ახალი ამბები

ენათა ელექტრონული დოკუმენტაციის თანამედროვე მეთოდების სწავლებას, ელექტრონული სწავლებისა და ქართულ საუნივერსიტეტო სივრცეში კვლევის უახლესი მეთოდების დანერგვის საკითხებს მიეძღვნა საზაფხულო სკოლა „ტექსტების ელექტრონული დოკუმენტაცია - ლინგვისტური, ეთნოლოგიური და კულტუროლოგიური ასპექტები“. ქართველოლოგიის სკოლა ბათუმის შოთა რუსთაველის სახელმწიფო უნივერსიტეტში ფრანკფურტის ლინგვისტური წრის ინიციატივითა და ფრანკფურტის იოჰან ვოლფგანგ გოეთეს უნივერსიტეტთან გაფორმებული მემორანდუმის ფარგლებში ტარდება. სწავლება ათი დღის განმავლობაში სამი სექციის მიმართულებით წარიმართება და ქართველოლოგიის ისეთ პრობლემებს დაეთმობა, როგორიცაა: უარყოფის კატეგორია, პირდაპირი და ირიბი ნათქვამი ქართველურ ენებში, დამწერლობა და მისი მნიშვნელობა ისტორიული მეხსიერებისა და ეროვნული კონცეპტუალიზაციის კვლევისათვის, ქართული ეთნოგრაფიული ყოფა ვიზუალური ანთროპოლოგიის ჭრილში

საერთაშორისო ქართულ-ჩერქეზული საზაფხულო სკოლა გაიხსნა ბათუმის შოთა რუსთაველის სახელმწიფო უნივერსიტეტში. ქართველი მეცნიერები ჩერქეზ საზოგადო მოღვაწეებთან ერთად ერთი კვირის განმავლობაში ჩერქეზ და ქართველ სტუდენტებს სემინარებს ჩაუტარებენ ორი ქვეყნის ისტორიის, კულტურის, ეთნოლოგიის, ენათმეცნიერებისა და ხალხური მედიცინის შესახებ. პროექტის ფარგლებში დაგეგმილია საგანმათლებლო-შემეცნებითი და კულტურული ღონისძიებების განხორციელება. ასევე იწარმოებს საველე ექსპედიციები ფიჭვნარში, გონიო-აფსაროსის მუზეუმ-ნაკრძალში, მაღალმთიან აჭარაში, ანაკლიასა და ქუთაისში. საზაფხულო სკოლაში მონაწილეობის მისაღებად ჩრდილოეთ კავკასიიდან 15 ეთნიკური ჩერქეზი ჩამოვიდა. სემინარები ბათუმის შოთა რუსთაველის სახელმწიფო უნივერსიტეტისა და „ჩერქეზული (ადიღეური) კულტურის ცენტრის ორგანიზებით იმართება. ქართულ-ჩერქეზული საზაფხულო სკოლა პირველად ტარდება და მომავალში ტრადიციულ სახეს მიიღებს

ევროკავშირის მიერ დაფინანსებული TEMPUS-ის 8 და Erasmus Mundus-ის 3 საგრანტო პროექტი მოიპოვა ბათუმის შოთა რუსთაველის სახელმწიფო უნივერსიტეტმა. პროექტები ახალი სასწავლო წლიდან სხვადასხვა მიმართულებით განხორციელდება და ხელს შეუწყობს უმაღლესი საგანმანათლებლო დაწესებულების განვითარებას, სწავლისა და სწავლების ხარისხის ამაღლებას და ევროპულ უნივერსიტეტებთან თანამშრომლობის გაღრმავებას. პროგრამები ასევე ითვალისწინებს საბაზრო ეკონომიკის შესაბამისი საგანმანათლებლო პროგრამების შემუშავებას, ახალი საინფორმაციო ტექნოლოგიების გამოყენებას, გამოცდილების გაზიარებას და უმაღლესი განათლების სისტემის მოდერნიზებას

ბათუმის შოთა რუსთაველის სახელმწიფო უნივერსიტეტსა და ტალინის უნივერსიტეტს შორის გაფორმებული თანამშრომლობის მემორანდუმის ფარგლებში დაგეგმილი პროექტის „სწავლების ხარიხის გაუმჯობესება თბილისისა და ბათუმის უნივერისტეტების სოციალურ მეცნიერებათა ფაკულტეტებზე“ ეგიდით რამდენიმე სემინარი გაიხსნა. სამი დღის განმავლობაში პარტნიორი უმაღლესი საგანმანათლებლო დაწესებულებების პროფესორ-მასწავლებლები მაარიკა მილი, ლარისა ჯოგი, ვერონიკა როგალევიჩი და მანუჩარ ლორია სემინარებს უძღვებოდნენ თემებზე: „სწავლება და შეფასება უნივერსიტეტში“, „ელექტრონული კურსების გამოყენება სწავლების პროცესში“ და „ელექტრონული კურსების შექმნა პროგრამა Moodle-ის მაგალითზე“. ტრენინგები მიზნად ისახავდა რსუ-ს პროფესორ-მასწავლებლებისა და დოქტორანტებისათვის ხარისხიანი ონლაინ კურსების მომზადების სწავლებას.

საპასუხო ვიზიტით ბათუმის შოთა რუსთაველის სახელმწიფო უნივერსიტეტს ნახჭევანის უნივერსიტეტის დელეგაცია ეწვია. უმაღლესი საგანმანათლებლო დაწესებულების ზოგადი ისტორიის დეპარტამენტის ხელმძღვანელი ჯაფაროვ ჰამზა რზა და სოციალური რეგულირებისა და ტურიზმის კათედრის გამგე ხაფიზ ხუსეინოვი სტუდენტებთან ერთად უნივერსიტეტის რექტორს, პროფესორ ალიოშა ბაკურიძეს, დეკანებსა და დეპარტამენტის ხელმძღვანელებს შეხვდნენ. ვიზიტის ფარგლებში სტუმრები ბათუმის ღირსშესანიშნაობებს, ბოტანიკურ ბაღს, ფიჭვნარში მიმდინარე არქეოლოგიურ გათხრებს გაეცნობიან და აჭარის მაღალმთიან რაიონებს ეწვევიან. ნახჭევანის უნივერსიტეტის ბიომრავალფეროვნების, ტურიზმის, არქეოლოგიის მიმართულების 9 სტუდენტი ერთი კვირის განმავლობაში ბათუმის შოთა რუსთაველის სახელმწიფო უნივერსიტეტის ბაზაზე სასწავლო პრაქტიკას გაივლის