ახალი ამბები

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა და კორნელი კეკელიძის სახელობის საქართველოს ხელნაწერთა ეროვნული ცენტრის დირექტორმა ზაალ აბაშიძემ თანაშრომლობის მემორანდუმს მოაწერეს ხელი. ხელშეკრულება მიზნად ისახავს ერთობლივი საგანმანათლებლო და სამეცნიერო პროექტების განხორციელებას. მხარეთა შეთანხმებით, დაიგეგმა სამეცნიერო კონფერენციებისა და სემინარების ჩატარება, გამოფენების მოწყობა, სამეცნიერო რესურსების გამოყენება, სტაჟირების პროგრამის ამოქმედება და სამეცნიერო გამოცემებში სტატიებისა და პუბლიკაციების გამოქვეყნება. ასევე, ბსუ-ს დოქტორანტებსა და მაგისტრანტებს სამეცნიერო თანახელმძღვანელობას გაუწევენ ცენტრის მკვლევრები.

ბათუმის შოთა რუსთაველის სახელმწიფო უნივერსიტეტი „ბათუმის წიგნისა და უმაღლესი განათლების მეორე საერთაშორისო გამოფენაში“ მონაწილეობს. გამოფენის გახსნის ღონისძიებაზე ბსუ-ს რექტორი, მერაბ ხალვაში მონაწილეებს მიესალმა და ყურადღება გაამახვილა განათლების ფორუმის ჩატარების მნიშვნელობაზე. გამოფენაზე დამთვალიერებლები გაეცნენ ბსუ-ს პროფესორ-მასწავლებელთა და მკვლევართა ავტორობით გამოცემულ მონოგრაფიებსა და სახელმძღვანელოებს. შედგა ბსუ-ს პრეზენტაცია, სადაც წარმოდგენილი იყო საგანმანათლებლო და გაცვლითი პროგრამები, სერვისები და სამეცნიერო პროექტები.

ბსუ-ში ივანე ჯავახიშვილის სახელობის თბილისის სახელმწიფო უნივერსიტეტისა და ბათუმის შოთა რუსთაველის სახელმწიფო უნივერსიტეტის თანამონაწილეობით შექმნილი კონსორციუმის საგრანტო პროექტის „საჯარო მმართველობის სამართლის სამაგისტრო პროგრამის კონცეფციის შემუშავება” შუალედური შედეგების პრეზენტაცია გაიმართა. ღონისძიება გახსნეს და მონაწილეებს მიესალმნენ ბსუ-ს რექტორის მოადგილეები თამარ სირაძე და ანზორ ბერიძე. მრგვალი მაგიდის ფორმატში მონაწილე აკადემიურმა პერსონალმა და საჯარო სამსახურების წარმომადგენლებმა განიხილეს საჯარო მმართველობის სამართლის სამაგისტრო პროგრამის კონცეფციის პროექტი, პროგრამის ძირითადი კომპონენტები, სწავლა-სწავლების მეთოდები, კონცეფციის დანერგვისა და განხორციელების გამოწვევები. შეხვედრას უძღვებოდნენ ბსუ-სა და თსუ-ს პროფესორები: ლევან ჯაყელი, პაატა ტურავა, ნანა ჭიღლაძე, ეკა ქარდავა, ირაკლი კახიძე.

ბათუმის შოთა რუსთაველის სახელმწიფო უნივერსიტეტს იაპონიის საგანგებო და სრულუფლებიანი ელჩი საქართველოში იშიძუკა ჰიდეკი ეწვია. ბსუ-რექტორის მოადგილეებთან, თამარ სირაძესთნ, ანზორ ბერიძესთან და სტრატეგიული განვითარებისა და საგარეო ურთიერთობათა დეპარტამენტის უფროსთან, მარინე გიორგაძესთან გამართულ გაცნობითი ხასიათის შეხვედრაზე დიპლომატიური კორპუსის წარმომადგენელმა ორ ქვეყანას შორის არსებულ მეგობრულ ურთიერთობებსა და სამომავლო თანამშრომლობის პერსპექტივებზე ისაუბრა. იაპონიის საგანგებო და სრულუფლებიანმა ელჩმა იშიძუკა ჰიდეკმა ასევე წარმოადგინა იაპონიის სამთავრობო საგრანტო პროგრამები და სტიპენდიები. მხარეთა შეთანხმებით, დაიგეგმა ერთობლივი საგანმანათლებლო და სამეცნიერო პროექტების განხორციელება.

ბათუმის შოთა რუსთაველის სახელმწიფო უნივერსიტეტის ღია კარის დღეები აბიტურიენტებისთვის გრძელდება. ბათუმის, ხელვაჩაურისა და ქობულეთის საჯარო სკოლების მეთორმეტე კლასის მოსწავლეებისათვის საინფორმაციო შეხვედრები ჩაატარეს ბსუ-ს პროფესორ-მასწავლებლებმა და სტუდენტებმა. შეხვედრებზე ახალგაზრდები უნივერსიტეტის საგანმანათლებლო პროგრამებს, სწავლების პირობებს, გაცვლით პროგრამებს, სტიპენდიებს, სოციალურ პროგრამებს, სტუდენტურ ცხოვრებასა და არსებულ სიახლეებს გაეცნენ. საინფორმციო შეხვედრების დასარულების შემდეგ, აბიტურიენტებს ბსუ-ს სამახსოვრო საჩუქრები გადაეცათ.