ახალი ამბები

ბათუმის შოთა რუსთაველის სახელმწიფო უნივერსიტეტის კურსდამთავრებულთა საზეიმო გაცილება გაიმართა. რექტორმა, პროფესორმა ალიოშა ბაკურიძემ მანტიებში გამოწყობილ წარჩინებულ სტუდენტებს უმაღლესი საგანმანათლებლო დაწესებულების დამთავრება მიულოცა და სიგელები და სამახსოვრო საჩუქრები გადასცა. ახალგაზრდებს გზა დაულოცეს და წარმატებები უსურვეს აჭარის უმაღლესი საბჭოს თავმჯდომარემ მიხეილ მახარაძემ, აჭარის განათლების, კულტურისა და სპორტის მინისტრმა გია აბულაძემ, ქალაქ ბათუმის მერმა რობერტ ჩხაიძემ, დეკანოზმა, მამა თევდორემ და საზოგადოების წარმომადგენლებმა. უნივერსიტეტი წელს 932 სტუდენტმა დაამთავრა. კურსდამთავრებულთა საზეიმო გაცილების ფარგლებში საუნივერსიტეტო ცხოვრების ამსახველი ფოტოგამოფენა მოეწყო. მაყურებლის წინაშე წარსდგენ ბათუმის შოთა რუსთაველის სახელმწიფო უნივერსიტეტის ქორეოგრაფიული ანსამბლი ,,ტბეთი“, თანამედროვე ცეკვის ანსამბლი ,,M style 13”, ფოლკლორული და ვოკალური ანსამბლები. კურსდამთავრებულთა საზეიმო გაცილების ცერემონია ჯგუფი ,,მგზავრების“ კონცერტით, მანათობელი ფრანებისა და ფოიერვერკების გაშვებით დასრულდა

უნივერსიტეტის რექტორმა, პროფესორმა ალიოშა ბაკურიძემ, აჭარის სპორტისა და ახალგაზრდულ საქმეთა დეპარტამენტის უფროსმა ნოდარ ფუტკარაძემ და ფაკულტეტის დეკანებმა ,,სტუდენტური დღეები - 2012“-ის, ,,სტუდენტური უნივერსიადა - 2012“-ისა და ,,სტუდენტური დღეები - აჭარა 2012“-ის გამარჯვებულ სტუდენტებს მედლები, თასები, სერტიფიკატები და სამახსოვრო საჩუქრები გადასცეს. აჭარის მთავრობის მხარდაჭერით შემოქმედებითი ჯგუფები თურქეთში გაემგზავრებიან და რიზეს უნივერსიტეტში კონცერტს გამართავენ. ფესტივალში ,,სტუდენტური დღეები 2012“ ქვეყნის 30 უმაღლესი სასწავლებლის 2000-მდე სტუდენტი მონაწილეობდა. ახალგაზრდებს საშუალება მიეცათ საკუთარი ნიჭი და შესაძლებლობები სხვადასსხვა მიმართულებით წარმოეჩინათ. კონკურსი ჩატარდა როგორც ინდივიდუალურ, ასევე ჯგუფურ ნომინაციებში.

საქართველოს ეკონომიკისა და მდგრადი განვითარების სამინისტროს წარმომდგენლებმა თემურ ბოლოთაშვილმა და ვაჟა კუხიანიძემ საინჟინრო-ტექნოლოგიური ფაკულტეტის სტუდენტებს, პროფეორ-მასწავლებლებსა და სხვადასხვა კომპანიის თანამშრომლებს საერთაშორისო სამშენებლო კოდები - ,,შენობის წესები“ წარუდგინეს. სტუმრებმა შეხვედრაზე ასევე ისაუბრეს საერთაშორისო სამშენებლო კოდების საბჭოს საქმიანობასა და საქართველოში სამშენებლო საქმიანობის მარეგულირებელ კანონმდებლობაზე. სამინისტროს საგრანტო პროექტის ფარგლებში ,,შენობის წესების“ თარგმნა მიმდინარეობს, რომელიც უახლოეს მომავალში საგანმანათლებლო პროგრამებსა და სამშენებლო პროცესში დაინერგება.

ქ. ბათუმში აზერბაიჯანის რესპუბლიკის გენერალურმა კონსულმა გუსეინ ნაჯაფოვმა უნივერსიტეტს ნახჭევანის ა.რ. უმაღლესი მეჯლისის თავმჯდომარის, ბათუმის შოთა რუსთაველის სახელმწიფო უნივერსიტეტის საპატიო დოქტორის ვასიფ იუსიფ ტალიბოვის საჩუქარი - თანამედროვე, მაღალტექნოლოგიური აპარატურა გადასცა. სტუმრებმა რექტორთან, პროფესორ ალიოშა ბაკურიძესთან, აჭარის განათლების, კულტურისა და სპორტის მინისტრთან გია აბულაძესთან, ადმინისტრაციის ხელმძღვანელთან ედიშერ ჩავლეიშვილთან და დეკანებთან გამართულ შეხვედრაზე სამომავლო გეგმებზე ისაუბრეს. აჭარის მთავრობის თავმჯდომარის ლევან ვარშალომიძის ინიციატივით ნახიჩევანის უნივერსიტეტსა და ბათუმის სახელმწიფო უნივერსიტეტს შორის თანამშრომლობას საფუძველი რამდენიმე ხნის წინ ჩაეყარა. აჭარის ა.რ. მთავრობის თავმჯდომარე აღმასრულებელი ხელისუფლების წარმომადგენლებთან და უნივერსიტეტის რექტორთან ერთად საპასუხო ვიზიტით ნახჭევანის ავტონომიურ რესპუბლიკაში იმყოფებოდა, რომლის ფარგლებში ორი რეგიონის უმაღლეს სასწავლებლებს შორის მემორანდუმი გაფორმდა.

მუდმივმოქმედი სამეცნიერო სემინარის ,,საზღვარგარეთ მცხოვრებ ქართველთა დასახლებებისა და ყოფის კვლევის“ ფარგლებში ასოცირებულმა პროფესორმა მალხაზ ჩოხარაძემ სტუდენტებსა და პროფესორ-მასწავლებლებს კლარჯეთში წარმოებული ექსპედიციის აღმოჩენა - ძეგლის წმიდა გიორგის ეკლესია გააცნო. ისტორიული წყაროების მიხედვით, სალოცავი მოხსენიებულია ,,ქართლის ცხოვრებაში“, ჟამთააღმწერლის ასწლოვან მატიანეში, მე–19 საუკუნიდან ნახსენები აქვს არაერთ მკვლევარს, თუმცა ბოლო პერიოდამდე უცნობი იყო მისი არსებობა. ბათუმის შოთა რუსთაველის სახელმწიფო უნივერსიტეტის 2010 და 2011 წლების ექსპედიციების წევრებმა (მალხაზ ჩოხარაძე, მამია ფაღავა, ზაზა შაშიკაძე) აღმოაჩინეს, რომ დღემდეა შემონახული ტოპონიმი ძეგლი და ძეგლის წმინდა სალოცავის ნაშთები.