ბათუმის შოთა რუსთაველის სახელმწიფო უნივერსიტეტსა და ხელვაჩაურის საბავშვო ბაღების გაერთიანებას შორის თანამშრომლობის მემორანდუმს მოეწერა ხელი. თანამშრომლობა განათლების ფაკულტეტის 20-დან 25-მდე სტუდენტის საბავშვო ბაღების გაერთიანების მიერ ორგანიზებულ ტრენინგებში, სასწავლო პროგრამებსა და სემინარებში მონაწილეობას ითვალისწინებს. ხელშეკრულების ფარგლებში, სკოლამდელი აღზრდის სპეციალობის სტუდენტების სტაჟირებაა დაგეგმილი.
თანამშრომლობა ბათუმის შოთა რუსთაველის სახელმწიფო უნივერსიტეტსა და ხელვაჩაურის საბავშვო ბაღების გაერთიანებას შორის განათლების ფაკულტეტის ორგანიზებით განხორციელდა.

ბათუმის შოთა რუსთაველის სახელმწიფო უნივერსიტეტში განათლების ფაკულტეტისა და ხელვაჩაურის ახალგაზრდობის ცენტრის ორგანიზებით შეზღუდული შესაძლებლობების მქონე ბავშვებისათვის სპორტული ღონისძიება „Let’s Play Together- მოდი ერთად ვითამაშოთ“ ჩატარდა. ღონისძიება შშმ ბავშვებისათვის გუნდურ, სპორტულ და ინტეგრირებულ გართობას, აქტივობებსა და ისეთ ფიზიკურ სავარჯიშოებს მოიცავდა, როგორიცაა ცეკვა, სირბილი-ესტაფეტა, მკლავჭიდი და სხვა. პროგრამაში ჩართული იყვნენ მშვიდობის კორპუსის, ხელვაჩაურის ახალგაზრდობის ცენტრის მოხალისეები და ბათუმის შოთა რუსთაველის სახელმწიფო უნივერსიტეტის განათლების ფაკულტეტის სტუდენტები.

განათლების ფაკულტეტის დაწყებითი განათლების სპეციალობის სტუდენტები: ნინი გვილავა, ანჟელა ბერიძე, ელზა ფუტკარაძე, ფატიმა სულაქველიძე, ნონა ქადაგიძე და ასისტენტ პროფესორი ბესიკ ციცაგი ქარელის რაიონის სოფელ მოხისში მცხოვრებ სოციალურად დაუცველ ნოზაძეების ოჯახს ეწვივნენ და ტანსაცმელი და პროდუქტები გადასცეს. ნოზაძეების მრავალშვილიან ოჯახს, რომელშიც 5 არასრულწლოვანი პატარა იზრდება, სიღარიბის ზღვარს ქვემოთ მყოფი სოციალურად დაუცველი მოქალაქეებისათვის გათვალისწინებული დახმარების გარდა სხვა შემოსავალი არ გააჩნიათ.

2016 წლის 15-16 მარტს ბათუმის შოთა რუსთაველის სახელმწიფო უნივერსიტეტის განათლების ფაკულტეტის პროგრამის „უმაღლესი განათლების მენეჯმენტი“-ს პერსონალი აკაკი წერეთლის სახელმწიფო უნივერსიტეტში გამართულ ტრენინგებს ესწრებოდა. ტრენინგები, რომელიც TEMPUS-ის პროექტის ‘’MAHATMA“- უმაღლესი განათლების მართვის მაგისტრი: ლიდერთა მომზადება საგანმანათლებლო ცვლილებების მართვისათვის’’ ფარგლებში მიმდინარეობდა , საგანმანათლებლო პროგრამების ხარისხის გაუმჯებესობას შეეხებოდა.

განათლების ფაკულტეტის დეკანი, ასოცირებული პროფესორი მადონა მიქელაძე, ფაკულტეტის ხარისხის უზრუნველყოფის სამსახურის უფროსი, ასოცირებული პროფესორი ნანა მაკარაძე და კურატორები დაწყებითი განათლების სპეციალობის სტუდენტებს შეხვდნენ. შეხვედრის მიზანი სასწავლო პროცესთან დაკავშირებული საკითხები და სიახლეების გაცნობა იყო. ასევე, განიხილეს 2015-2016 სასწავლო წლის პირველი სემესტრის შედეგებიც. შეხვედრა კითხვა-პასუხის რეჟიმში წარიმართა.