ბათუმის შოთა რუსთაველის სახელმწიფო უნივერსიტეტში სემინარი ჩატარდა თემაზე: „ართვინის მეჩეთები“. ჰუმანიტარულ მეცნიერებათა ფაკულტეტის ასოცირებულმა პროფესორმა ზაზა შაშიკაძემ და ისტორიის აკადემიურმა დოქტორმა რუსლან ბარამიძემ სტუდენტებს და პროფესორ-მასწავლებლებს შოთა რუსთაველის ეროვნული სამეცნიერო ფონდის მიერ დაფინანსებული სამეცნიერო გრანტის „ქართველ მუსლიმთა მატერიალური და სულიერი მემკვიდრეობა თურქეთში“ (საგრანტო ხელშეკრულება #57/06) ფარგლებში მიმდინარე წლის სექტემბერ-ოქტომბერში თურქეთის რესპუბლიკაში, ართვინის ილში ჩატარებული საველე სამუშაოების შედეგები გააცნეს.

შოთა რუსთაველის ეროვნული სამეცნიერო ფონდის მიერ დაფინანსებული პროექტის „ქართველ მუსლიმთა მატერიალური და სულიერი მემკვიდრეობა თურქეთში“ (HE/21/1-10/13; სამეცნიერო ხელმძღვანელი ასოცირებული პროფესორი ზაზა შაშიკაძე) ფარგლებში გაიმართა საანგარიშო შეხვედრა. მკვლევარმა რუსლან ბარამიძემ ბათუმის შოთა რუსთაველის სახელმწიფო უნივერსიტეტის სტუდენტებსა და პროფესორ-მასწავლებლებს 2015 წლის პირველ ნახევარში წარმოებული კვლევა-ძიების შედეგები გააცნო. პროექტის მონაწილეებმა იმუშავეს ანკარის თაფუსა და კადასტრის არქივში, თურქეთის საისტორიო საზოგადოების წიგნთსაცავებში, ეროვნულ და ანკარის უნივერსიტეტის ბიბლიოთეკებში. მკვლევრებმა მოიპოვეს მნიშვნელოვანი მასალები და ლიტერატურა, რაც მათ დაეხმარება პროექტით გათვალისწინებული საკითხების უკეთ შესწავლაში.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ქართველოლოგიის ცენტრის მესამე საერთაშორისო სამეცნიერო კონფერენცია გაიმართა თემაზე „მუჰაჯირები“. სამეცნიერო სესია „საზღვარგარეთ მცხოვრებ ქართველთა დასახლებებისა და ყოფის კვლევის“ პროექტის ფარგლებში ჩატარდა და მიზნად ისახავდა ბოლო ერთი წლის წარმოებული კვლევა-ძიების შედეგების გაცნობას. კონფერენციაზე ქართველ მეცნიერებთან ერთად უცხოელმა მკვლევრებმა მე-19 საუკუნეში სამხრეთ საქართველოდან თურქეთის შიდა პროვინციაში გადასახლებული ქართველების (მუჰაჯირების) ისტორიისა და მათ შთამომავალთა თანამედროვე ყოფისადმი მიძღვნილი მოხსენებები წარმოადგინეს.

1835-6 წლის „ოსმალეთის საქართველოს აღწერის მასალების“ თემაზე ბათუმის შოთა რუსთაველის სახელმწიფო უნივერსიტეტში სემინარი ჩატარდა. უნივერსიტეტის ასოცირებულმა პროფესორმა ზაზა შაშიკაძემ და ისტორიის აკადემიურმა დოქტორმა რუსლან ბარამიძემ სტუდენტებს გააცნეს შოთა რუსთაველის ეროვნული სამეცნიერო ფონდის მიერ დაფინანსებული სამეცნიერო გრანტის “ქართველ მუსლიმთა მატერიალური და სულიერი მემკვიდრეობა თურქეთში“ (საგრანტო ხელშეკრულება #57/06) ფარგლებში მიმდინარე წლის აგვისტო-სექტემბერში თურქეთის არქივებში წარმოებული კვლევის შედეგები. მკვლევარებმა მუშაობისას აღმოაჩინეს მრავალი საინტერესო დოკუმენტი, მათ შორის 1835/6 წლის აღწერის მასალები, რომლებიც მოიცავს „ოსმალეთის საქართველოს“ ტერიტორიას.

შოთა რუსთაველის ეროვნული სამეცნიერო ფონდის გრანტის “კლარჯეთი“ (საგრანტო პროექტის სამეცნიერო ხელმძღვანელი პროფესორი მამია ფაღავა, მენეჯერი - პროფესორი მალხაზ ჩოხარაძე) ფარგლებში ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ქართველოლოგიის ცენტრის XI სამეცნიერო კონფერენცია გაიმართა. უმაღლესი საგანმანათლებლო დაწესებულების პროფესორ-მასწავლებლებმა, მკვლევარებმა და დოქტორანტებმა სესიაზე აგვისტოში, ისტორიულ სამხრეთ-დასავლეთ საქართველოში წარმოებული ათდღიანი ექსპედიციის შედეგები შეაჯამეს. კლარჯეთის სოფლებში მოპოვებული ფოლკლორული, დიალექტოლოგიური, ეთნოლოგიური, ონომასტიკური და მატერიალური კულტურის ძეგლების ამსახველი ფოტო-ვიდეო მასალები სამეცნიერო მიმოქცევაში სათანადო დამუშავების შემდეგ შევა და გამოყენებული იქნება კომპლექსურ მონოგრაფიაში „კლარჯეთი“.