარგლებში ჩატარდა საერთაშორისო სამეცნიერო კონფერენცია თემაზე: „ცოდნის გაცვლა აკადემიურ კულტურებში მიგრაციის გზით ევროპასა და შავი ზღვის ქვეყნებში და მათ შორის“ (პირველ მსოფლიო ომამდე პერიოდი)“. ერთკვირიან სამეცნიერო სესიაში მონაწილეობა მიიღეს ბსუ-ს რექტორის მოადგილემ თამარ სირაძემ, პროფესორმა მარინე აროშიძემ, ასოცირებულმა პროფესორებმა: ნინო აროშიძემ, თამაზ ფუტკარაძემ, მანუჩარ ლორიამ და დოქტორანტმა ქეთევან ფუტკარაძემ. კონფერენცია მიზნად ისახავდა ისეთი აქტუალური საკითხების განხილვას, როგორიცაა: ბალკანეთი და კავკასია მიგრაციის გზაჯვარედინზე და ცოდნის გაცვლა, გადასახლებული აკადემიური ელიტა ეროვნული საგანმანათლებლო ინსტიტუციების განვითარებისათვის ბრძოლაში, აკადემიური მიგრაცია და სამეცნიერო მიღწევები.