ევროკავშირის ელჩი საქართველოში პაველ ჰერჩინსკი ბათუმის შოთა რუსთაველის სახელმწიფო უნივერსიტეტს ეწვია. ელჩს ბსუ-ს რექტორი მერაბ ხალვაში შეხვდა და ევროკავშირისა და საქართველოს ურთიერთობებზე ესაუბრა, გააცნო ბსუ-ში ევროკაშირის პროგრამების ფარგლებში განხორციელებული საგანმანათლებლო-სამეცნიერო პროექტები, სამეცნიერო ცენტრების მუშაობა და მადლობა გადაუხადა მხარდაჭერისთვის.
ბსუ-ში II საერთაშორისო კონფერენციის „ადრეული განათლება და ზრუნვა“ ფარგლებში, პრეკონფერენცია გაიმართა. მოეწყო პლენარული დისკუსია თემაზე: „პროფესიული განვითარების შესაძლებლობები: კარგი პრაქტიკა (აჭარის მოდელი)“. ორი დღის განმავლობაში ილიას უნივერსიტეტის ადრეული განათლების სპეციალისტები და საბავშვო ბაღების აღმზრდელები ჩაატარებენ ვორქშოფებს ადრეული და სკოლამდელი განათლების სპეციალისტებისთვის
ბათუმის შოთა რუსთაველის სახელმწიფო უნივერსიტეტში სტუდენტთა საუნივერსიტეტო სამეცნიერო კონფერენცია - 2023 გაიხსნა. ბსუ-ს სხვადასხვა ფაკულტეტის 350-ზე მეტი სტუდენტი სამეცნიერო მოხსენებებს ოცდაათი სექციის მიმართულებით წარმოადგენს. ახალგაზრდა მკვლევართა ნაშრომებს უნივერსიტეტის პროფესორ-მასწავლებლები შეაფასებენ და სექციის საპრიზო ადგილზე გასული მოხსენებების ავტორებს ფულად ჯილდოს გადასცემენ. კონფერენციის ფარგლებში გამოიცემა კრებული, რომელშიც თითოეული სექციის სამი საუკეთესო სამეცნიერო მოხსენება დაიბეჭდება. სამეცნიერო სესიის მიზანია, ხელი შეუწყოს ახალგაზრდების სამეცნიერო საქმიანობაში ჩართვას, მეცნიერული უნარ-ჩვევების ჩამოყალიბებასა და განვითარებას.
ბათუმის N2 საჯარო სკოლის VI კლასის მოსწავლეები ბათუმის შოთა რუსთაველის სახელმწიფო უნივერსიტეტს ეწვივნენ. ბსუ-ს რექტორის მოადგილემ თამარ სირაძემ ახალგაზრდებს საუნივერსიტეტო ცხოვრება, საგანმანთლებლო პროგრამები და სტუდენტური პროექტები გააცნო. მოსწავლეებმა დაათვალიერეს უმაღლესი საგანმანათლებლო დაწესებულების მატერიალურ-ტექნიკური ბაზა, საბუნებისმეტყველო მეცნიერებათა შემსწავლელი ლაბორატორიები, სასამართლო საიმიტაციო დარბაზი, კრიმინალისტიკის ლაბორატორია და ბიბლიოთეკა. შეხვედრისას სკოლის მოსწავლეებს სამახსოვრო საჩუქრები გადაეცათ.
ბსუ-ს სტუდენტური პროექტის „გარემოსდაცვითი ახალგაზრდული სამიტი“ ფარგლებში, აჭარის დაბებისა და სოფლების წყალმომარაგებისა და წყალარინების პროგრამის სარეაბილიტაციო ტერიტორიებზე დაარსებული ეკოკლუბებისთვის გარემოსდაცვითი ახალგაზრდული სამიტის ფინალური ეტაპი გაიმართა. სამიტი გახსნა, მონაწილეებს მიესალმა და სტუდენტური პროექტის მნიშვნელობაზე ისაუბრა ბსუ-ს რექტორის მოადგილემ თამარ სირაძემ. ღონისძიებაში მონაწილეობა მიიღეს აჭარის ხუთი მუნიციპალიტეტის სკოლების ნახევარფინალურ შეხვედრებში გამარჯვებულმა ძირკვაძეების, დაბა შუახევის დაბა ქედის, კირნათის და ოჩხამურის საჯარო სკოლების ეკოკლუბების წევრებმა. სამიტი მიზნად ისახავდა გარემოსდაცვითი საკითხების გამოკვეთას, წყალმომარაგებისა და წყალარინების საკითხების ხაზგასმას და შემარბილებელი ღონისძიებების ზომების უპირატესობების გაცნობას მოსწავლეებისთვის.
