მიხალ ბალუდიანსკის აკადემიური საზოგადოების (სლოვაკეთი), ჩერნიგოვის ეროვნული ტექნოლოგიური უნივერსიტეტის (უკრაინა) და ბათუმის შოთა რუსთაველის სახელმწიფო უნივერსიტეტის ორგანიზებით 3-8 აპრილს, სლოვაკია-ავსტრია-უნგრეთში საერთაშორისო სამეცნიერო-პრაქტიკული კონფერენცია „უკრაინა-ევროპა, თანამედროვე ტექნოლოგიები, ბიზნესი და სამართალი“ („UKRAINE-EU, MODERN TECHNOLOGY, BUSINESS AND LAW“) გაიმართა. უკრაინის, საქართველოს, ბელორუსიის, აზერბაიჯანის, სლოვაკიის, ნორვეგიის უნივერსიტეტების წარმომადგენლებმა მოხსენებები წარმოადგინეს ეკოლოგიის, სამართლის, თანამედროვე ტექნოლოგიებისა და ბიზნესის მიმართულებით. აგრარული და მემბრანული ტექნოლოგიების ინსტიტუტის მემბრანული ტექნოლოგიების განყოფილების მთავარმა მეცნიერ თანამშრომელმა ნინო მხეიძემ ნაშრომი წაიკითხა თემაზე: „მიკროფილტრაციის გამოყენება ღვინის გაკამკამებისთვის და სტაბილიზაციისთვის“, ხოლო სასოფლო-სამეურნეო ნედლეულის წარმოებისა და გადამუშავების ტექნოლოგიების განყოფილების მთავარმა მეცნიერ თანამშრომელმა ნინო კიკნაძემ - „ხელვაჩაურის რაიონის მდინარეთა წყლების სისუფთავის ხარისხის შეფასება ზოგიერთი ფიზიკო-ქიმიური პარამეტრის საფუძველზე“.

ბათუმის შოთა რუსთაველის სახელმწიფო უნივერსიტეტის აგრარული და მემბრანული ტექნოლოგიების ინსტიტუტის მკვლევრებმა მიკროფილტრაციული დანადგარი შექმნეს. დანადგარი ბრტყელი პოლიმერული მემბრანებით დაკომპლექტებულ ტუმბოთი აღჭურვილი ფილტრაციულ მოწყობილობაა, რომლის საშუალებითაც შესაძლებელია თხევადი კვების პროდუქტების (ალკოჰოლური და უალკოჰოლური სასმელები, წვენები, მინერალური წყლები, ექსტრაქტები) ფილტრაცია, თხევად პროდუქტისთვის მდგრადი გამჭირვალობის და მიკრობიოლოგიური სტაბილურობის მინიჭება და სასაქონლო სახის გაუმჯობესება. მიკროფილტრაციული დანადგარის ინოვაციურ სიახლეს წარმოადგენს ის, რომ მის დასამზადებლად გამოყენებულია თერმო და ქიმიურად მდგრადი მოდიფიცირებული პოლიმერი - ფთოროპლასტი. მკვლევრების მიერ შემუშავებული ჰიდრო და ქიმიური მეთოდებით რეგენერაციის ტექნოლოგიური რეჟიმის გამოყენება საშუალებას იძლევა მისი მრავალჯერად მოხმარების საშუალებას.

კომპანია ”შიმაძუ”-ს (Shimadzu Corporation) უკრაინის ფილიალის დირექტორმა ალექსანდრე სუხომლინოვმა აგრარული და მემბრანული ტექნოლოგიების ინსტიტუტის მეცნიერ- თანამშრომლებსა და ტექნოლოგიური ფაკულტეტის პროფესორ-მასწავლებლებს ორგანიზაციის მიერ წარმოებული თანამედროვე ანალიზური ტექნიკა წარუდგინა. მომხსენებელმა მკვლევარებს გააცნო გაზური და სითხური ქრომატოგრაფები, მოლეკულური სპექტროსკოპები, გაზური და სითხური ქრომატო-მასს-სპექტრომეტრები, ელემენტალური ანალიზის ხელსაწყოები და საერთო ნახშირბადის და აზოტის ანალიზატორები. მომხსენებელმა ასევე ისაუბრა მეთოდიკების ვალიდაციაზე და ISO 17025 2006 წლის მოთხოვნების შესაბამისი საგამოცდო ლაბორატორიების აკრედიტაციაზე. პრეზენტაციაზე განისაზღვრა ერთობლივი თანამშრომლობის გეგმები ”შიმაძუ”-ს აპარატურის შეძენის სამომავლო პერსპექტივებით, რაც ინსტიტუტს მისცემს შესაძლებლობას აწარმოოს მაღალეფექტური და ზუსტი სამეცნიერო კვლევები საერთაშორისო სტანდარტების შესაბამისი აპარატურის საშუალებით.

ბათუმის შოთა რუსთაველის სახელმწიფო უნივერსიტეტის აგრარული და მემბრანული ტექნოლოგიების ინსტიტუტის მთავარმა მეცნიერ თანამშრომელმა, ასოცირებულმა პროფესორმა ნინო კიკნაძემ წაიკითხა ღია ლექცია თემაზე: გაცვლითი პროგრამების მნიშვნელობა სწავლებასა და სამეცნიერო-კვლევითი მუშაობის პროცესში (Erasmus Mundus, სანტიაგო დე კომპოსტელას უნივერსიტეტის მაგალითზე)“. მომხსენებელმა პრეზენტაციაზე ისაუბრა ALRAKIS II-ის გაცვლითი პროგრამაში მონაწილეობისას მიღებულ გამოცდილებასა და პოსტდოქტორანტულ კვლევებზე. ასოცირებულმა პროფესორმა ნინო კიკნაძემ ასევე წარმოადგინა მობილობის პერიოდში მის მიერ განხორციელებულ აქტივობები და სანტიაგო დე კომპოსტელას უნივერსიტეტი (USC). სტუდენტებს, პროფესორ-მასწავლებლებს და მეცნიერ-თანამშრომლებს მიაწოდა ინფორმაცია საბაკალავრო, სამაგისტრო და სადოქტორო სპეციალობების, აკადემიური ხარისხების შესახებ მათთვის საინტერესო მიმართულებებით.

ბათუმის შოთა რუსთაველის სახელმწიფო უნივერსიტეტის აგრარული და მემბრანული ტექნოლოგიების ინსტიტუტის მთავარი მეცნიერი მერაბ არძენაძე, ინსტიტუტის სპეციალისტი, აგრონომი თემურ გორგილაძე და საქართველოს აგრარული უნივერსიტეტის მკვლევარი, ამპელოგრაფი ვაჟა გოცირიძე სამდღიანი სამეცნიერო მივლინებით, ისტორიულ სამხრეთ საქართველოში იმყოფებოდნენ. ექსპედიცია მიზნად ისახავდა შემორჩენილი ძველი ქართული ვაზის ჯიშების მოპოვებას, სანამყენე და საძირე მასალების შეგროვებას, მათ შემდგომ შესწავლასა და იდენტიფიკაციას. მკვლევარებმა შეისწავლეს კლარჯეთისა და შავშეთის ტერიტორიები - მურგული, ართვინი, ბორჩხა, იმერხევი, ბაზგირეთი და მათი მიმდებარე სოფლები. ექსპედიციის წევრებმა ასევე მოიძიეს 30-მდე ვაზის კულტურული და ველური სახეობა.