ახალი ამბები

საქართველოს პირველი კონსტიტუციის 100 წლის იუბილესადმი მიძღვნილი ჟან მონეს სტუდენტური კონფერენცია „დემოკრატია, ადამიანის უფლებები და კანონის უზენაესობა ევროპის კავშირში“ გაიმართა ბათუმის შოთა რუსთაველის სახელმწიფო უნივერსიტეტში. კონფერენციაზე ჟან მონეს სასწავლო პროგრამის კურსდამთავრებულმა სტუდენტებმა წარმოადგინეს მოხსენებები ევროპის კავშირის ძირითადი ღირებულებების, ევროპული ინტეგრაციის, ევროკავშირში დემოკრატიის და ადამიანის უფლებათა დაცვის საკითხებზე. კონფერენციის მონაწილეებმა ასევე ისაუბრეს 1921 წლის 21 თებერვლის კონსტიტუციის, როგორც საქართველოს პირველი ევროპული კონსტიტუციის და მასში განსაზღვრული ევროპული ღირებულებების, ადამიანის უფლებების და დემოკრატიული ინსტიტუტების შესახებ.

პლაგიატის პრევენციის საერთაშორისო დღესთან დაკავშირებით, ბათუმის შოთა რუსთაველის სახელმწიფო უნივერსიტეტის სტუდენტებისა და პროფესორ-მასწავლებლებისთვის ჩატარდა ვებინარი თემაზე: „ერთად ვებრძოლოთ პლაგიატს“. პლაგიატის შესახებ ცნობიერების ამაღლებასთან დაკავშირებულ საკითხებზე საუბრის გარდა, შეხვედრის მონაწილეებმა იმსჯელეს პლაგიატის წინააღმდეგ ბრძოლის მექანიზმებზე, ბსუ-ს მიერ შემუშავებულ რეგულაციებსა და აკადემიური წერის სასწავლო კურსის მოდიფიცირების აუცილებლობაზე. ვებინარის ფარგლებში ჩატარებულ ვიქტორინაში მონაწილეობა მიიღეს როგორც სტუდენტებმა, ასევე პროფესორ-მასწავლებლებმა. შეხვედრაზე საკუთარი მოსაზრებები გამოთქვეს სტუდენტებმა, რომლებმაც პროგრამის Turnitin გამოყენების მნიშვნელობასა და აუცილებლობაზე ისაუბრეს.

„ერაზმუს+“-ის საგრანტო პროექტის „სწავლების ოპტიმიზაცია და აკადემიური ინკლუზია დისტანციური სწავლებისა და სწავლის გამოყენებით“ (Learning Optimization and Academic Inclusion Via Equitative Distance Teaching and Learning - Love Distance) მენეჯმენტის სამუშაო შეხვედრა გაიმართა. შეხვედრის მონაწილეებმა განიხილეს პროექტის მიმდინარეობის დეტალები და დაიგეგმა მისი განხორციელების მომდევნო ეტაპები. პროექტის მიზანია, უზრუნველყოს ისრაელსა და საქართველოში ისეთი პროგრამების/კურსების/სასწავლო მასალების შემუშავება და დანერგვა, რომლებიც ხელს შეუწყობს დისტანციური სწავლების გზით სტუდენტების ინტეგრაციას საგანმანათლებლო სისტემაში.

ბათუმის შოთა რუსთაველის სახელმწიფო უნივერსიტეტი პატივისცემითა და საუკეთესო სურვილებით დაბადებიდან 65 წლის იუბილეს ულოცავს ქართული მეცნიერების გამორჩეულ მოღვაწეს და მკვლევარს, ბსუ-ს ქართველოლოგიის ცენტრის ხელმძღვანელს, ივანე ჯავახიშვილის პრემიის ლაურეატს, მომავალი თაობების ღირსეულ მოძღვარს, პროფესორ მამია ფაღავას.

„Erasmus+“-ის პროგრამის გამარჯვებული პროექტის „ტექნოლოგიებით გაძლიერებული სწავლება და სწავლა საქართველოს უნივერსიტეტებში (Developing and Implementing Technology-Enhanced Teaching and Learning at Georgian HEIs – DITECH“) პირველი ეროვნული სამუშაო შეხვედრა ჩატარდა ZOOM-ის პლატფორმის საშუალებით. პირველ ორდღიან ეროვნულ შეხვედრაში პროექტის მონაწილე საქართველოს უმაღლესი საგანმანათლებლო დაწესებულებებისა და მასწავლებელთა პროფესიული განვითარების ეროვნული ცენტრის წარმომადგენლები გაეცნენ პროექტის მომზადების, განვითარების, ხარისხის უზრუნველყოფის, მენეჯმენტისა და შედეგების დისემინაციის ეტაპებს. ასევე იმსჯელეს პროექტის ბიუჯეტის, პარტნიორული ხელშეკრულების პირობებისა და სხვა ლოგისტიკურ საკითხებზე.