ახალი ამბები

თურქეთის რესპუბლიკის გენერალური კონსული მაქბულე ქოჩაკი ბათუმის შოთა რუსთაველის სახელმწიფო უნივერსიტეტის რექტორს მერაბ ხალვაშს და ჰუმანიტარულ მეცნიერებათა ფაკულტეტის დეკანს მარინე გიორგაძეს შეხვდა. უნივერსიტეტისა და დიპლომატიური კორპუსის წარმომადგენლებმა ერთობლივ განხორციელებულ ღონისძიებებზე ისაუბრეს და სამომავლო თანამშრომლობის პერსპექტივები განიხილეს. ჰუმანიტარულ მეცნიერებათა, საბუნებისმეტყველო მეცნიერებათა და ჯანდაცვის ფაკულტეტებთან დაიგეგმა ერთობლივი ახალი პროექტების განხორციელება.

საქართველოს პარლამენტის ფრაქციის “ქართული ოცნება - სოციალ-დემოკრატების“ თავმჯდომარემ, თსუ-ს პროფესორმა გია ჟორჟოლიანმა ბათუმის შოთა რუსთაველის სახელმწიფო უნივერსიტეტის სტუდენტებისათვის საჯარო ლექცია წაიკითხა თემაზე: „თანამედროვე საქართველოს განვითარების პერსპექტივები“. პარლამენტარმა ახალგაზრდებს ქვეყნის ეკონომიკური განვითარების პერსპექტივები და მათი გამოყენების შესაძლებლობები გააცნო. პროფესორმა გია ჟორჟოლიანმა საუბრისას ყურადღება გაამახვილა ასევე დემოკრატიულ ღირებულებებსა და ადამიანის უფლებათა დაცვის საკითხებზე.

ბათუმის შოთა რუსთაველის სახელმწიფო უნივერსიტეტში, ტექნოლოგიური ფაკულტეტის ბაზაზე ინოვაციების ცენტრი გაიხსნა. ცენტრი Erasmus+“-ის საგრანტო პროექტის - „InnoCENS Project“ (Enhacing Innovation Competencesand Entrepreneurial Skillsin Engineering Education - ინოვაციური კომპეტენციებისა და სამეწარმეო უნარების ამაღლება საინჟინრო განათლებაში) ფარგლებში შეიქმნა და მიზნად ისახავს საინჟინრო სწავლებაში თანამედროვე სამეწარმეო მიდგომების დანერგვას, ინოვაციური კომპეტენციების განვითარებას, სტარტაპებისა და სპინოფების ჩამოყალიბებას. ინოვაციური ცენტრი პროფესორ-მასწავლებლებთან ერთად, გახსნა ვალენსიის პოლიტექნიკური უნივერსიტეტის პროფესორმა, ბიზნეს მენეჯერმა იზრაელ გრიოლ ბარესმა. ტრენერები ბსუ-დან ბოლო ერთი წლის განმავლობაში 7 სხვადასხვა ქვეყანაში გადიოდნენ სწავლების კურსს, რომლის მიხედვითაც ევროპულ გამოცდილებას მსმენელებს საგანმანათლებლო პროცესში გაუზიარებენ.

„Tea grown in Europe“-ს ასოციაციის პრეზიდენტი დენიზ მაზეროლი ბათუმის შოთა რუსთველის სახელმწიფო უნივერსიტეტის რექტორის მოადგილეს, პროფესორ ნათია წიკლაშვილს, სამეცნიერო ინსტიტუტების მეცნიერ-თანამშრომლებსა და სამეცნიერო კვლევების სამსახურის წარმომადგენლებს შეხვდა. ვიზიტი მიზნად ისახავდა სამეცნიერო-კვლევით დაწესებულებებთან სამომავლო თანამშრომლობის მიმართულებების განსაზღვრას. მხარეებმა შეხვედრაზე იმსჯელეს ევროპაში, საფრანგეთის ბრეტანის ტერიტორიაზე ქართული ჩაის სხვადასხვა ჯიშის გაშენების შესაძლებლობებზე.

საქართველოს დამოუკიდებლობის აღდგენის ასი წლის იუბილე ბათუმის შოთა რუსთაველის სახელმწიფო უნივერსიტეტში რამდენიმე დღიანი ღონისძიებების ციკლით საზეიმოდ აღინიშნება. კვირეული 18 მაისს დაიწყო არაფორმალურ გარემოში საჯარო ლექციითა და დისკუსიით თემაზე: „საქართველოს სახელმწიფოებრივი დამოუკიდებლობის აღდგენა (1918-1921 წწ.)“, რომელშიც სტუდენტებთან და პროფესორ-მასწავლებლებთან ერთად, მონაწილეობა მიიღო ბათუმის მერმა ლაშა კომახიძემ. 25 მაისს დამოუკიდებლობის აღდგენის ამსახველი ვიდეორგოლის ჩვენება შედგა და ფოტო-გამოფენა გაიხსნა. VI სამეცნიერო კონფერენცია ჩატარდა თემაზე: „სწავლებისა და აღზრდის აქტუალური პრობლემები“, რომელშიც განათლების ფაკულტეტის სტუდენტები და აჭარის სკოლების 200-მდე მოსწავლე მონაწილეობდა. მთელი დღის განმავლობაში სტუდენტების მონაწილეობით მიმდინარეობდა აქცია „დავამზადოთ და ვატაროთ კოკარდები“.