ბათუმის შოთა რუსთაველის სახელმწიფო უნივერსიტეტის სტუდენტური პროექტების კონკურსში გამარჯვებული პროექტი „საქართველოს ახალგაზრდული სამიტი 2022“ განხორციელდა. პროექტი მიზნად ისახავდა საქართველოში განათლების, ეკონომიკის, აგრარული სექტორის, უსაფრთხოებისა და სამართლის კუთხით არსებული პრობლემებისა და გამოწვევების შესახებ ახალგაზრდების შეხედულებების წარმოჩენას, მათი აზრების იდენტიფიცირებას და ინფორმაციის გაცვლას. სამიტის ხუთ კომიტეტში გადანაწილებულმა 50-მა სტუდენტმა და აბიტურიენტმა სამი დღის განმავლობაში შეთავაზებულ პრობლემებზე იმუშავა და პროექტის დასკვნითი ეტაპზე რეზოლუცია მოამზადა. ღონისძიების თითოეულ მონაწილეს სერტიფიკატები და გამარჯვებულ დელეგატებს ფასიანი საჩუქრები გადაეცათ. პირველი ადგილი იურიდიულ კომიტეტს ერგო, მეორე ადგილი - განათლების კომიტეტს, ხოლო მესამე - ეკონომიკის კომიტეტს.

ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის სტუდენტი დიეგო ჩხიკვაძე მსოფლიო ჩემპიონატის ბრინჯაოს პრიზიორია ბერძნულ-რომაულ ჭიდაობაში. დიეგო ჩხიკვაძემ ბერძნულ-რომაულ სტილში 23-წლამდელთა მსოფლიო ჩემპიონატზე 67 კილოგრამ წონით კატეგორიაში იასპარეზა, კოლუმბიელი ხულიან ასევადო 3-1 ანგარიშით დამარცხა და მედალს დაეუფლა. საქართველოს ბერძნულ-რომაული სტილით მოჭიდავეთა 23 წლამდელთა ნაკრებმა მსოფლიოს ჩემპიონატი 101 ქულით გუნდური მე-2 ადგილი დაიკავა.

ზურა მხეიძემ ბსუ-ს სტუდენტებისთვის საჯარო ლექცია წაიკითხა თემაზე: „თვითმოტივაცია, როგორც წარმატების წინაპირობა“. ცნობილი ფსიქოლოგი მსმენელებს თვითმოტივაციის ამაღლებასა და მასთან დაკავშირებულ ფსიქოლოგიურ გამოწვევებზე ესაუბრა. მომხსენებელმა საუბრისას ყურადღება გაამახვილა ასევე წარმატებისკენ მიმავალ გზაზე შექმნილ ემოციურ დაბრკოლებებსა და მათი გადაჭრის გზებზე. პროფესორ ზურა მხეიძის შეფასებით, ადამიანები დამოუკიდებლად ქმნიან თავის ცხოვრებას და ყველა პრობლემა არასწორი კომუნიკაციის საფუძველზე იქმნება; იმის მიხედვით, თუ როგორია კომუნიკაცია საკუთარ თავთან, ადამიანი ან ბედნიერად გრძნობს თავს ან ვერა; მისი არჩევანია, თუ როგორ კონცეფციას შეიმუშავებს სამყაროსთან ურთიერთობისას, ცხოვრების სწავლა შესაძლებელია. ლექციის დასრულების შემდეგ, პროფესორმა ზურა მხეიძემ სტუდენტების შეკითხვებს უპასუხა.

ბათუმის შოთა რუსთაველის სახელმწიფო უნივერსიტეტის ჯაზ ბენდმა ბულგარეთში, ქალაქ ნესებირიში გამართულ საერთაშორისო ფესტივალში "KARNOLSKY" ნომინაციაში - "საუკეთესო ჯაზ ბენდი" პირველი ადგილი დაიკავა. მუსიკალურ ფესტივალში სხვადასხვა ქვეყნის 60-მდე შემოქმედებითი ჯგუფი მონაწილეობდა. უნივერსიტეტი ულოცავს ბენდ „OFF SIDE”-ს გამარჯვებას და წარმატებებს უსურვებს.

ბსუ-ში მათემატიკის დეპარტამენტის ასოცირებულ პროფესორ ზებურ ავალიანის ხსოვნისადმი მიძღვნილი საუნივერსიტეტო საჭადრაკო ტურნირი „ზებურ ავალიანის თასი - 2022“ გაიმართა. ტურნირი 7 ტურად, შვეიცარული სისტემით გაიმართა და მასში 50-მდე სტუდენტი, პროფესორ-მასწავლებელი და ნორჩი მოჭადრაკე ასპარეზობდა. პირველ ადგილი ეკონომიკის საბაკალავრო პროგრამის სტუდენტს თენგიზ დიდმანიძეს ერგო, მეორე ადგილი - ბიზნესის ადმინისტრირების საბაკალავრო პროგრამის სტუდენტს თედო ბოლქვაძეს და მესამე ადგილი - ომარ სირაბიძეს. ტურნირის ნომინაციაში „საუკეთესო მოჭადრაკე სტუდენტი“ კომპიუტერული მეცნიერების საბაკალავრო პროგრამის სტუდენტმა ოლეგ ირემაძემ გაიმარჯვა, ხოლო ნომინაცია „საუკეთესო მოჭადრაკე ბავშვი“ - კესარია მგელაძემ.