ბათუმის შოთა რუსთაველის სახელმწიფო უნივერსიტეტს ისრაელის კომპანია „J-Group-Global”-ის პრეზიდენტი ილია შაპირა და კვლევისა და განვითარების ექსპერტი ალექსანდრე ზოგასი ეწვივნენ. კომპანიის წარმომადგენლები ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელს მერაბ ხალვაშს, რექტორის მოადგილეებს, კვლევითი ინსტიტუტების დირექტორებსა და აკადემიურ პერსონალს შეხვდნენ. ბსუ-ს მეცნიერებმა დელეგაციის წევრებთან ერთად, პრეზენტაციები გამართეს სოფლის მეურნეობის, ეკოლოგიის, მოლეკულური ბიოლოგიის, ნიადაგმცოდნეობის, მემბრანული ფილტრაციის საკითხებზე და სამომავლო თანამშრომლობის პერსპექტივები განიხილეს.

ბათუმის შოთა რუსთაველის სახელმწიფო უნივერსიტეტის აგრარული და მემბრანული ტექნოლოგიების ინსტიტუტის სტუდენტებისა და პროფესორ-მასწავლებლებისათვუს აგრარული და მემბრანული ტექნოლოგიების ინსტიტუტის დირექტორმა რაულ გოცირიძემ ღია ლექცია წაიკითხა თემაზე: „ცნობადი და უცნობი წყალი“. მკვლევარმა ისაუბრა წყლის არაორდინალობასა და ანომალიებზე, ძირითად თვისებებზე. მსმენელები გაეცნენ წყლის მაღალ სითბოტევადობას, სიმკვრივის თავისებურებას, შემადგენლობას, ზედაპირულ დაჭიმულობას, სიბლანტეს, სასმელი წყლის დადებით და უარყოფით მახასიათებლებს, ადამიანის ორგანიზმის ქსოვილებში წყლის შემადგენლობას, წყლისგან გამოწვეულ დაავადებებს.

ბათუმის შოთა რუსთაველის სახელმწიფო უნივერსიტეტისა და ივანე ჯავახიშვილის სახელობის თბილისის სახელმწიფო უნივერსიტეტის ორგანიზებით ტარდება „კავკასიის მე-4 საერთაშორისო სიმპოზიუმი პოლიმერებსა და თანამედროვე მასალებში“. ბათუმის შოთა რუსთაველის სახელმწიფო უნივერსიტეტის 80 წლის იუბილესადმი მიძღვნილ ფორუმში 10 ქვეყნის 80-მდე მკვლევარი მონაწილეობს. სიმპოზიუმის მიზანია პოლიმერებსა და ინოვაციური მასალების სფეროში მომუშავე მეცნიერებს დაეხმაროს წარმოადგინონ საკუთარი კვლევები, დარგში არსებული პრობლემები და აღმოჩენები. სიმპოზიუმი ასევე ხელს შეუწყობს მსოფლიო სამეცნიერო საზოგადოებისთვის ნაკლებად ცნობილი ქართული და კავკასიური სამეცნიერო ჯგუფების ახალი სამეცნიერო კვლევების წარმატებით გაცნობას.

ბათუმის შოთა რუსთაველის სახელმწიფო უნივერსიტეტის აგრარული და მემბრანული ტექნოლოგიების ინსტიტუტის დირექტორის, ქიმიის მეცნიერებათა დოქტორ რაულ გოცირიძის 60 წლისადმი მიძღვნილი საიუბილეო სხდომა გაიმართა შოთა რუსთაველის დარბაზში. ბატონ რაულ გოცირიძეს მნიშვნელოვანი წვლილი მიუძღვის საქართველოში მემბრანული ტექნოლოგიების განვითარებაში. მკვლევარი ავტორია 74 სამეცნიერო ნაშრომისა და მონოგრაფიისა: „ადამიანის ყოფიერება და წყალი”. მეცნიერს მიღებული აქვს 11 საავტორო მოწმობა და 4 პატენტი.

უნივერსიტეტში საქართველოს სოფლის მეურნეობის მეცნიერებათა აკადემიის წევრის, ბათუმის შოთა რუსთაველის სახელმწიფო უნივერსიტეტის აგრარული და მემბრანული ტექნოლოგიების ინსტიტუტის მთავარი მეცნიერ-თანამშრომლის, აკადემიკოს გურამ პაპუნიძის დაბადებიდან 70 და სამეცნიერო-პედაგოგიური მოღვაწეობის 45 წლის იუბილე აღინიშნა. ღვაწლმოსილ მეცნიერს იუბილე მიულოცეს, სამახსოვრო საჩუქრები გადასცეს და მის ღვაწლზე ისაუბრეს უნივერსიტეტის რექტორმა, პროფესორმა ალიოშა ბაკურიძემ, აჭარის ა.რ. უმაღლესი საბჭოს თავმჯდომარემ ავთანდილ ბერიძემ, საქართველოს მეცნიერებათა ეროვნული აკადემიის პრეზიდენტმა, აკადემიკოსმა გიორგი კვესიტაძემ, აჭარის ა.რ. განათლების, კულტურისა და სპორტის მინისტრმა გიორგი თავამაიშვილმა, ბათუმის მერის მოვალეობის შემსრულებელმა გიორგი ერმაკოვმა, ბათუმის საკრებულოს თავმჯდომარემ ირაკლი ჩავლეიშვილმა, კოლეგებმა, საზოგადოების წარმომადგენლებმა და მეგობრებმა. გურამ პაპუნიძეს რამდენიმე ათეული წელია მნიშვნელოვანი წვლილი შეაქვს ქართული მეცნიერების განვითარებასა და საუნივერსიტეტო ცხოვრებაში. იყო საქართველოს პარლამენტისა და აჭარის უზენაესი საბჭოს წევრი, ბათუმის საქალაქო საბჭოს დეპუტატი, სამეცნიერო-კვლევითი ინსტიტუტის დირექტორი, არჩეულია საქართველოს მეცნიერებათა ეროვნული აკადემიის სამეცნიერო საბჭოს წევრად და მევენახეობა-მეღვინეობის დარგის მთავარ მეცნიერ-კონსულტანტად.