დამდეგ შობა-ახალ წელს ვულოცავ ჩვენს ძვირფას სტუდენტებს, პატივცემულ პროფესორ-მასწავლებლებს, მეცნიერ-თანამშრომლებს, დამხმარე და ადმინისტრაციულ პერსონალს, უნივერსიტეტის კურსდამთავრებულებს და მის გულშემატკივრებს! უპირველეს ყოვლისა, მინდა გისურვოთ თქვენი და თქვენი ოჯახის წევრების ჯანმრთელობა და კეთილდღეობა. 2021 წელი თქვენთვის ყოფილიყოს მშვიდობის, სტაბილურობის, სიკეთის, სიყვარულის, ბედნიერებისა და ახალი წარმატებების წელი!
საქართველოს საგანმანათლებლო სივრცეში პირველად ბათუმის შოთა რუსთაველის სახელმწიფო უნივერსიტეტში ამოქმედდება სამაგისტრო პროგრამა "პროფესიული განათლება და ადამიანური რესურსების განვითარება". უნივერსიტეტმა აკრედიტაციის გზით მიიღო უფლება განახორციელოს სამაგისტრო პროგრამა, რომელიც მომზადდა საერთაშორისო გამოცდილებაზე დაყრდნობითა და ეროვნული მოთხოვნების გათვალისწინებით.
ბათუმის შოთა რუსთაველის სახელმწიფო უნივერსიტეტი მონაწილეობს პროექტში „მეცნიერება კაპიტანია“. საქართველო წელს პირველად შეუერთდა ევროპელ მკვლევართა ღამეს და ისტორიაში პირველად გამოჩნდა ევროკავშირის წევრი ქვეყნებისა და „ჰორიზონტი 2020“ პროგრამის ასოცირებული ქვეყნების მასშტაბით სინქრონულ რეჟიმში მიმდინარე ღონისძიებების რუკაზე. 27-28 ნოემბერს, პროექტის „მეცნიერება კაპიტანია“ ძირითადი ღონისძიებები, ფართომასშტაბიანი, მრავალდარგობრივი, შემეცნებითი და სახალისო აქტივობები, თბილისში, ბათუმში თელავში, ქუთაისში, ახალციხესა და ზუგდიდში დისტანციურად ტარდება. პროექტი ხორციელდება “Horizon 2020” მარია სკლადოვსკაია-კიურის (MSCA) პროგრამის ფარგლებში - საქართველოს განათლების, მეცნიერების, კულტურისა და სპორტის სამინისტროს მიერ, შოთა რუსთაველის ეროვნული სამეცნიერო ფონდის მხარდაჭერით.
24-28 ნოემბერს „ერაზმუს+“-ის საგრანტო პროექტის „სწავლების ოპტიმიზაცია და აკადემიური ინკლუზია დისტანციური სწავლებისა და სწავლის გამოყენებით“ (Learning Optimization and Academic Inclusion Via Equitative Distance Teaching and Learning - Love Distance) პარტნიორი უნივერსიტეტების წარმომადგენლებისთვის ტრენერთა ტრენინგი „ბარსელონა 2020“ გაიმართა. ონლაინ ტრენინგი, რომელშიც 50-ზე მეტი პირი მონაწილეობდა, იბერო-ამერიკული უნივერსიტეტის ფონდის (FUNIBER) ICT ჯგუფის მიერ შექმნილ ვირტუალურ კამპუსში ჩატარდა.
ბსუ-ს ტექნოლოგიური ფაკულტეტის აგრარული მიმართულების სტუდენტებმა, ქალთა საფეხბურთო კლუბ „ლანჩხუთის“ წევრებმა ნინი გუჯაბიძემ, მარიამ გოგეშვილმა, ნინო ჩხარტიშვილმა და ფსიქოლოგიის მიმართულების სტუდენტმა ლანა მჟავიამ კიდევ ერთ წარმატებას მიაღწიეს უეფას ქალთა ჩემპიონატში. ქართველმა სპორტსმენებმა რუმინეთში გამართულ ქალთა ჩემპიონთა ლიგის დასკვნითი საკვალიფიკაციო ეტაპის ფინალურ შეხვედრაში მასპინძელი ქვეყნის ჩემპიონი „კლუჟი“ დაამარცხეს ანგარიშით 1:0. „ლანჩხუთი“ პირველი ქართული საფეხბურთო კლუბია, რომელიც ჩემპიონთა ლიგაზე იასპარეზებს. ბათუმის შოთა რუსთაველის სახელმწიფო უნივერსიტეტი სტუდენტებს ულოცავს მნიშვნელოვან გამარჯვებას და წარმატებებს უსურვებს.
