ახალი ამბები

ბსუ-ს პროფესორმა თამარ სირაძემ, ასოცირებულმა პროფესორებმა მარინა ნაგერვაძემ და თათია ნაკაშიძე-მახარაძემ ევროკომისიის მიერ დაფინანსებული პროექტის „კვლევის პასუხისმგებლიანად წარმართვა – კვლევის კეთილსინდისიერება და ეთიკა ქართულ უნივერსიტეტებში (ETHICS)“ ფარგლებში ჩატარებულ ტრენერთა ტრენინგში მიიღეს მონაწილეობა. შეხვედრას უძღვებოდნენ ამსტერდამის თავისუფალი უნივერსიტეტის, მასარიკის უნივერსიტეტისა და აკადემიური კეთილსინდისიერების ევროპული ასოციაციის დარგის ექსპერტები. ETHICS-ის პროექტის მიზანია კვლევის ეთიკისა და კეთილსინდისიერების მიმართულებით არსებული მექანიზმების, პროცედურებისა და სერვისების გაუმჯობესება უნივერსიტეტების დონეზე.

ბათუმის შოთა რუსთაველის სახელმწიფო უნივერსიტეტი მონაწილეობს ევროკავშირის პროგრამის „ერაზმუს+“-ის პროქტში Bologna Hub Peer Support II. პროექტი მიზნად ისახავს ბოლონიის პროცესის იმპლემენტაციის ხელშეწყობას და კოლეგიალურ-საკონსულტაციო აქტივობის განხორციელებას სხვადასხვა უმაღლეს საგანმანათლებლო დაწესებულებაში. ბსუ-ში პროექტის ფარგლებში, საკონსულტაციო სემინარები ჩატარდა სწავლებისა და სწავლის ინოვაციურ მიდგომებზე, კურიკულუმის განვითარებაზე, მობილობასა და ინტერნაციონალიზაციაზე. სემინარებს უძღვებოდნენ - ეკონომიკისა და ბიზნესის ვენის უნივერსიტეტის პროფესორი, დოქტორი ოლივერ ვეტორი და მიუნსტერის უნივერსიტეტის გამოყენებითი მეცნიერებების ხარისხის უზრუნველყოფისა და განვითარების ცენტრის პროფესორი, დოქტორი სონია მიკესკა.

ბსუ-ს ფიტოპათოლოგიისა და ბიომრავალფეროვნების ინსტიტუტის კოლხეთის ტორფნარებისა და წყლის ეკოსისტემების კონსერვაციის განყოფილების ხელმძღვანელმა, მკვლევარმა იზოლდა მაჭუტაძემ მონაწილეობა მიიღო ანტვერპენის უნივერსიტეტში (ბელგია), 19-21 სექტემბერს გამართულ სიმპოზიუმში „გააძლიერე ბუნება, კლიმატი და მომავალი ახლავე“. სიმპოზიუმის 550 მონაწილემ, მათ შორის ევროპარლამენტისა და ევროკომისიის წარმომადგენლებმა, მოითხოვეს ევროპაში ერთობლივი გადაუდებელი ზომების მიღება ეკოსისტემების დასაცავად. კონფერენციაზე მომზადდა დეკლარაცია, რომელსაც მხარს უჭერს 90-ზე მეტი ხელმომწერი - ევროკავშირის პროექტების წარმომადგენლები, მეცნიერები, ბათუმის შოთა რუსთაველის სახელმწიფო უნივერსიტეტი, არასამთავრობო ორგანიზაციები და ფერმერები. დეკლარაცია გადაგზავნილია ევროპარლამენტში.

ბსუ-ს იურიდიული და სოციალურ მეცნიერებათა ფაკულტეტის სამართალმცოდნეობის მიმართულების პირველკურსელებს ირაკლი კობახიძის წიგნი „კონსტიტუციური სამართალი” საჩუქრად გადაეცათ. იურიდიული სახელმძღვანელოების სერიიდან ირაკლი კობახიძის წიგნი სტუდენტებს აჭარის უმაღლესი საბჭოს წევრებმა: გიორგი მანველიძემ და ტიტე აროშიძემ ბსუ-ს რექტორთან, მერაბ ხალვაშთან და იურიდიული და სოციალურ მეცნიერებათა ფაკულტეტის დეკანთან, ლევან ჯაყელთან ერთად გადასცეს. შეხვედრაზე ისაუბრეს „კონსტიტუციური სამართალის“ მნიშვნელობასა და სახელმწიფო მოწყობის პრინციპების ცოდნის აუცილებლობაზე. ბსუ-ს სამართალმცოდნეობის სტუდენტებს წიგნი „კონსტიტუციური სამართალი” საჩუქრად ყოველ წელს გადაეცემათ.

ბათუმის შოთა რუსთაველის სახელმწიფო უნივერსიტეტს საფრანგეთის სრულუფლებიანი ელჩი საქართველოში შერაზ გასრი ეწვია. უნივერსიტეტის რექტორთან მერაბ ხალვაშთან გამართულ გაცნობითი ხასიათის შეხვედრაზე დიპლომატიური კორპუსის წარმომადგენელმა ორი ქვეყნის კულტურულ-საგანმანათლებლო ურთიერთობებზე, სამომავლო თანამშრომლობზე, გაცვლით პროგრამებსა და სამეცნიერო კვლევების მიმართულებით თანამშრომლობის გაღრმავების აუცილებლობაზე ისაუბრა. მხარეებმა შეხვედრაზე ასევე იმსჯელეს ერთობლივი ქართულ-ფრანგული სამაგისტრო პროგრამის - „ტურიზმი“ შექმნის შესახებ, რომელიც ანჟერის უნივერსიტეტთან ერთად მზადდება. გარდა ამისა, უნივერსიტეტში, ტურიზმის ფაკულტეტის ბაზაზე AUF-ს ცენტრი გაიხსნება, რაც კიდევ უფრო გააძლიერებს ურთიერთობას ფრანგულ უნივერსიტეტებთან.