ახალი ამბები

შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ და ილიას უნივერსიტეტის რექტორმა, პროფესორმა გიგი თევზაძემ თანამშრომლობის მემორანდუმს მოაწერეს ხელი. ხელშეკრულება ითვალისწინებს ერთობლივი სადოქტორო პროგრამების განხორციელებას მეცნიერების სხვადასხვა მიმართულებით. უმაღლესი საგანმანათლებლო პროგრამები აკრედიტაციის გავლის შემდეგ ამოქმედდება და კურსდამთავრებულებს აკადემიური დოქტორის ორმაგი ხარისხი მიენიჭებათ. მემორადნუმის ფარგლებში დაიგეგმა ერთობლივი პროექტების განხორციელება, სამეცნიერო კონფერენციების ჩატარება და სამეცნიერო კვლევა-ძიების წარმოება.

ძვირფასო ქალბატონებო, შოთა რუსთაველის სახელმწიფო უნივერსიტეტის რექტორატი, ადმინისტრაცია, პროფესორ-მასწავლებლები და სტუდენტები გილოცავთ 3 მარტს - დედის დღესა და 8 მარტს - ქალთა საერთაშორისო დღეს. გისურვებთ ჯანმრთელობას, ბედნიერებას, სიკეთეს და წარმატებებს პედაგოგიურ, სამეცნიერო და შემოქმედებით საქმიანობაში.

საზღვარგარეთ მცხოვრებ ქართველთა დასახლებებისა და ყოფის კვლევის პროგრამის ,,მუჰაჯირობის (გადასახლების) ისტორია და ქართველ მუჰაჯირთა შთამომავლები თანამედროვე თურქეთში“ ფარგლებში მუშაობა განაახლა შოთა რუსთაველის სახელმწიფო უნივერსიტეტის მუდმივმოქმედმა სამეცნიერო სემინარმა. სხდომაზე პროფესორმა მამია ფაღავამ მოხსენება წარმოადგინა თემაზე: ,,საერთოქართველური ლექსიკა სამხრულ კილოებში“. სემინარი ყოველი თვის ბოლო პარასკევს, 37–ე კაბინეტში, 13 საათზე ჩატარდება და მის მუშაობაში მონაწილეობას მიიღებენ უნივერსიტეტის პროფესორ-მასწავლებლები, თურქეთში მცხოვრები მეცნიერები, სტუდენტები, დოქტორანტები, საქართველოს სამეცნიერო ცენტრებიდან და უცხოეთიდან მოწვეული სპეციალისტები.

აჭარის განათლების, კულტურისა და სპორტის მინისტრმა გია აბულაძემ შოთა რუსთაველის სახელმწიფო უნივერსიტეტის სტუდენტებს მიზნობრივი პროგრამა „ვასწავლოთ მომავალი წარმატებისათვის“ წარუდგინა და პროექტში შეტანილი ცვლილებები გააცნო. 2012 სასწავლო წლიდან კონკურსის წესით შერჩეული მასწავლებლები ხელფასის გარდა, აჭარის განათლების, კულტურისა და სპორტის სამინისტროსაგან დამატებით გაზრდილ ანაზღაურებას მიიღებენ 400 ლარის ოდენობით. ასევე ისარგებლებენ დაზღვევის პროგრამით და უფასოდ ჩაერთვებიან პროფესიული გადამზადების კურსებში. კონკურსში მონაწილეობის მიღება უმაღლესი განათლების მქონე პირებთან ერთად, დამამთავრებელი კურსის სტუდენტებსაც შეუძლიათ.

შოთა რუსთაველის სახელმწიფო უნივერსიტეტში ტურიზმის ფაკულტეტისა და ტურიზმის ინდუსტრიის წარმომადგენლების I კონფერენცია გაიმართა. რსუ-ს რექტორმა, პროფესორმა ალიოშა ბაკურიძემ და ტურიზმის ფაკულტეტის დეკანმა, პროფესორმა როსტომ ბერიძემ ტურიზმის დეპარტამენტის, სასტუმროებისა და ტურისტული სააგენტოების ხელმძღვანელებს ახლადშექმნილი ფაკულტეტის შესაძლებლობები და სამომავლო გეგემები გააცნეს. კონფერენციის ფარგლებში გაიმართა ვორქშოფი, რომლის მიზანი იყო სამომავლო თანამშრომლობის პრიორიტეტების განსაზღვრა და ერთობლივი პროექტების შემუშავება. ტურიზმის ფაკულტეტისა და ტურიზმის ინდუსტრიის ორგანიზაციების ინტეგრაცია ხელს შეუწყობს ტურიზმისა და მასპინძლობის დარგისათვის მაღალკვალიფიციური, კონკურენტუნარიანი და საერთაშორისო სტანდარტების სპეციალისტების მომზადებას.