შოთა რუსთაველის დარბაზში ილიას სახელმწიფო უნივერსიტეტის პროფესორმა, ,,ისტორიის მასწავლებელთა საქართველოს ასოციაციის“ წევრმა, დოქტორმა ოლივერ რაისნერმა ღია ლექცია წაიკითხა თემაზე: ,,ევროპული გამოცდილება ინტერკულტურულ განათლებაში“. გერმანელმა მკვლევარმა განათლების ფაკულტეტის სტუდენტებსა და პროფესორ-მასწავლებლებს ინტერკულტურული განათლების მიღწევები, სიახლეები და გამოწვევები გააცნო. ღონისძიება სამოქალაქო ინტეგრაციისა და ეროვნებათშორისი ურთიერთობების ცენტრის ფინანსური მხარდაჭერით ჩატარდა.

ბათუმის შოთა რუსთაველის სახელმწიფო უნივერსიტეტის 80 წლის იუბილესადმი მიძღვნილი სამეცნიერო კონფერენცია გაიმართა თემაზე: „სწავლებისა და აღზრდის აქტუალური პრობლემები“. განათლების ფაკულტეტის სტუდენტთა და მოსწავლეთა თანამშრომლობის კლუბის მესამე სამეცნიერო სესია სამ სექციაში მუშაობდა და წარმოდგენილი იყო 100-მდე მოხსენება. აჭარის საჯარო და კერძო სკოლების მოსწავლეებმა სტუდენტებთან ერთად ნაშრომები წაიკითხეს პედაგოგიკის, განათლებისა და საბუნებისმეტყველო მეცნიერებების აქტუალურ საკითხებზე. კონფერენცია სკოლა „ნიკეს“ სპექტაკლ „არგონავტებით“ დასრულდა.

ბათუმის შოთა რუსთაველის სახელმწიფო უნივერსიტეტში სამაგისტრო პროგრამის „უმაღლესი განათლების მენეჯმენტი“ ფარგლებში სასწავლო ვიზიტით სომხეთის ვანაძორის უნივერსიტეტის სამაგისტრო პროგრამის 5 სტუდენტი იმყოფება. საგანმანათლებლო პროცესის გაცნობის მიზნით სომეხი სტუდენტები ლექციებს დაესწრნენ და ქალაქის ღირსშესანიშნაობები დაათვალიერეს. სტუმარი-მაგისტრანტები მშობლიურ უნივერსიტეტში ბათუმის შოთა რუსთაველის სახელმწიფო უნივერსიტეტის მაგისტრანტებთან ერთად გაემგზავრებიან. პროექტის ეგიდით ასევე ბსუ-ს 2 წარჩინებული მაგისტრანტი კობლენცის უნივერსიტეტის საზაფხულო სკოლის მუშაობაში მიიღებს მონაწილეობას. უმაღლეს საგანმანათლებლო დაწესებულებაში გამართულ შეხვედრაზე, რექტორის მოვალეობის შემსრულებელმა მერაბ ხალვაშმა და პროგრამის აკადემიურმა პერსონალმა პროექტის მნიშვნელობაზე ისაუბრეს და მასში მონაწილე სტუდენტებს წარმატებები უსურვეს.

განათლების ფაკულტეტმა ,,სამოქალაქო ინტეგრაციისა და ეროვნებათშორისი ურთიერთობების ცენტრის“ წარმომადგენლებს უმასპინძლა. ვიზიტის მიზანს იმ სამომავლო გეგმებზე შეთანხმება წარმოადგენდა, რომელიც ბსუ-ს, როგორც ფონდ ღია საზოგადოება - საქართველოს გრანტის ,,მულტიკულტურული განათლების ასახვა მასწავლებელთა განათლების პროგრამებში“ (№HE/12/14-19885) ერთ-ერთ მონაწილეს აქვს განსახორციელებელი.

უნივერსიტეტის სააქტო დარბაზში ტრენინგის - ,,სასწავლო-სააღმზრდელო პროგრამა საბავშვო ბაღებისთვის“ მონაწილე 397 აღმზრდელსა და 26 თავისუფალ მსმენელს სერტიფიკატები გადაეცა. მოკლევადიანი პროგრამა განათლების ფაკულტეტთან არსებულ პედაგოგთა დახელოვნებისა და პროფესიული გადამზადების ცენტრის მიერ ბათუმის შოთა რუსთაველის სახელმწიფო უნივერსიტეტსა და ბათუმის საბავშვო ბაღების გაერთიანებას შორის გაფორმებული ხელშეკრულების საფუძველზე განხორციელდა. პროგრამის ამოქმედებიდან დღემდე უნივერსიტეტის ბაზაზე სულ რეგიონის 700-მდე აღმზრდელი და თავისუფალი მსმენელია გადამზადებული. პროექტის მიზანია უწყვეტი განათლების პირველი რგოლის განვითარების ხელშეწყობა და თანამედროვე გამოცდილების გაზიარება.