ხულოს რაიონის ღია პირველობა მკლავჭიდში შოთა რუსთაველის სახელმწიფო უნივერსიტეტის გუნდის გამარჯვებით დასრულდა. ჩემპიონატი ხუთ წონით კატეგორიაში ჩატარდა და მასში 103 სპორტსმენი მონაწილეობდა. ჩემპიონი აბსოლიტურ წონით კატეგორიაში პირველ ადგილზე გასული რუსლან ქავთარაძე გახდა, მეორე საპრიზო ადგილი მირზა აბუსერიძემ დაიკავა
საზეიმო სხდომაზე გასული სასწავლო წელი შეაჯამა და დამდეგი შობა-ახალი წელი მიულოცა უნივერსიტეტელებს რექტორმა ალიოშა ბაკურიძემ. პროფესორ-მასწავლებლებთან შეხვედრაზე მან 2010 წელს უმაღლეს სასწავლებლში განხორციელებულ რეფორმებზე, საგანმანათლებლო პროგრამების სრულყოფის მნიშვნელობასა და სამომავლო გეგმებზეც ისაუბრა. ღონისძიება ტრადიციულად უნივერსიტეტის აკადემიური პერსონალისა და სტუდენტ-ახალგაზრდობის ერთობლივი საახალწლო კონცერტით დასრულდა.
დავით ხახუტაიშვილის სახელობის დარბაზში შოთა რუსთაველის სახელმწიფო უნივერსიტეტის სტუდენტთა სამეცნიერო ცენტრის წარმომადგენლებმა საზოგადოებას 2010 წლის მუშაობის ანგარიში წარუდგინეს და სამომავლო გეგმები გააცნეს. ცენტრის ინიციატივით დაიწყო საქართველოს სტუდენტთა და ახალგაზრდა მეცნიერთა სიმპოზიუმის შრომათა კრებულის გამოცემა, რომლის I და II ნაწილში შესულია საქართველოს სხვადასხვა უნივერსიტეტის სტუდენტთა ნაშრომები ისტორიის, არქეოლოგიის, ბიზნესის ადმინისტრირების, ინჟინერიისა და ტექნოლოგიების მიმართულებით. აღდგა რსუ-ს სტუდენტთა და ახალგაზრდა მეცნიერთა საუნივერსიტეტო შრომათა კრებულის გამოცემაც.
ცნობილ მეცნიერსა და საზოგადო მოღვაწეს, ისტორიის მეცნიერებათა დოქტორს, შოთა რუსთაველის სახელმწიფო უნივერსიტეტის ემერიტუსს, ქრისტიანული კულტურის კვლევის სამეცნიერო ცენტრის ხელმძღვანელს, პროფესორ ბიჭიკო დიასამიძეს 70 წელი შეუსრულდა. შოთა რუსთაველის სახელმწიფო უნივერსიტეტის პროფესორ-მასწავლებლებმა, კოლეგებმა და სტუდენტებმა საიუბილეო სხდომაზე ღვაწლმოსილი პროფესორის ცხოვრებასა და სამეცნიერო-საზოგადოებრივ საქმიანობაზე ისაუბრეს. პროფესორ ბიჭიკო დიასამიძის სამეცნიერო ინტერესის სფეროა საქართველოს მართლმადიდებლური ეკლესიის ისტორია და სტუდენტთა მსოფლმხედველობის ფორმირების საკითხები, რომელთაც მკვლევარმა 70-ზე მეტი სამეცნიერო ნაშრომი და 10 მონოგრაფია მიუძღვნა
იშვიათი დაავადებების თანამედროვე მართვის პრობლემებს მიეძღვნა სამეცნიერო-პრაქტიკული კონფერენცია თემაზე: ,,იშვიათი დაავადებების მართვის ოპტიმიზაციის საკითხები საქართველოში". პროფესორ-მასწავლებლებმა და პრაქტიკოსმა ექიმებმა იშვიათი დაავადებების დიაგნოსტიკისა და სწორი მკურნალობის მნიშვნელობაზე იმსჯელეს. ჰოლანდიელმა ექსპერტმა ელიზაბეტ სიბერიუსმა ქართველ კოლეგებს სხვადასხვა ქვეყნის იშვიათ დაავადებათა მართვის გამოცდილება გაუზიარა. კონფერენციის მონაწილეებმა შეიმუშავეს მეთოდი, რაც ხელს შეუწყობს საინფორმაციო ბანკის შექმნასა და დაავადებულთა დროულ გამოვლენას.
