ახალი ამბები

საერთაშორისო სამეცნიერო კონფერენცია „ბიონანოაგენტების კვლევის თანამედროვე მეთოდები“ გაიხსნა ბათუმის შოთა რუსთაველის სახელმწიფო უნივერსიტეტში. საერთაშორისო სესიის მიზანია საქართველოში გრძელვადიანი ინოვაციური პოტენციალის გაუმჯობესება და მათი პოპულარიზაცია. კონფერენცია ხელს შეუწყობს ინტერდისციპლინარულ თანამშრომლობას (ბიო – სამედიცინო და ბიოფიზიკა, ფიზიკური კვლევა, ინფორმაციული ტექნოლოგია და სისტემები), ასევე კვლევისა და ინოვაციური პროდუქტების, ცოდნისა და იდეების გაცვლას ბაზრიდან კვლევამდე და პირიქით. სამდღიან სესიაში მონაწილეობას ღებულობენ საქართველოსა და უცხოეთის უმაღლესი საგანმანათლებო დაწესებულებების წამყვანი პროფესორ-მასწავლებლები და მკვლევრები.

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის სტუდენტი გიორგი ლორთქიფანიძე ევრაზიის ჩემპიონია ძალისმიერ სამჭიდში. ევრაზიის თასის გათამაშება სამჭიდში ქალაქ კიევში გაიმართა და მასში 5 ქვეყნის სპორტსმენები მონაწილეობდნენ. გიორგი ლორთქიფანიძე პირველი ადგილის მფლობელი გახდა 20-23 წლის ასაკში, 100 კგ. წონით კატეგორიაში. ბათუმის შოთა რუსთაველის სახელმწიფო უნივერსიტეტი გიორგი ლორთქიფანიძეს ულოცავს გამარჯვებას და უსურვებს წარმატებებს.

„ენერგო და კლიმატის დიპლომატია, ენერგო ეფექტურობა და ენერგო მენეჯმენტი“ თემაზე ბათუმის შოთა რუსთაველის სახელმწიფო უნივერსიტეტის სტუდენტებისა და პროფესორ-მასწავლებლებისათვის ბსუ-ში სემინარი გაიმართა. პროექტი ხორციელდება გაეროსა და ბულგარეთის განვითარების ფონდის მხარდაჭერით და მიზნად ისახავს სხვადასხვა მიზნობრივი ჯგუფის - დიპლომატების, ენერგეტიკის საკითხებზე მომუშავე პროფესიული საჯარო მოხელეების, არასამთავრობო და ბიზნეს სექტორის წარმომადგენლების, სტუდენტებისა და აკადემიური პერსონალის ცოდნის გაღრმავებას ენერგეტიკისა და მდგრადი განვითარების საკითხებზე.

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა და საქართველოს საგარეო საქმეთა სამინისტროს ლევან მიქელაძის სახელობის დიპლომატიური სასწავლო და კვლევით ინსტიტუტის დირექტორმა ირინე დახუნდარიძემ თანამშრომლობის მემორანდუმს მოაწერეს ხელი. ხელშეკრულება ითვალისწინებს ერთობლივი სასწავლო-სამეცნიერო პროექტების განხორციელებას და პროფესორ-მასწავლებელთა და მკვლევართა გაცვლას. მემორანდუმის ფარგლებში გაიმართება კონფერენციები, საზაფხულო სკოლები, სემინარები და აქტუალურ საკითხებზე სხვადასხვა სახის ღონისძიებები.

ბათუმის შოთა რუსთაველის სახელმწიფო უნივერსიტეტში სტუდენტთა საერთაშორისო დღე აღინიშნა. ბსუ-ს რექტორმა, პროფესორმა მერაბ ხალვაშმა, ადმინისტრაციის ხელმძღვანელმა ნიკა ჩხარტიშვილმა, რექტორის მოადგილემ ანზორ ბერიძემ ახალგაზრდებს სტუდენტთა საერთაშორისო დღე მიულოცეს და საუნივერსიტეტო ცხოვრებაში შეტანილი წვლილისათვის მადლობის სიგელები გადასცეს. ღონისძიებაზე სტუდენტური სამეცნიერო ღონისძიებების ორგანიზებისთვის, მოხალისეობრივი საქმიანობისთვის, სტუდენტური ცხოვრების პოპულარიზაციისათვის, სპორტულ და კულტურულ ცხოვრებაში აქტიური მონაწილეობისათვის 50 სტუდენტი დაჯილდოვდა. ღონისძიება ბსუ-ს სტუდენტთა კარიერული განვითარების, კულტურისა და სპორტის დეპარტამენტის ორგანიზებით გაიმართა.