რადიაციული ონკოლოგიის დეპარტამენტის პრეზენტაცია რსუ-ში ჯანდაცვის ფაკულტეტისა და თბილისის სამედიცინო უნივერსიტეტის საუნივერსიტეტო კლინიკის ორგანიზებით ჩატარდა. ვენის უნივერსიტეტის პროფესორმა ბრანისლავ იერემიჩმა და რადიაციული ონკოლოგიის დეპარტამენტის ხელმძღვანელმა დარეჯან ლომიძემ შეკრებილთ მსოფლიოში აპრობირებული სხივური თერაპიის უახლესი მეთოდოლოგია გააცნეს და მკურნალობისათვის საჭირო ულტრათანამედროვე აპარატურა წარმოუდგინეს.
რსუ-ს სოციალურ მეცნიერებათა დეპარტამენტისა და საქართველოს პოლიტიკური ინსტიტუტის რიგით მეორე ერთობლივი რესპუბლიკური სამეცნიერო კონფერენცია ,,სამხრეთ კავკასიის ახალი გეოპოლიტიკური კონტურები“ სამხრეთ კავკასიაში მიმდინარე გეოპოლიტიკურ ცვლილებებს მიეძღვნა. მკვლევარებმა აგვისტოს მოვლენების შედეგები განილიხეს და ბოლო ერთი წლის განმავლობაში წარმოებული კვლევის შედეგები წარმოადგინეს
ბათუმის თვითმმართველობამ 2010 წლის ბიუჯეტის პროექტი რსუ-ს პროფესორ-მასწავლებლებთან და სტუდენტებთან ერთად განიხილა. ქალაქის საკრებულოს წევრებმა უნივერსიტეტელებს 2004-2009 წლებში შესრულებული საქმიანობის შედეგები გააცნეს და მთავარი საფინანსო დოკუმენტის დახვეწისა და პრიორიტეტების განსაზღვრის მიზნით დარგის სპეციალისტების მოსაზრებები მოისმინეს.
ცნობილი ქირურგის, მედიცინის მეცნიერებათა დოქტორისა და რსუ-ს სრული პროფესორის აკაკი ბერიძის 70 წლისთავისადმი მიძღვნილი საიუბილეო საღამო გაიმართა. კოლეგებმა და საზოგადოების წარმომადგენლებმა საღამოზე იუბილარის მიღწევებსა და მედიცინის განვითარებაში შეტანილ წვლილზე ისაუბრეს. მის სახელს უკავშირდება აჭარაში ქირურგიული სკოლის ჩამოყალიბება და ოპერაციული მკურნალობის ორიგინალური მეთოდების დანერგვა.
ამერიკის იურისტთა ასოციაციის (ABA/RAL) ფინანსური მხარდაჭერით რსუ-ს სოციალურ მეცნიერებათა, ბიზნესისა და სამართალომცოდნეობის ფაკულტეტზე იურიდიული კლინიკა გაიხსნა. მომავალი იურისტები მოქალაქეებს უფასო კონსულტაციებს გაუწევენ სამოქალაქო და ადმინისტრაციული სამართლის საკითხებზე. სტუდენტები პროფესორ-მასწავლებელებისა და ადვოკატების დახმარებით ჩაერთვებიან სასამართლო საქმის წარმოებაში.
