ახალი ამბები

ბათუმის შოთა რუსთაველის სახელმწიფო უნივერსიტეტის ადმინისტრაციის ხელმძღვანელმა ნიკა ჩხარტიშვილმა ბსუ-ს პროფესორ-მასწავლებლებს, მკვლევრებსა და ადმინისტრაციის წარმომადგენლებს გაწეული საქმიანობის ანგარიში წარუდგინა. შეხვედრაზე ადმინისტრაციის ხელმძღვანელმა ისაუბრა 100 დღის განმავლობაში განხორციელებულ საქმიანობის შედეგებზე და ყურადღება გაამახვილა იდენტიფიცირებულ პრობლემებზე, გარდაუვალ საჭიროებებსა და განვითარების შესაძლებლობებზე, ბიუჯეტის შედგენისა და განკარგვის პრინციპებზე, მიმდინარე სამუშაოებსა და სამომავლო გეგმებზე. ანგარიშის წარდგენის შემდეგ ნიკა ჩხარტიშვილმა დამსწრე საზოგადოების შეკითხვებს უპასუხა.

ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა და ახალგაზრდობის რეგიონული ცენტრის დირექტორის მოვალეობის შემსრულებელმა დავით მიქელაძემ თანამშრომლობის მემორანდუმს მოაწერეს ხელი. ხელშეკრულება მიზნად ისახავს არაფორმალური განათლების ხელშეწყობას, სტუდენტების შემეცნებით აქტივობებში, მოხალისეობის პროგრამებსა და სხვდასხვა საგანმანათლებლო პროექტებში ჩართვას. მემორანდუმი ასევე ითვალისწინებს ტრენერებისა და ლიდერების მომზადებას და ახალგაზრდების სტუდენტურ ბანაკებში მონაწილეობას.

15-16 ნოემბერს, თელავის იაკობ გოგებაშვილის სახელმწიფო უნივერსიტეტში ევროკავშირის „Erasmus+“-ის პროექტის DITECH მესამე ეროვნული შეხვედრა გაიმართა. შეხვედრაში მონაწილეობა მიიღეს ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტის დეკანმა ლელა თურმანიძემ, ბსუ-ს პროფესიული პროგრამების მართვის და უწყვეტი განათლების ცენტრის დირექტორმა მადონა მიქელაძემ და ბსუ-ს ასისტენტ პროფესორმა ნინო სამნიძემ.

ევროკავშირის პროექტის „ლაბორატორიული ჯანმრთელობისა და უსაფრთხოების უწყვეტი განათლების კურსები ახალგაზრდა პროფესიონალებისთვის დასავლეთ და აღმოსავლეთ საქართველოში“ ეგიდით, ბსუ-ში პროექტის მონიტორინგის ჯგუფის სამუშაო შეხვედრა გაიმართა. ჯგუფის წევრებმა - ევროკავშირის, საქართველოს განათლებისა და მეცნიერების სამინისტროს, დასაქმების ეროვნული სააგენტოს და ახალგაზრდობის სააგენტოს წარმომადგენლებმა შეხვედრაზე პროგრამის მიმდინარეობა და განხორციელებული აქტივობები შეაფასეს. პროექტის ფარგლებში ბსუ-ში თანამედროვე აპარატურით აღჭურვილი ლაბორატორიული უსაფრთხოების სპეციალისტთა გადამზადების ცენტრი გაიხსნება.

ბათუმის შოთა რუსთაველის სახელმწიფო უნივერსიტეტმა ნატო-ს საზღვაო ძალების წარმომადგენლებს უმასპინძლა. ბრიტანეთის საზღვაო ფლოტის ადმირალი ჯეიმს მორლი, ამერიკის შეერთებული შტატების საზღვაო ქვეითთა კორპუსის კაპიტანი ჯონათან ლიპსი და ამერიკის საელჩოს თავდაცვის ატაშეს პოლკოვნიკი სტეფანი ბეგლი ბსუ-ს იურიდიული და სოციალურ მეცნიერებათა ფაკულტეტის სტუდენტებს შეხვდნენ და ჩრდილოატლანტიკური ალიანსის თავდაცვისა და უსაფრთხოების საკითხებზე ესაუბრნენ. ღონისძიებას მოდერაცია გაუწიეს საქართველოში აშშ-ის საელჩოს საზოგადოებასთან ურთიერთობის განყოფილების ხელმძღვანელმა ქეთრინ შვაიცერმა და საგარეო საქმეთა სამინისტროს ნატოსა და ევროკავშირის შესახებ საინფორმაციო ცენტრის დირექტორმა თამარა წულეისკირმა. შეხვედრა კითხვა-პასუხის რეჟიმში წარიმართა და სტუმრებმა სტუდენტების აქტუალურ შეკითხვებს უპასუხეს.