ბათუმის შოთა რუსთაველის სახელმწიფო უნივერსიტეტის ფუტსალის გუნდი გიორგი შაქარაშვილის სახელობის ოთხთა ტურნირის „შაქარას თასი - 2020“ მინი ფეხბურთში გამარჯვებულია. ტრაგიკულად დაღუპული ფეხბურთელის სახელობის პირველობა ბათუმის ბულვარის სპორტულ მოედანზე, 30-31 აგვისტოს ჩატარდა და მასში მონაწილეობდნენ: ბსუ-ს ფუტსალის გუნდი, ბათუმის „ბათუმი“, ბათუმის საზღვაო აკადემია და თბილისური გუნდი „შაქარას მეგობრები“. პირველ დღეს ბსუ-ს გუნდმა წარმატებით დაიწყო ასპარეზობა და ანგარიშით 2-0 დაამარცხა ბათუმის საზღვაო აკადემიის გუნდი, ხოლო „შაქარას მეგობრებმა" 2-0 სძლია ბათუმის „ბათუმს“.ფინალურ მატჩში ბსუ-ს გუნდი „შაქარას მეგობრებს“ დაუპირისპირდა და ძირითადი დრო ანგარიშით 3-3 დასრულდა. დამატებით პენალტების სერიაში ბსუ-ს გუნდმა ანგარიშით 3:2 გაიმარჯვა და „შაქარას თასი“ მოიპოვა.

ბათუმის შოთა რუსთაველის სახელმწიფო უნივერსიტეტში ჭადრაკის ტურნირი „ბსუ-ს თასი - 2020“ გაიმართა. ტურნირი ორ დღეს გრძელდებოდა და მასში სხვადასხვა ფაკულტეტის 32 სტუდენტი მონაწილეობდა. პირველობის საპრიზო ადგილები ბიზნესის ადმინისტრირებისა და ეკონომიკის ფაკულტეტის სტუდენტებმა მოიპოვეს. პირველი ადგილი თედო ბოლქვაძეს ერგო, მეორე ადგილი - მამუკა ჩოჩაკიძეს და მესამე ადგილი - თენგო დიდმანიძეს. ტურნირი ბსუ-ს საბუნებისმეტყველო მეცნიერებათა და ჯანდაცვის ფაკულტეტის სტუდენტის, პირველი თანრიგოსანი მოჭადრაკის ლიკა ამყოლაძის ინიციატივით, აჭარის ჭადრაკის ფედერაციისა და ბსუ-ს სტუდენტთა კარიერული განვითარების, კულტურისა და სპორტის დეპარტამენტის მხარდაჭერით ჩატარდა.

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის ფიზიკური მედიცინა და სამედიცინო რეაბილიტაციის საგანმანათლებლო პროგრამის პირველი კურსის სტუდენტი გიორგი ლორთქიფანიძე საქართველოს ჩემპიონია ძალისმიერ სამჭიდში. სპორტსმენი ასპარეზობდა თბილისში გამართულ ძალისმიერი სამჭიდის საქართველოს ღია პირველობის სტუდენტთა და იუნიორთა შორის ორჭიდის კატეგორიაში. ბათუმის შოთა რუსთაველის სახელმწიფო უნივერსიტეტი ულოცავს გიორგი ლორთქიფანიძეს გამარჯვებას და უსურვებს წარმატებებს.

2020 წლიდან სს „ბაზისბანკი“ ბსუ-ს ფუტსალის ოფიციალური მხარდამჭერი გახდა. ბათუმის შოთა რუსთაველის სახელმწიფო უნივერსიტეტში ფუტსალის გუნდს სს „ბაზისბანკისგან“ საჩუქრად გუნდის წევრებისა და დამხმარე პერსონალის სათამაშო ფორმები გადაეცა. ბსუ-ს ფუტსალის გუნდი 2012 წელს დაარსდა და სხვადასხვა ჩემპიონატში აქტიურად ღებულობდა მონაწილეობას. ბოლო სამი წლის განმავლობაში გუნდი საქართველოს ფუტსალის უმაღლეს ლიგაში თამაშობს. „ბაზისბანკი“ უმაღლეს საგანმანათლებლო დაწესებულებასთან უკვე 15 წელია თანამშრომლობს, ხოლო 2020 წლიდან სპორტისა და ჯანსაღი ცხოვრების წესის პოპულარიზაციის ხელშეწყობის მიზნით ბსუ-ს ფუტსალის ოფიციალური სპონსორი გახდა.

ბათუმის შოთა რუსთაველის სახელმწიფო უნივერსიტეტის სტუდენტთა საგანმანათლებლო, კულტურულ-შემოქმედებითი და სპორტული სახის პროექტების კონკურსი დასრულდა. კონკურსში მონაწილე 13 პროექტიდან დაფინასება შემდეგმა პროექტებმა მოიპოვა: „ეკონომიკური დებატები ბსუ 2020“ (პროექტის ავტორი ნესტან ვარშანიძე), „QB ბიბლიოთეკა“ (პროექტის ავტორი ნინო ცინცაძე), „მართვადი პროგრამირებადი მულტიფუნქციური ელექტრონული დაფა“ (პროექტის ავტორი თორნიკე ლასურიძე), გადააზრების კრიტიკული ზღვარი“ (პროექტის ავტორი არჩილ ბერიძე), „პირველადი დახმარება ყველგან და ყველასთვის“ (პროექტის ავტორი ნინო გორგილაძე) და „თანამედროვე მასწავლებელი“ (პროექტის ავტორი ნინიკო კოსოლიძე).