ბათუმის შოთა რუსთაველის სახელმწიფო უნივერსიტეტის განათლების ფაკულტეტს სამდღიანი სამუშაო ვიზიტით ტალინის უნივერსიტეტის პროფესორი ენე-სილვია სარვი ეწვია. განათლების ექსპერტი მასწავლებლის მომზადების საგანმანათლებლო პროგრამის მონაწილე აკადემიურ პერსონალს შეხვდა და მათ ესტონეთში მოქმედი მასწავლებლის მომზადების სისტემასთან ერთად, მასწავლებლის მომზადების საგანმანათლებლო პროგრამები გააცნო. პროფესორმა ენე-სილვია სარვიმ ფაკულტეტის პროფესორ-მასწავლებლებისათვის სამუშაო შეხვედრა ჩაატარა სწავლების თანამედროვე მეთოდებზე და ქართველ კოლეგებს სასწავლო პროცესის ეფექტურად დაგეგმვის გამოცდილება გაუზიარა.

ბათუმის შოთა რუსთაველის სახელმწიფო უნივერსიტეტში გამართული ტრენინგის "ლიდერობა მომავლისთვის" მონაწილე სტუდენტებს არასამთავრობო ორგანიზაციის „შეზღუდული შესაძლებლობის მქონე პირების უფლებებისათვის“ ხელმძღვანელმა თამაზ მჟავანაძემ და განათლების ფაკულტეტის დეკანმა მადონა მიქელაძემ სერტიფიკატები გადასცეს. ღონისძიების ფარგლებში უმაღლეს საგანმანათლებლო დაწესებულებაში ახალი ტრენინგი დაიწყო თემაზე: „ერთად ვისწავლოთ პროექტის წერა“. ორი დღის განმავლობაში სტუდენტები პროქტის შექმნის წესებს, უნარ-ჩვევებსა და განხორციელების გზებს გაეცნობიან.

თანაბარი შესაძლებლობების დაცვის კვირეულის ფარგლებში ბათუმის შოთა რუსთაველის სახელმწიფო უნივერსიტეტმა აჭარის განათლების, კულტურისა და სპორტის სამინისტროს მულტიდისციპლინური გუნდის მიერ შეფასებულ ბავშვებსა და შეზღუდული შესაძლებლობის მქონე პირებს უმასპინძლა. ტემპუსის პროექტის ესპაიერის (ASPIRE) ეგიდით გამართულ გასართობ-შემეცნებით ღონისძიებაში სხვადასხვა თაობის ინკლუზიური ჯგუფის მოზარდებმა მიიღეს მონაწილეობა და საკუთარი სახელოვნებო შესაძლებლობები წარმოაჩინეს. საღამოს დასასრულს ფრანები გაუშვეს, ბავშვებს სამახსოვრო საჩუქრები გადასცეს და ქალაქში ღია მატარებლით გაასეირნეს. ღონისძიება განათლების ფაკულტეტისა და აჭარის მუნიციპალიტეტების ორგანიზებით ჩატარდა.

თბილისში, სასტუმრო ,,ჰოლიდეი ინ’’-ში საქართველოს განათლებისა და მეცნიერების სამინისტროს წარმომადგენელმა, ბათუმის შოთა რუსთაველის სახელმწიფო უნივერსიტეტის, ილიაუნის, აკაკი წერეთლის სახელმწიფო უნივერსიტეტის, სამცხე-ჯავახეთის სახელმწიფო სასწავლო უნივერსიტეტისა და საქართველოს საზოგადოებრივ საქმეთა ინსტიტუტის - ჯიპას რექტორებმა ხელი მოაწერეს ინკლუზიის დეკლარაციას. შეთანხმების მიზანია ინკლუზიური განათლების დანერგვა განათლების ყველა ეტაპზე და სწავლებაში სტუდენტებისა და პროფესორ-მასწავლებლების მონაწილეობის მისაღებად შესაბამისი პირობების უზრუნველყოფა. პარტნიორი უმაღლესი საგანმანათლებლო დაწესებულებები ერთობლივად შეიმუშავებენ და განახორციელებენ ინკლუზიური განათლების სასწავლო-საგანმანათლებლო პროგრამებს.

ბათუმის შოთა რუსთაველის სახელმწიფო უნივერსიტეტის თანამშრომლობის კლუბის ,,სკოლა-უნივერსიტეტი“ ფარგლებში მოსწავლეთა მეორე სასკოლო სამეცნიერო-შემოქმედებითი კონფერენცია გაიმართა. სკოლა "ნიკეს" მოსწავლეებმა კონფერენციაზე ნაშრომები წარადგინეს ქართულ ენისა და ლიტერატურის, ისტორიის, რუსულ ენისა და ლიტერატურის, ბიოლოგიის, ფიზიკის, ქიმიის, მათემატიკის და ხელოვნების მიმართულებით. განათლების ფაკულტეტის დაწყებითი განათლების სპეციალობის სტუდენტებითა და პროფესორ-მასწავლებლებით დაკომპლექტებულმა კომისიამ მოხსენებები შეაფასა და 25 მონაწილიდან 4 საუკეთესო თემის ავტორი გამოავლინა.