ახალი ამბები

შოთა რუსთაველის სახელმწიფო უნივერსიტეტში დაიწყო და ტრაბზონის შავი ზღვის ტექნიკურ უნივერსიტეტში დასრულდება I საერთაშორისო სამეცნიერო-პრაქტიკული კონფერენცია ,,ტურიზმი: ეკონომიკა და ბიზნესი“. მასში საქართველოს, თურქეთის, გერმანიის, უკრაინისა და აზერბაიჯანის უნივერსიტეტების პროფესორები და ტურიზმის განვითარებით დაინტერესებული ბიზნესმენები მონაწილეობენ. კონფერენცია რსუ-ს ბიზნესის სკოლის, აჭარის ტურიზმისა და კურორტების დეპარტამენტისა და შავი ზღვის ტექნიკური უნივერსიტეტის ორგანიზებით ტარდება.

პროექტის ,,საზოგადოებრივი პროკურატურის“ ფარგლებში ბათუმის რაიონული პროკურატურის პროკურორებმა რსუ-ს სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტებს ნაფიც მსაჯულთა ინსტიტუტი, სისხლის სამართლის ახალი საპროცესო კოდექსი და დაკითხვის ის წესები გააცნეს, რომლებიც ძალაში 2010 წლის 1 ოქტომბერს შევა. ამავე პროექტის მხარდაჭერით, წარჩინებული სტუდენტები მონაწილეობას მიიღებენ 13 ივნისს, ბათუმის რაიონულ სასამართლოში დაგეგმილ იმიტირებულ სასამართლო პროცესში.

ბავშვთა დაცვის საერთაშორისო დღეს მიეძღვნა ურეხის ბავშვთა სახლის აღსაზრდელთა გამოფენა სახელწოდებით ,,ვიზრუნოთ საკუთარ მომავალზე“. უნივერსიტეტის ფოიეში მშობელთა მზრუნველობას მოკლებული ათი მოზარდის 50-ზე მეტი ნახატი და ხელნაკეთი ნივთები იყო წარმოდგენილი. გამოფენა შოთა რუსთაველის სახელმწიფო უნივერსიტეტის სტუდენტური თვითმმართველობის ორგანიზებით მოეწყო და მსგავსი ხასიათის პროექტები მომავალშიც განხორციელდება.

უკრაინის სამეცნიერო ტექნოლოგიების ცენტრის - STCU-ის აღმასრულებელი დირექტორის მოადგილემ მიშელ ზაედმა და პროექტის ,,კომერციალიზაციისა და ინდუსტრიის კავშირების“ ხელმძღვანელმა კრისტიან დოლიმ რსუ-ს პროფესორ-მასწავლებლებს ცენტრის საგრანტო სამეცნიერო კონკურსის მიმართულებები და გრანტის მოპოვების წესები გააცნეს. კონკურსის მიზანია ხელი შეუწყოს რეგიონის სამეცნიერო პოტენციალის ამაღლებასა და განვითარებას

პროექტის ,,რსუ სტუდენტების თვალით“ ფარგლებში შოთა რუსთაველის სახელმწიფო უნივერსიტეტის სტუდენტებმა ხულოს, შუახევისა და ქედის მოსწავლეებს უნივერსიტეტის საგანმანათლებლო პროგრამები, სწავლების პირობები და სტუდენტური ცხოვრება გააცნეს. პროექტი საბუნებისმეტყველო მეცნიერებათა ფაკულტეტის სტუდენტებმა სტუდენტური თვითმმართველობის დაფინანსებით განახორციელეს.