ახალი ამბები

ბათუმის შოთა რუსთაველის სახელმწიფო უნივერსიტეტის აგრარული მიმართულებისა და საბუნებისმეტყველო მეცნიერებათა და ჯანდაცვის ფაკულტეტის 18-მა სტუდენტმა და კურსდამთავრებულმა აჭარის ა.რ. სოფლის მეურნეობის სამინისტროს 2023 წლის ქვეპროგრამის „საგანმანათლებლო და სამეცნიერო პრაქტიკის დანერგვის“ ქვეპროგრამის ფარგლებში, სამინისტროსა და მის საქვეუწყებო დაწესებულებებში ანაზღაურებადი რვათვიანი სტაჟირება გაიარა. შეხვედრაზე სტაჟიორებმა შემაჯამებელი პრეზენტაცია წარმოადგინეს. სოფლის მეურნეობის მინისტრმა და ბსუ-ს რექტორმა, პროფესორმა მერაბ ხალვაშმა ახალგაზრდებს მადლობა გადაუხადეს სტაჟირების პროგრამაში წარმატებული მონაწილეობისთვის და წარმატებები უსურვეს.

ბათუმის შოთა რუსთაველის სახელმწიფო უნივერსიტეტში სტუდენტთა ნახატების გამოფენა გაიმართა. გამოფენაზე წარმოდგენილი იყო სხვდასხვა ფაკულტეტის სტუდენტების: ნუკრი თურმანიძის, ვახო გორგილაძის, იური აზაროვის, ანა არძენაძის, მარიამ ზოიძის, რუთი მალაყმაძის, დალილა მიქელაძის, ანეტი ქარცივაძის, ნიკა საჯაიას, ლიკა აბაშიძის, ნინო ნემსაძის, მარიამ ჭანტურიას, ანეტა ცენტერაძის და ნინო მელაძის 60-მდე ნახატი. აღნიშნული ღონისძიება ბსუ-ში ყოველწლიურად იმართება და მიზნად ისახავს მოყვარული მხატვრების მხარდაჭერასა და მათი შემოქმედების პოპულარიზაციას. გამოფენა ბსუ-ს ფოტო-ვიდეო ხელოვანთა სტუდენტური კლუბის ორგანიზებითა და სტუდენტთა კარიერული განვითარების, კულტურისა და სპორტის დეპარტამენტის მხარდაჭერით გაიმართა.

ბსუ-ს ტურიზმის ფაკულტეტის ორგანიზებით ჰილტონ ბათუმის ESG აკადემიის საინფორმაციო შეხვედრა გაიმართა. ჰილტონ ბათუმის გუნდი გენერალური მენეჯერის პატრიკ ნოთერის ხელმძღვანელობით ტურიზმის, ეკოლოგიისა და სხვადასხვა საგანმანთლებლო პროგრამის დაინტერესებულ სტუდენტებს სასტუმროს გარემოსდაცვითი საქმიანობის და კორპორაციული პასუხისმგებლობის შესახებ ესაუბრა. ენერგორესურსების დაზოგვის, ნარჩენების შემცირებისა და გადამუშავების მეთოდების შესახებ ცნობიერების ამაღლება პირველი ნაბიჯია ბიზნესის მართვის ეკოლოგიური მოდელის დასანერგად. ტურიზმის ფაკულტეტისა და ჰილტონ ბათუმის თანამშრომლობის ფარგლებში ერთობლივად დაგეგმილ სამომავლო აქტივობებში ბსუ-ს სტუდენტები შეძლებენ გარემოსდაცვითი და მოხალისეობრივი პროექტების განხორცილებაში მონაწილეობას, რომელიც მიმართული იქნება მდგრადი განვითარების მიზნების მიღწევისკენ.

ბათუმის შოთა რუსთაველის სახელმწიფო უნივერსიტეტში „Erasmus+”-ის ეროვნული ოფისის ხელმძღვანელმა საქართველოში მარიამ სულაშვილმა, ოფისის წევრებმა და ევროკავშირის „Erasmus+-ის პროგრამაში საქართველოს მონაწილეობის მიზანშეწონილობის კვლევის“ წარმომადგენლებმა - სებასტიან შვაიცერმა, ისრაელ პერალტმა და ნინა გოგოლაძემ ბათუმში მოქმედ საგანმანათლებლო დაწესებულებებს „Erasmus+“-ის პროგრამისა და მისი დაფინანსების შესაძლებლობები გააცნეს. საინფორმაციო შეხვედრის ფარგლებში, ჩატარდა ვორქშოფები, რომელიც მოიცავდა შემდეგ საგანმანათლებლო სექტორს: უმაღლესი განათლება, პროფესიული განათლება, ზრდასრულთა განათლება, ახალგაზრდობა, სპორტი და სკოლები.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის აღმოსავლეთმცოდნეობის დეპარტამენტის საერთაშორისო სამეცნიერო ელექტრონულ ჟურნალ „აღმოსავლეთმცოდნეობის მაცნეს“ (E-ISSN 2720-8168; ISSN 2587-490X) საერთაშორისო სამეცნიერო ინდე-ქსირების (ISI)/International Scientific Indexing ბაზაში მიენიჭა იმპაქტ ფაქტორის - 1.668 კოეფიციენტი (2023-2024). საერთაშორისო სამეცნიერო ჟურნალი აღმოსავლეთმცოდნეობის მაცნე დაარსდა 2018 წელს ბსუ-ს ჰუმანიტარულ მეცნიერებათა ფაკულტეტის აღმოსავლეთმცოდნეობის დეპარტამენტის ბაზაზე.