ახალი ამბები

მათემატიკურ და კომპიუტერულ მეცნიერებათა მიმართულების პროფესორ- მასწავლებლებისა და სტუდენტების ორგანიზებით ქედის საჯარო სკოლების მოსწავლეებს შორის მათემატიკური ჭიდილი ჩატარდა, სადაც აქცენტი გაკეთდა ლოგიკური ამოცანების ამოხსნაზე, მათი პრეზენტაციის უნარსა და ოპონირებაზე. შეჯიბრში სამი გუნდი: ,,პითაგორა“, ,,აქსიომა“ და ,,პროგრესი“ მონაწილეებდა. საუკეთესოდ გუნდი ,,პითაგორა“ დასახელდა. საჯარო სკოლის მოსწავლეები შოთა რუსთაველის სახელმწიფო უნივერსიტეტის საგანმანათლებლო პროგრამებს გაეცნენ და საუნივერსიტეტო ცხოვრების ამსახველი ფოტოგამოფენა დაათვალიერეს. მათემატიკური ჭიდილის მონაწილეებს უმაღლესი სასწავლებლის საიუბილეო კრებულები და სამახსოვრო საჩუქრები გადასცეს.

ძვირფასო ქალბატონებო, შოთა რუსთაველის სახელმწიფო უნივერსიტეტის რექტორატი, ადმინისტრაცია, პროფესორ-მასწავლებლები და სტუდენტები გილოცავთ დედის დღეს. გისურვებთ ჯანმრთელობას, ბედნიერებას, დიდხანს სიცოცხლესა და ღირსეული შვილების აღზრდას. უფალი იყოს თქვენი შემწე და მფარველი!

შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ და საქართველოს საკონსტიტუციო სასამართლოს თავმჯდომარემ გიორგი პაპუაშვილმა ხელი მოაწერეს თანამშრომლობის მემორანდუმს. ხელშეკრულება ერთობლივი სამართლებრივი კვლევების წარმოებას, საგანმანათლებლო საქმიანობის ხელშეწყობას, სამეცნიერო კონფერენციების, სემინარებისა და სამეცნიერო გამოცემების მომზადებას ითვალისწინებს. მხარეთა შეთანხმებით სამართალმცოდნეობის სპეციალობის სტუდენტები სასწავლო და პროფესიულ პრაქტიკას საქართველოს საკონსტიტუციო სასამართლოში გაივლიან.

უნივერსიტეტის სააქტო დარბაზში ბათუმის საჯარო სკოლების დამამთავრებელი კლასის მოსწავლეებისათვის ერთთვიანი პროექტის - ,,უნივერსიტეტი ფართო საზოგადოებისათვის“ - ფარგლებში ღია კარის დღე გაიმართა. უმაღლესი სასწავლებლის რექტორმა, პროფესორმა ალიოშა ბაკურიძემ და პროფესორ-მასწავლებლებმა მომავალ სტუდენტებს ბათუმის სახელმწიფო უნივერსიტეტში დანერგილი სიახლეები და სწავლების პირობები გააცნეს. შეხვედრაზე შედგა საუნივერსიტეტო ცხოვრების ამსახველი დოკუმენტური ფილმის ,,შოთა რუსთაველის სახელმწიფო უნივერსიტეტი“ ჩვენება. ღია კარის დღეები ერთი თვის განმავლობაში გაგრძელდება და საქართველოს სხვადასხვა რეგიონის საჯარო სკოლებს მოიცავს.

დასრულდა საბჭოთა ოკუპაციის 90 წლისადმი მიძღვნილი ესეების კონკურსი. საბჭოთა ოკუპაციის თემაზე უმაღლესი სასწავლებლების სტუდენტებმა და საჯარო სკოლების მე-10, მე-11, მე-12 კლასის მოსწავლეებმა ესეები წარმოადგინეს და ისტორიული მოვლენები ახლებურად შეაფასეს. ას კონკურსანტს შორის გამარჯვებულნი მწერალთა კავშირისა და სხვადასხვა უმაღლესი საგანმანათლებლო დაწესებულების წარმომადგენლებისაგან დაკომპლექტებულმა ჟიურიმ გამოავლინა. საუკეთესო ესსეს ავტორად მელანო ზოსიძე დასახელდა, მეორე ადგილი ქეთევან ჩავლეიშვილმა დაიკავა, ხოლო მესამე - მარიამ კაკალაძემ. გამარჯვებულებს ფულადი პრემიები და სამახსოვრო საჩუქრები გადასცეს